ولا : احب اقول شكرا شكرا لكل البنات اللي يثروني بالجديد و يشاركوني تجاربهم
ثانيا : اشكر صديقاتي اللي ساهموا ايضا باثبات مدى مصداقيه هالتجربة
لان كثره التجارب تخليني اكتب و انا متطمئنه ، خاصه لما تكون التجربه مالها اي
اثبات علمي
برضو هم مش مستفيدين شيء ، اللهم حبوا يفرحوني فالله يحقق امانيهم ما خذلوني و
بدون ما اسال لقيتهم مجهزين كل شيء ..
هوس الشعر الطويل ~
اكيد فيه كثير من البنات مهتمات بتطويل شعورهم ، خاصه في مجتمعنا العربي البنات يولون
اهتمام كبير بشعورهم و البعض يمكن يزور العطار بس عشان يشتري من هالزيوت ، منها
زيوت طبيعيه متعارف عليها و منها زيوت تجاريه تعد بنتائج وهمية
ما اعرف سبب هوس البنات بتطويل شعورهم هل يبون يجتذبون المعرس هههههه بما ان البعض
يدور عروس شعرها لتحت الظهر ، او هو تحدي بين البنات من شعرها اطول من
الثانيه او امر يتعلق باثبات الانوثه ، تهقون البنات يحبون يطولون شعورهم عشان يرقصون به
و كذا يضربون عصفورين بحجر رقصه مزدوجه مع هزه الشعر و تدخل على طول بقلب
ام المعرس خخخخخ
[ الحين بتقوم القيامه ، مين قالك حنا نبي العرس !! مالت عليك انت اللي
تبين العرس !! ما ينمزح معكم يا بنات حواء نفسيات ] ..
هوس البنات العرب بتطويل الشعر هو اللي يخليهم مايقصون شعورهم حتى لو ذيلت و ماكان
مظهرها صحي ، اهم شيء طويل ، و يمكن البعض يعاني من حرقه الفؤاد لو
قصت شعرها الكوافيره 2سم زياده عن المطلوب ، حتى اذكر ايام الدراسه صديقاتي كل وحده
تخرط ، لو قصت شعرها تجلس تشبر لك ان شعرها السابق كان لخصرها بالرغم ما
عمرنا شفناه كذا ، بس اكيد بنسلك لها بنقول ايه ايه ، ٩٩٪ بالميه من
البنات اللي قابلتهم عندهم قصص خياليه لمظهر شعرهم قبل قصه
[ اللي تعرفني بليز لا تزعل ] ..
anyway اللي اعرفه انه شيء ممكن مكلف للبعض ، سواء كزيوت او منتجات للدهن او
فيتامنيات و مكملات غذائية
– كم راح تدفعين ؟!
لو قلتلكم ممكن تطولون شعوركم ٤سم في ٧ ايام فقط بدون اي تكلفه ماليه و
لا حتى ريال واحد
بكم راح تشترون الوصفه لو كانت معروضه للبيع ؟ هل ممكن تدفعون فيها ٣٠٠ ريال
، ٥٠٠ ، ١٠٠٠ صراحه ؟
من الثمن اللي راح تدفعينه للوصفه يدل مدى عشقك للشعر الطويل
عن نفسي انا مو مهتمه بتطويل شعري لان كثير منكم يعرف اني دايم اقص شعري
مرات بوي و مرات كاريه و امل بسرعه من الشعر الطويل ، لكن مره قصيت
شعري و كانت القصه تجيب المغص خاصه ان طول الشعره ما كان يتجاوز ٢ سم
، وقتها تمنيت شعري يطول بسرعه عشان ارجع اعدلها
اكيد محبات الشعر الطويل متحمسات الحين يبون يعرفون الطريقه !!
يالله ماراح احمسكم زياده و اعذب غريزتكم
وصفه تطويل الشعر ( انفيرجن ميثد ) ~
وصفه التطويل طايحين فيها الاجنبيات و بقوه و بعد مسوين تشالنج ( تحدي ) ،
اساسا الاجنبيات انهبلو الفتره الاخيره حسيتهم صاروا من ربعنا زيوت و خلطات و خرابيط ،
من كثر هوسهم بتطويل الشعر صاروا المحلات يبيعون تي شيرتز بعلامات قياس
وصفتنا من اشهر الوصفات حاليا لتسريع نمو الشعر اسمها : INVERSION METHOD يعني الوصفه الانكشاحيه
، ما اعرف لها ترجمه انيقه بس يعني تقدرون تقولن وصفه الانقلاب راسا على عقب
عاد البليغات في اللغه يالفون لها ترجمة
قبل لاجرب الوصفه اطلعت على اغلب تجارب البنات تقريبا ٩٨% نفعت معهم الطريقه و طال
شعرهم ..
وحده اللي لفتتني بينهم كان شعرها محلوق مكينه و قالت التجربه مانجحت معها و وحده
ثانيه شعرها طال بس بنسبه بسيطه يمكن نصف سم
و كعادتي دائما ماكنت مقتنعه بوجود شيء ممكن يسرع نمو الشعر بهالشكل في 7 ايام
بس ، توقعت النتيجه ما راح تكون ناجحه ، بس حبيت انقل تجربتي
علميا مافي شيء يثبت صحه هالطريقه ابدا و بالمثل مافي شيء يثبت عدم صحتها ،
لكن كثره التجارب الناجحه تشجع خاصه اني مو خسرانه شيء ، يعني الشغله مالها اثار
جانبيه و لا تكلف و لا ريال
لكن التفسير المنطقي حتى لو ماكان مثبت ان هالطريقه تحفز الدوره الدويه في منطقه الراس
مما يسبب زياده تدفق الدم للفره و للبصيلات تحديدا، بالتالي يحفز نمو الشعر
