بنات رجال مايهزهن جبال , صور بنات واثقة من نفسها للفيس
البارحه جاني من الحب مرسال من عقب مابيني وبينه خصيمة
وانا ترى في الحب مانيب فعال ولا بعد ولع بقلبي هشيمه
ولا بعد غنيت في ساعه وصال ولا بعد ذقت الفراق وجحيمه
ولا جرى دمعي على الخد همال ولابعد جربت مر الهزيمة
حتى وردني تالي الليل جوال وانا على شاهي وبسكوت ديمة
الرقم بايخ لكن الصوت قتال كنه مثل صوت المذيعه حليمة
قالت مساء الخير يا طيب الفال قلت ارحبي ترحيبه مستديمة
بالعود والصفرى ودله وفنجال واجبك يا بنت الاصول الكريمة
ردت بضحكه ثم قالت وشالحال؟ قلت اشهد ان الحال عقبك سقيمة
قالت وهي تضحك بعد مثل الاطفال وانا بعد كني بدونك يتيمة
من يوم قالتها تزلزلت زلزال من فجعتي كني مسوي جريمة
قلت ارفعي صوتك ترى مابه ارسال كذاب لكن المصيبةعظيمة
قالت اقول اسمع ترى هرجنا طال ممكن تصاحبني تراني وسيمة
واسمي الحقيقي اول حروفه الدال لكن يسموني البنات الزعيمة
صحيح احب الفخفخه واعشق المال لكن تراني طاهره مستقيمة
ما عندي امغازل ولا لعب يهال ما عندي الا في الشرف والحشيمة
بس الصراحه قلبي لشوفتك مال واصبحت وحدك جالس في صميمه
فكر بعقلك واترك القيل والقال واحذر تطيع اهل العقول العقيمة
وارسل علي الحين خمسميه ريال اشحن بها جوال اختي غنيمة
او طقم غالي فيه خاتم وسلسال اروح به في عرس ولا عزيمة
قلت الحقيقه مانيب رجل اعمال ولاني بتاجر والموارد عديمة
انا الصراحه شبه عطال بطال وعلاقتي بالفقر جدا حميمة
والراتب الله يرحم الحال ما زال محدود والمصروف ربي عليمه
والدين بالالاف والبنك شغال ياكل فلوسي بالربا والظليمة
والسوق طايح والغلا ضيق البال والموت والله صايراكبر غنيمة
قالت تحمل بس والحمل ينشال خلك شديد الباس صلب العزيمة
ياخي تصرف جعلك اتصير نشال اهم شي ان النوايا سليمة
لابد تفهمني على كل الاحوال ما دمت من اهل العقول الفهيمة
قلت ايه والله فاهم اللي على البال لكن ترى هذي علينا قديمة
يا بنت هذا صاير اليوم موال للي تبي تلعب على ابن اللئيمة
يا بنت ما تدرين كم فيه محتال يلعب على الحبلين وانتي غشيمة
يا بنت كم من جاهله دمعها سال من عقب ما جات العواقب وخيمة
والبنت لا اقفى عرضها بيد الانذال والله ما يبقى لها اي قيمة
قالت تبي ولا فخلك على جال مهوب ناقصني نصايح حكيمة
عز الله انك للاسف منت رجال وانك قليل الذوق ما فيك شيمة
يا لعنبواللي ما يسطرك بنعال حتى يعلمك الغزل يا بهيمة
تفو عليك وصكت الخط في الحال مدري تفو هي مدح والا شتيمة
