روايه كوني ملاكي واياك من ناري
كوني ملاكي …. و اياك من ناري
الجزء الاول
وقفت دارين بعصبيه شديده ، وهي بتحاول تستوعب الكلام الي عم بحكيه ابوها ، وسالته
وعلامات الدهشه وعدم التصديق مرسومه بوضوح على وجهها :
– انت عم تحكي عن ايهاب نفسه يلي اجى خطبني قبل فتره ؟!
الاب ” ابو اياد” : – هو بذاته!!
– بس هادا يا بابا انا سبق ورفضته ، وقلتلك اني مابدي اياه …. وانتهى
الموضوع وتسكر … ليش عم ترجع تفتحه؟!
– لانه هادا شب ما بتعوض يادارين … مافي متله بين شباب الايام هاي واحد
فهمان … و …
قاطعته دارين وهي بتحكي بهدوء :
– قصدك تقول واحد تافه عديم الشخصيه … مو شايف بكل الدنيا حدا متله مغرور
لابعد حد واناني ما بهمه غير حاله …
ارتفعت حواجب ” ابو اياد” باستغراب كبييييير ، وسالها باستهجان كبير لكلامها :
– ايهااب عديم الشخصية؟؟! بس ما يسمعوك بالبورصات العالميه ولا بالشركات الكبيره ، لانه عديم
الشخصيه ما بتناسبه ابدا والعكس هو الصحيح … وتافه كمان ما بتوصفه ابدا ، لانه
شب باول التلاتينات عنده شركات عالميه كبيره والها فروع ببلاد مختلفه .. فاكيد اكيد ما
حيكون تافه … واذا على غروره ف بشو مدايقك … ومين بيطلعله يكون مغرور غيره
… عالاقل هو بيستاهل يكون مغرور … اعطيني شب بعمره حقق طموحات وانجازات واعمال اد
نص يلي حققها ايهاب !!
– يعني بابا مع احترامي لكل الي بتحكيه ، بس هادا مو من عرق جبينه
ولا من مجهوده وتعبه ، هاي كلها مصاري اهله وعيلته … ما حدا بخفى عليه
انو عيله ال——– من اكبر واغنى عائلات عمان ..
ابتسم ابو اياد بهدوء وهو حاسس انو عصبيه بنته كل سببها هو اعجابها الكبير في
ايهاب وهو الشب الوحيد الي رغم انها عجبته بس ما ذاب من حبه الها زي
ما دارين متعوده … ، حكالها بكل ثقه :
– بما انك عارفه انو ابن عيله كبيره بعمان فاظن هاي ميزه جديده بقدر احكيلك
انها بتخليه شب ولا كل شباب الاردن كلها !! واحد متله ابن ناس اكابر معاه
كل هالمصاري وهو حاليا عم بدير كل شركات ابوه واعماله بشكل كامل شو بده بكل
بنات عمان من شوفه حاله ؟!! او اي شب تاني مكانه رح يستفيد من ثروه
اهله ومركزهم عشان يروح يصيع ويضيع ويعمل شو ما بده ، مش بيحمل مسؤوليه هالشركات
لا وبكبرها كمان ..
كتفت دارين ايديها ، ولفت وجهها مش عاجبها مدح ابوها لها الشب ، وبلشت تهز
رجلها بعصبيه متل عادتها لما تتوتر او تعصب .. وقالت بصوت مهزوز :
– بس يا بابا انا ماطقته ولا حبيته … خلص … مابدي اياه … شو
هي الشغله بالغصب ؟؟!
تاملها ابوها بحنان كبير ، هاي بنته وبكره وحبيبه قلبه ، مشي باتجاهها ومسكها من
اكتافها وحكالها بقمه الهدوء والحنان :
– ولو؟؟؟ ما عاش الي يغصبك على شي وانا عايش يا بابا !! بس انا
ابوك ولما احس في شغله فيها مصلحتك ما بقدر ما احكيلك اياها واحاول اقنعك فيها
.. ما بقدر اتجاهل الموضوع بس لانه مدايقك .. سميها غريزه حمايه … حنان اب
شو ما بدك بس مصلحتك عندي اهم شي بالدنيا ، و انا لو ما شفت
مصلحتك مع ايهاب كان اصلا ما فتحت الموضوع معك … هالشب والله يا بابا عجبني
وعبى راسي .. زلمه اد حاله وفهمان … واذا على العلم فمعه بدل الشهاده تنتين
!! لا والماستر تبعه من بريطانيا شو بدك احسن من هيك يا حبيبتي ؟!
اطلعت دارين بابوها بحب كبير ، ولا شعوريا لقيت حالها عم تتمسخر على ايهاب من
جديد وهي بتقول :
– بريطانيااااا؟؟ الله اعلم اصلا شو عمل ببريطانيا ، واحد معه كل هالمصاري ابصر شو
خبص هناك ، او يمكن يكون اشترى شهادته كمااان!!
ابتسم ابو اياد على عصبيه بنته وقالها برواء :
– يا بابا … عيب هيك تحكي .. الشب محترم وسمعته متل الفل ما بصير
تقعدي تشوهي صورته بهالطريقه ، والله يا دارين مافي سبب لكل الي بتعمليه …
فكرت دارين للحظه … وبتردد رجعت سالت ابوها :
– طيب … يعني .. هو حكالك بده .. اياني ؟؟؟؟!!! …. قصدي طبعا …
انه……مثلا ؟…. رجع طلبني منك كمان مره ؟؟!! رغم انو سبق و رفضته؟!
بعد ابو اياد عيونه عن عيون دارين … ورجع بخطواته ليقعد على الكنبايه الي بغرفه
القعده في بيتهم الكبير … وجاوبها بعد صمت :
– بتقدري تقولي هيك شي …
دارين ولعت … وعلى شو من الصبح قاعد بيقنع فيها ؟؟…. ضمت حواجبها بعصبيه وقهر
وسالت :
– شو يعني بقدر اقول هيك شي ؟؟!!! الجواب لازم يكون يا اه … يا
لا … هو بده اياني ولا لا؟؟؟
– مش بس بده اياك … واصر عليك بشده كماان!
رجعت دارين شعرها الاشقر الطويل لورا ضهرها بحركه غرور وتعجرف من كتفها ، وظهرت ابتسامه
انتصار ” غبية” على شفايفها وهي بتفكر انو ايهاب ال—— هي رفضته وهو رجع طلبها
و اصر عليها … وبشده كمان !! ما انتبهت طبعا لعيون ابوها الي كانت عم
تتاملها بحب وابتسم وهو بسالها بمحبه :
– شو سر هالابتسامه طالما انك مابدك اياه؟؟ … ليش فرحت لما عرفت انو بده
اياك ؟؟!
دارين خدودها ولعوا من الخجل وتمنت لو الارض تنشق وتبلعها ، وصارت بدها تحكي اي
شي ينكر اهتمامها به ..( الايهاب ) و كالعاده ، شنت هجومها عليه وهي بتحكي
بنرفزه :
– هادا انسان ما عندو قلب ، ولا بيعرف الرحمه ، كم شركه استغل انهيارها
وحطم مالكينها ليحصل عليها .. كم زلمه باع شركته لهالمحتال حتى يتخلص من ديونه اله
؟؟؟
– لا دارين … انت فاهمه الامور غلط .. الشركات الي عم تحكي عنها ،
انقذها ايهاب من الانهيار .. يمكن يكون اشتراها من مالكيها وصار هو المالك الرسمي الها
، بس انقذ كل العاملين فيها ، بدل ما يصيروا عاطلين عن العمل ، خلاهم
على رؤوس عملهم و من حقه يصير المالك بعد ما دفع كل هالمبالغ الطائله ..
اما بالنسبه للبيع ..فتاكدي انو ايهاب عمره ما غبن او ظلم صاحب شركه ، بالعكس
يمكن بيعطيه تعويض احسن من اي رجل اعمال غيره
تلوت ملامح دارين وهي بتعبر عن غيظها :
– انا بقول تعمله تمثال وتعلقله اياه على واحد من دواوير البلد ، ولا تنسى
الجناحات بالله ، والحلقه كمان فوق راسه … اسم انه ملاك على حد وصفك ….
!!
– دارين هالكلام ما منه فايده
– وانا ما بدي اياه …
– ما الك حجه تقولي ما بدك اياه .. مين بده يجيكي احسن منه ..
المفروض تكوني مكيفه انه هو بده اياكي اصلا …
– نعم ..نعم ؟؟ .. خير ليش شو ناقصني ؟؟؟
– دارين … انا طولت بالي عليكي كتير لاني بدي مصلحتك ..هالشب ازا ما اخدتيه
برضاكي فرح تاخديه غصب عنك
تفاجات دارين بالصوت الي حكا من وراها :
– يا عيني عليك يا ابو اياد .. هيك بدي اياك ، اصلا بنات هاليومين
ما بيجو الا بالعين الحمره ، المفروض تخبرها عن موعد كتب الكتاب .. بس ..
!!
لفت دارين على اخوها اياد الي اصغر منها بسنه واحده بس .. وجاوبته وهي مولعه
من العصبيه :
– بحياه ربك انك تطلع منها …. شاطر تتفلسف بس … هادا الي كان ناقص
… ال العين الحمره ال …
طنشها اياد وكمل كلامه مع ابوه :
– شفت يا ابوي …. هاي البنت ما بلبقلها الا ايهاب …اصلا مين راح يقدرلها
غيره ، خليه يربيها ..
– اسكت انت و تحكيش عن اختك هيك .
اطلع اياد باخته وتعمد يستفزها و هو بيقول :
– اصلا يصحلك شاب متله ، اي بنات البلد كلها مستعدات يرتمو عند رجليه ،
بس مشان الله اطلع فينا ….
وبنرفزه وعصبيه جاوبت :
– صحتين وعافيه عليه وعليهم …
( وعطول جاوبها ) :
– عن جد ناس ما بتقدر النعمه ، لا وبترفسها كمان .. عالحساب عامله حالك
ست متدينه وبتخاف الله ، ما بتخافي الله يحاسبك على هالشب الكامل الاوصاف الي بعتلك
اياه ، وانت بكل تكبر وعناد رفضتيه ؟؟ ولاااا بس شاطره تعملي زفه لا اهلك
بدي اتحجب ، بدي اطلع عمره ، بدي ازور الكعبه ….( كان بيقلد طريقتها بالكلام
باستهزاء.. وكمل بعصبيه ) وهيك تحجبت واهلك ما حد منهم متحجب …ما بكفي انو ساب
متله مصر على بنت محجبه ، هااااي لحالها ميزه عظيمه بالنسبه لواحد بمركزه ، واحد
غيره بكون بدو اياها فايعه وتاعت كوفي شوبات وموضه وستايل وحكي فاضي .. ( سكت
شوي وكمل ) .. بس مشكلتك ما بتشوفي ابعد من انفك .. بتعرفيش تفكري بموضوعيه
، بس بدك تتكبري على صاحباتك انك رفضتي واحد من اغنياء عمان !!! …
كلام اياد لمس جواه قلبها ، يمكن لانه اول مره بحكي بهالجديه والعصبيه بنفس الوقت
، وخلاها تفتح عيونها على جوانب كتيره بالموضوع هي ما كانت منتبهه الها ، حست
بالدموع عم تتجمع في عيونها لما فكرت انها ممكن تكون تافهه بنظر اخوها وابوها لدرجه
انهم يفكروا انها عم ترفضه لمجرد التكبر ، وبصوت مخنوق جاوبت :
– لا يا اياد … انا مش هيك … وانت اكتر واحد بتعرف اني مش
بنت تافهه عشان ارفض شب ممتاز لسبب غبي زي الي حكيته ..
– اثبتي كلامك .. ووافقي عليه .. هيك اعترفتي بنفسك انو شاب ممتاز …
عضت دارين على شفايفها ، بعد ما انتبهت انها فعلا مدحت ايهاب بنفسها ، والتفتت
على ابوها الي كان يتابع الموضوع بلهفه وصمت ، وحست اديش نفسو انها توافق …..
، وبخجل شديد ، خلت نظراتها عالارض وقالت :
– بابا …….. بلغ ايهاب اني موافقه عليه ..
حكت كلماتها ، وطلعت ركض من الغرفه وهي مستغربه اديش كانوا ابوها واخوها مبسوطين على
هالقرار !!!
__________________________________________________ ________________________________
بعد يومين
سيتي مول وقت الظهر
هلا : خلص رولا جد هلكت ، مو قادره الفلف كمان ، بدي اقعد مشان
الله ،، رجلي راحو …
رولا: هلا بنروح على ركن المطاعم بنتغدا ، وبنرتاح شوي !
هلا: شو رايك نحكي مع دارين ، بركي اجت تغدت معنا ؟
رولا ( بفرح ) : يا ريت والله ، اشتقتلها كتير ، حاسه حالي زمان
ما شفتها ..
هلا :يا عمي ما انت عروس ، وعجقه التجهيز اخدت عقلك !!
رولا: انو انت مو عروس وعم تجهزي متلي ومعجوقه وحالتك حاله ، اصلا انت عرسك
قبلي ..
هلا: كله اسبوع حبيبتي وبتلحقيني
رولا: يا الله شو نفسي دارين تخطب وتتزوج متلنا .. !!
هلا: الله يسامحها شو مغيوظه منها ، لانها رفضت اخر شب تقدملها ، والله مواصفاته
روعه ، نفسي افهم وجهه نظرها ..
رولا وهي بتحط مشترياتها على الطاوله الي اختاروها :
– يا ستي هادا كلو نصيب وانا متاكده انو الله راح يوقف معها ويبعتلها عريس
لقطه … دارين بتخاف الله و تحدت كل العالم حواليها عشان تتحجب ..
قعدت هلا عالكرسي وهي بتتنهد راحه بعد كل التعب ووافقت رولا على كلامها :
– معك حق والله ، يا الله عن جد اني اشتقتلها .. بدي احكي معها
..
فتحت هلا شنتتها تدور على موبايلها ، وتفاجات انو عم برن .. وحكت وهي متفاجاه
..:
– فظيعه شو بنت حلال هالدارين .. هايها عم بترن علي ( وفتحت هلا الخط
) .. هلا والله بالموادموزيل دارين ..
دارين : اهلين حياتي كيفك ..؟؟
هلا : انا تمام والله ، بس غرقانه بجهازي ومع هيك مشتاقتلك مووت .. لسه
عم بفتح الشنته بدي ارن عليكي …
دارين : والله … شو عدا ما بدا اتزكرتينا يا عروووووس ؟؟
هلا : انا ورولا بالسيتي مول .. وما هنلنا نتغدى بدونك ..
دارين ( مع صرخه استهجان وزعل ) : ما الامكم ، كيف بتطلعوا من دوني
؟؟جد انكم … مش راح احكي ..
هلا ( ضحكت من قلبها وحكت لرولا بهمس ) : حقدت علينا ليش طالعين من
غيرها ..
سحبت رولا التلفون من هلا وحكت لا دارين :
– يلا يا دارين عم نستاكي … معك ربع ساعه تكوني عنا .. ماراح ناكل
من غيرك .
دارين : يا الله شو مقهوره منكم ، مش متخيله كيف بتطلعو من غيري ..
رولا : والله والله والله صدفه يا دارين ، اصلا انا كنت رايحه عالمل لحالي
،ن وهلا اتصلت فيني ، ولما عرفت انو في sale لحقتني لحالها ، صدقيني ما
كنا متفقين ..
دارين : خلص ازا هيك سامحتكم ، شو بدنا نعمل ، عرايس وصايرات تنسو
رولا : عقبالك يارب يا دارين ، تلحقينا عن قريب وتصيري تنسي متلنا .. !!
بعد ساعه عند صاحباتنا من جديد
دارين : مممممم ما اطيب الاكل زماااان ماااا اكلت برااا !!!
هلا : انا صارلي دهوووووووور ما اكلت براا !! لانوا بعد ما خطبت على طول
الدايت شغاااال !!
رولا : احم احم …. الله يعينك شو خطيبك نيئه ” دقر وصعب ” ،
انا محمود حكالي ما اغير بحالي شي .
هلا ( بمزح وضحك ) : ياالله شو بتغاري مني ومن حمزه ، بس بدك
تتخوتي علينا ..
فقعت رولا من الضحك على طريقه هلا المعتاده في المسخره على تعليقاتها وحكت :
– كيف عرفتي اني بغار ؟؟
هلا : حبيبتي مبين عليكي ، صار لونك اصفر من الغيره
فقعوا التلاته ضحك على بعض ، و فجاه شهقت دارين وهي بتسالهم :
– يييييييييييي انا ما قلتلكم ؟؟؟؟؟؟؟؟؟؟؟؟؟
هلا ورولا بخوف وفزع :
– شو خير ،،،،،، ايش في ؟؟؟؟؟؟
دارين : ايها ب رجع طلبني من بابا ، واياد وبابا كتير اصروا علي اني
اوافق عليه ، وحكولي كتير شغلات عنو ، وبصراحه اكلت بهدله مرتبه من اياد فاحترمت
حالي ووافقت عليه ..
هلا و رولا … فتحو عيونهم على وسعتها مش مصدقين من الفرحه ، وبلشو يحكو
مع بعض … طبعا ما حدا فهم على التاني … ولما الكل سكت ، حكت
هلا بسرعه :
– كييييييييييييييييييييييف نسيت تحكيلنا هيك موضوع ؟؟؟؟؟؟؟؟؟؟؟؟؟؟؟
رولا : ياربي شو فرحتلك يا دارين … !!
طبعا دارين كانت مهيصه رغم الخوووف الي كان معبي قلبها …. هجموا التنتين عليها يحضنوها
وهمي طيرانين فرح انها لحقتهم وحتصير مدام متلهم ……
هلا : لسه هلا بقول لرولا قديشني مقهوره لانك رفضتيه
دارين ( مع طيف ابتسامه ) : سبحان الله النصيب نصيب …
رولا: متى هالكلام صار ، ما قلتيلنا !!!!
دارين : اول مبارح … ومن كتر ما كنت مرعوبه وعم بفكر ، حسيت حالي
مش قادره اخبر اي حدا عن الموضوع
خبطتها هلا على ايدها بحب و وبختها :
– احنا اي حدا يا هبوووله ؟؟
دارين : خلص ما بعرف ايش مالي !!
رولا ( بضحك ، غمزتهم وقالت ) : عادي حبيبتي ، عروس وبلشت
