صوص الدولتشي دي ليتشي صوص جدا لذيذ وله الاف الاستخدامات، ممكن يستخدم كصوص مع الحلويات،
ممكن تخلطونه مع اساس اسكريم او كسترد ممكن حتى تدهنونه عالخبز زي النوتيلا لو تبون.
الصوص عباره عن حليب مطبوخ مع سكر لوقت طويل، السكر اللي في الحليب (لاكتوز) و
السكر اللي اضفناه (سكروز) و حتى البروتين حق الحليب راح يتكرملون مع وقت الطبخ الطويل
ويعطون صوص ناعم وبطعم كاراميل اعمق و انعم شوي من صوص الكاراميل العادي اللي مصنوع
من نوع سكر واحد. دولتشي دي ليتشي معناها حلاوه الحليب او مربى الحليب و الصوص
يعتقد انه كان طريقه لحفظ الحليب اصلا. الطريقه اللي بستخدم هي الطريقه الاصليه لعمل الصوص
من المكونات الاساسيه حقته اللي هي الحليب و السكر، فيه ناس يسوون الصوص باستخدام الحليب
المكثف ( النستله ) وكل الطريقتين تنفع وبتعطي نتيجه ممتازة. شخصيا احب هذي الطريقه لاني
اشوفها تعطي نتيجه احسن كوني استخدم احسن مكونات ( حليب طبيعي ، فانيلا طبيعيه )
و لان اللي مصنوع من النستله فيه طعم معدني خفيف من العلبة.
المقادير :
لتر حليب طازج ( موب بودره ولا طويل الاجل )
كوب ونص سكر ابيض
عود فانيلا مقسوم بالنص
١/٢ ملعقه صغيره بيكنج صودا
* اذا ماعندكم فانيلا طبيعيه استخدموا فانيلا سايله او بودرة.
* الحليب يميل للحموضة، اذا حطينا البيكنج صودا اللي هي ماده قاعديه نعدل الحموضه هذي.
احنا نبي الحليب شوي قاعدي لان الوسط القاعدي يسرع الكرمله ولان الحموضه ممكن تخلي الحليب
يتكتل خصوصا مع وقت الطبخ الطويل.
الطريقه :
نحط الحليب و السكر و الفانيلا في قدر ثقيل على حراره وسط ونحرك الين يذوب
السكر. بعد ما يذوب السكر نحط البيكنج صودا ونحرك شوي. نخلي الحليب يغلي على غليه
جدا هاديه مع التحريك من وقت لوقت ( بس بدون ما تخلطون الرغوه اللي بتطلع
في الحليب مره ثانيه ). نطبخ الحليب تقريبا ساعه بعدين نشيل الفانيلا ونخليه يكمل طبخ
الين ينقص الخليط لكوب تقريبا ويصير لونه ذهبي زي الكاراميل تقريبا ساعه ونص الى ساعتين.
نصفي الخليط بعدين نحفظه في علبه تتقفل باحكام في الثلاجه شهر تقريبا.
