الليل موحش والهواجيس مره
والشوق من جمر الجفاء شب ناره
النفس ضاقت والرجاء مات حره
والروح عادت للوهم وانتظاره
يا ليل تكفى ضمني الف مره
واحضن صدى صوتي ورد اعتباره
يا ليل حالي جره الهم جره
يا ليل عمري ما يطيق احتضاره
ان زاد شوقي يفضح الدمع سره
وان جف دمعي يطلب الشوق ثاره
العين يكفيها من الشوف ذره
والروح تروى بالظماء للبشاره
يا ليل عمري ما عرفت المسره
ما عاد لي غير الاسى والمراره
بعض الغلا دربه عذاب ومضره
فيه الرجا يرثي لحال انهياره
بعض الغلا حلم الليالي يغره
بعض الغلا تصفق يمينه يساره
بعض الغلا لو زاد يكفيك شره
برد وجفا ليل العليل ونهاره
بعض الغلا نفسه مكره مفره
ما يرتوي من يرتمي في مساره
بعض الغلا نفسه عزيزه وحره
في خافق ما ينحني للخساره
يا مبتلي همك عن الناس صره
عاف الغلا وانفض بقايا غباره
يا متعبي درب الهوى لا تمره
واسدل على رعشه ضلوعك ستاره
يا منتهي زيد العتاب وتشره
شرهه صويب زلزل الهم داره
