قصيده ايمان الشعوب من امسيه فزاع
ايمان الشعوب
سرى الليل وسرى صوت المشاعر يا نسيم النود
وعلى الله ما سريت الا وساق الشعر قيفانه
يقولون الشعر وزن و قوافي نبضها مفنود
وانا اقول الشعر حس الخفوق ونبض وجدانه
ويقولون الشعر ضيف على شاعره وانا اعود
اقول الشعر ماهو ضيفنا والناس غلطانه
معزبنا الشعر وضيوفه احنا والسنين شهود
هو اللي سجل التاريخ في صفحات ديوانه
اذا الشاعر على المعنى عجز لا يبلغ المقصود
وش تفيد القوافي لو يركبها على اوزانه
بروق الشعر من معنى ، وتعبيره حنين رعود
ولا تنشف محيطاته اذا نشفن خلجانه
قصيد بين طيات المحاني والضلوع يرود
اذا عدى على القلب الشفوق يحرك اشجانه
امتع به عيون الناقد اللي يعرف المنقود
واحلق به مثل حر فرش للريح جنحانه
اوصله لحدود المستمع لو ماهو بموجود
واسوقه للوطن واهديه للي يعشق اوطانه
مساكم عود .. لا والله مساكم فاق دهن العود
يغار العود من نفحاته و من طيب ريحانه
انا ما جيت لجل الغي الذي قبلي بسيف جحود
واشيد برج عاجي واسكنه واسد بيبانه
لكني جيتكم بشرى سحاب المزن بيض وسود
ابا امطركم غلا من وسمي الخاطر وهتانه
لو اني جيت اصرح .. ما ورا كثر المنابر فود
لكني جيت من شعب بعزمه سابق ازمانه
اماراتي .. وانا افخر باني بدار الفخر مولود
ابا اخدم دولتي لين الجسد تفخر به اكفانه
وابا ارفع طود واكسر طود وارفع طود واكسر طود
وابا اراهن زماني واستفزه واكسب رهانه
يجود بقولي لساني ولي قبله يمين تجود
ومن جادت يمينه ما يشح القول بلسانه
اعسف الصعب من قاف الشعر باسلوبي المعهود
يالين ارفع حراره هاجسي وتثور بركانه
ما دام لكل ثوره نار .. اقول لكل نار خمود
وهي نار الله اللي في دركها طاح شيطانه
يا ربي لا تخليني من اسباب الرجا مطرود
انا عبدك .. لا تحشرني مع الشيطان واعوانه
انا اقسم باسمك اني ما حفلت من السنين صدود
لكن الناس باهل الطيب واهل الجود طمعانه
وانا لولاي احب الدار ما شرفت روس نجود
ولا والله حفلت اللي جمع بالحق بهتانه
احب (القدس ) واتمنى السلام بكل دار يسود
وازور المسجد الاقصى واصلي واسمع اذانه
انا المقصود وان قالوا علامك من هو المقصود
من الطير الوحش لي شاف ربد و قص سبقانه
اذا هبوا فرادى للوطن ما جيت له مفرود
انا لدار المكارم سقت خياله و هجانه
الى ( ابوظبي ) عاصمه البلاد اقود قلبي قود
محبتها تبث الشوق في قلبي وشريانه
على دار الظبي دار المراجل والكرم والجود
سلام يوقف التاريخ له ويثبت اركانه
سلام الله عليكم يا النشامى .. ما عليكم زود
نحن منكم وفيكم والوطن يفخر بفرسانه
نحن يوم اتحدنا ما توكلنا بصف جنود
توكلنا على الله ربنا المعبود سبحانه
توكلنا على الله واعتصمنا باسمه المعبود
وقلنا : يا علم خز السحاب و جر وديانه
ورفرف يا علم دامك على عز الوطن معقود
فداك ارواحنا يا قبله العالم ونيشانه
نحبك يا وطن والمال دونك والعمر مزهود
و لي ما ياخذ بحقك نحن ما ناخذ ايمانه
كرامتنا ما هب حول المساوم .. ما نسوم ضدود
نحن فوق الضدود ونظره الحاسد وحسبانه
نحن من دون وحدتنا وقفنا للزمان صمود
وقفنا و كل حبه رمل تسوى عندنا دانه
وطنا عرضنا اللي ما نطاوع به كلام ندود
ومن يرخص بارضه يرخص بعرضه وعربانه
مدار الشمس يتبع دربنا .. ولنا قبور جدود
اذا مروا على التاريخ فز و شنف اذانه
نهار تفرقوا بعض العرب حنا لفينا حشود
نهز الارض تحت اقدامنا والارض عطشانه
ونرويها من دمانا ، ونكسر هامه النمرود
على غم الحسود وغم نمروده وطغيانه
على بذره محبه زرعها لاجيالها محصود
سقاها ( زايد ) الخير و نمت بالخير رويانه
نمت من كفه الطاهر جنان طلعها منضود
ولا زلنا يالين اليوم نقطف ثمره جنانه
اذا قالوا من المحسود .. قلنا شعبنا محسود
واذا قالوا من اعيانه ؟. نقول العالم اعيانه
لكن بشراك يا ( زايد ) كلام اهل الحسد مردود
ثرانا دونه ارواح التقت وعيون سهرانه
تربينا على العز و تعودنا دروب الكود
وهي عاده الاماراتي .. وعاده كل جدانه
نحن للطيب سقنا الطيب ، وللجلمود حن جلمود
و نحن يشهد لنا الميدان يوم يفوح دخانه
لنا سيف بوجه اللي يعادي دارنا مجرود
دوا من يشتهي يفصل طرف راسه عن ابدانه
لكنا في رخا.. والسيف في يوم الرخا مغمود
ولا نرفع سوى سيف الشعر والفكر ميدانه
وانا من فوق هالمنبر اريد ارفع كبار بنود
واقول بكل صوت انسان في هالدار وانسانه
يدوم العز بايمان الشعوب وحلمها المنشود
لانا في وطن ايمان شعبه يشبه ايمانه
على سبع ( الامارات ) الله اكرمنا بسبع فهود
على مبدا زعيم المجد ويصونون ما صانه
شعور انا نضحي لجل يبقى في العلا موجود
يحسسنا .. بانا نستحق نكون سكانه
على درب الزعيم مؤسس الوحده ابونا العود
حكيم العرب .. راس المجد .. بحر الجود ربانه
على شان المكارم واهلها ( زايد ) بذل مجهود
وجمعنا .. سلام الله على ( زايد ) ورضوانه
يشم الذيب ريحه ويتهيب منه البارود
وهو باول سنينه ما تعلى صهوه حصانه
و لما ساد .. وحد داره وخلا الدروب مهود
و علا من قدر شعبه ورسخ قدر جيرانه
مع السلطان (قابوس) ف ربى (مسقط) كتب لعهود
وصرنا شعب واحد ، من اماراته الى عمانه
وله حشمه مع (ال ثاني) وله حشمه مع (ال سعود)
وله حشمه مع (البحرين ).. بترابه وشطانه
وله في ( سوريا ) مع شعبها قدر ماهو معدود
فجع ( بيروت ) موته واذهل (الاردن ) وعمانه
و في ارض ( اليمن ) تشهد لفضله شامخات سدود
و في ( المغرب ) و في ارض (العراق) صروح بنيانه
و مع ( فلسطين ) له وقفات مجد ذكرها محمود
و مع اهل ( البوسنه ) بالطيب يرجح كف ميزانه
و مع ( مصر ) العروبه واهلها له مكرمات تعود
على ( مصر ) العروبه واهلها بالخير واحسانه
لو ان للنيل درب من ( مصر ) لابوظبي ممدود
سقى قبره وفاضت لين دار العين غدرانه
على كل البيارق ( زايد ) اللي بيرقه في زود
وعلى اهل الجود له زود و على اهل الزود تيجانه
قبل ( زايد ) وعنوان الفخر واهل الفخر مفقود
طلع ( زايد ) .. وعنوان المعالي صار عنوانه
مع اهل الشان م الاحيا ومن هم يسكنون لحود
يظل الشيخ ( زايد ) في الطليعه عالي شانه
و (راشد بن سعيد ) ماسس النهضه حفظ لوعود
وقف ب (دبي ) واهل ( دبي ) لين اشتد عمرانه
بحنكه تذهل العالم ، وفكر ما عليه قيود
وقف ( راشد ) مع ( زايد ) وقوف الاخ لاخوانه
و نحن يوم اجتمعنا كل وفد من وراه وفود
( دبي ) امست مقر الاتحاد بلحظه اعلانه
و تحت رايه ( خليفه ) ريس الدوله نهب جنود
على شان المعادي ع المنايا نعقد قرانه
لا ثار غبار ميدان الوغا دون البلاد نذود
نوقف في الثرى اسد الشرى وفي الجو عقبانه
نوقف دونها والروح ترخص والعدو مضهود
وذا عهد علينا ، والعهد لا عاش من خانه
ابو سلطان .. عز الدوله اللي عزها مشهود
عزيز الراس ، والراس العزيز تعزه امتانه
( خليفه ) عدنا اللي تورد وتصدر عليه عدود
اذا السحب ادبرت عنا ، يوردنا من امزانه
ابو سلطان قايدنا .. ولا نرضى عداه يقود
سمو القايد الاعلى .. سما للمجد سلطانه
سمو القايد الاعلى على اكرام الرجال يسود
نوقف لجله الدنيا .. و نقعدها على شانه
اذا يامر غزينا له .. واذا يامر علينا نعود
على امره ينقلنا من يساره الى ايمانه
ونايب ريس الدوله (محمد) قدها و قدود
بنى مجلس وزارات البلد واختار شجعانه
هو اللي زوج الصحرا على البحر بثلاث عقود
كتب ع الما يالين الما عرف فضله وعرفانه
صنع في البحر معجزته وخلا البحر ينبت عود
وخلا النخل في عرض البحر يختال عيدانه
وخلا اللول والمرجان يتشكل في وسط نفود
كان البر بحر من لاليئه ومرجانه
(محمد).. يوم طاح الاقتصاد وصار فيه ركود
وقف وقفه حكيم وقدم افكاره على سنانه
وقال ان السياسه الخاسره يتبع سببها جمود
ومن يتبع دروب الحرب .. يتبع درب خسرانه
ومن يحكم بعقله هوب مثل اللي حكم بزنود
عشان الزند دون العقل ما له قدر ومكانه
و ذا طبع الليالي نوب تنزل بك ونوب صعود
وكل يمدح الدهر ان صفا له وان عثر .. شانه
و (ابو خالد ) اسد دوله الامارات وحفيد اسود
ولي العهد .. قايد جيشنا لا ثار دخانه
ولي العهد (ابو خالد) و له منا ولاء .. وعهود
نود اللي يوديه .. و نعادي كل عدوانه
دروب المجد غنت لجل (ابوخالد) بلحن العود
ولا زلنا يالين اليوم نستلهم من الحانه
سند حكام دولتنا بوقفاته .. وهو مسنود
بمجد خصه الله فيه دون الناس سبحانه
نظيف من العتب قلبه .. لعز بلادنا مرفود
مع عقل حكيم وراحه بالخير مليانه
حجاجه ينفرد رحمه لكن لا ضاق سم كبود
وهو عون السجين اللي شكى من ظلم سجانه
ونحن والله ل (ابو خالد) فدا يوم المنايا ترود
نراودها عن انفسنا اذا اشر لنا بنانه
توحدنا وباب التفرقه بعزومنا موصود
يالين اهتز عرش المعتدي واهتزت اركانه
وصرنا رجل واحد لكن نقاتل بسبع عضود
نعيش ف بيت واحد ونحمي سوره وجدرانه
عروبتنا اصيله ، وان عطينا ما نبا مردود
ونروي كل كبد من هجير القيض ضميانه
صنعنا للنصر سيف ، و زرعنا للسلام ورود
ولنا روس على حد السحب ماهي بمنهانه
عزيمتنا جمل ياقف وحمله في الظهر مشدود
وتطورنا ما دام انه بدا ، ما نلجم عنانه
نتاجر في المراجل ما نتاجر في ترف ونقود
واصحاب المكارم رابحه ماهي بخسرانه
يموت الرجل فينا وجهه ابيض والليالي سود
حياه الرجل من دون المعزه ما لها خانه
واذا كان الفخر طيب النسب خذ علمي الموكود
اقول العلم ، ولا من قلت علمي جبت برهانه
ابوي الشيخ ابو راشد ( محمد ) والجدود جدود
وخاله ( زايد ) اللي طيب راسه تعب اقرانه
بدون قصور في الساده ولا تحقير في المسيود
باحساس كما ساس الجبال الشم سيسانه
اذا قام ( الفلاحي ) و ( الفلاسي ) ينتخون حشود
مقام بعز ابن مكتوم .. مع هيبه نهيانه
ما دام المجد (ابو خالد) معانا في البلد موجود
نبا نوقف وقوف المنتصر في وجوه عدوانه
محبه .. والمحبه وهبه من الخالق المعبود
ترى ما هو على شاني .. نبا نوقف على شانه
وسرى الليل وسرى صوت المشاعر يا نسيم النود
وعلى الله ما سريت الا وساق الشعر قيفانه
