طريقه عمل اللانشون بالبيض
طريقه عمل اللانشون بدون لحم او باللحم او بالدجاج
المقادير :
2 مثلث جبنه نستو
2 بيضه
2 معلقه كبيره دقيق
1/2 كوب صغير زيت
مكعب مرقه دجاج
1/2 معلقه فلفل اسود مجروش
1/2 معلقه بابريكا … او دم غزال بحجم راس الدبوس
فص ثوم كبير
حبه حبهان
الطريقه :
هنجيب المفرمه بتاعه اللحمه او الخلاط على حسب الموجود عندك
وهتحطى فيه الجبنه المثلثات والبيض والدقيق والزيت ومكعب المرقه والفلفل الاسود والبابريكا او دم الغزال
والثوم وهنفتح حبه الحبهان وهناخد الحب الصغير اللى جواها ونحطه على المكونات ونضرب كل الخليط
ده فى المفرمه او فى الخلاط لغايه ما يختلط كويس مع بعض ويبقى خليط سائل
له قوام خفيف وبعدين هنجيب كيس نايلون يكون طويل ورفيع ويفضل طبعا الكيس الحرارى لانه
صحى اكتر من الاكياس البلاستك العاديه وهنجيب الكيس من الحته اللى مقفوله من تحت وهنربطه
علشان يبقى مضموم ونصب الخليط جوه الكيس ونطلع منه الهوا ونبرط الكيس من فوق ..
كده هيبقى الكيس مربوط من فوق ومن تحت علشان يبقى الخليط على شكل اسطوانه وبعدين
نلف الكيس فى ورق فويل ونربطه من الناحيتين
… وبعدين هنجيب الحله ونحط نصها ميه ونحطها على النار لغايه ما الميه تغلى وبعدين
هنحط الكيس فى الميه ونغطى الحله ونوطى النار ولما يعدى نص ساعه هنقلب لفه اللانشون
الناحيه التانيه علشان تستوى من الناحيتين ونسيبها نص ساعه كمان … يعنى اللانشون بياخد حوالى
ساعه على النار وعلشان اتاكد ان اللانشون استوى ادخل خله او طرف سكينه فى اسطوانه
اللانشون ولو طلعت نظيفه يبقى اللانشون استوى .. اطلع اللانشون من الميه واحطه فى التلاجه
ذى ماهو من غير ما افك الكيس علشان يسقع ويتماسك
هسيبه حوالى من 3 : 4 ساعات علشان يسقع كويس من جوه ومن بره وبعدين
اطلعه من التلاجه واقطعه شرائح رقيقه وارصه فى طبق التقديم
لو هتعملى اللانشون باللحمه او بالفراخ
هتحطى نفس المكونات اللى فاتت مع اضافه 2 معلقه كبيره لحمه مفرومه او 2 معلقه
كبيره فراخ مفرومه .. علشان اللانشون ياخد نكهه الفراخ او اللحمه وهتكملى باقى الخطوات ذى
ما هى
ولو حبيتى تحتفظى بيه فى الثلاجه بعد ما قطعتيه شرائح يبقى تحطيه فى علبه تلاجه
مقفوله بغطاء علشان مش ينشف منك او تحطيه فى طبق وتغطى الطبق بكيس نايلون
جربيه هيعجبك اوى وطعمه نفس طعم اللانشون اللى بنجيبه من بره بس مع اختلاف طبعا
النظافه وانه مضمون 100%
وبالف هنا وشفا
