طريقه عمل اكلات حمام
نجهز الحمام بغسله جيدا ..
انا بيجيلى متنضف وجاهز يادوب اغسله كويس ويبقى جاهز للحشو
ونجهز الفريك (نغسله وننقعه فى ماء لمده نصف ساعة)
والفريك او الفريكه هي حبوب القمح الخضراء (القمح الاخضر) قبل جفافها تحصد سنابلها وهي خضراء
وتعرض للحراره عن طريق حرقها، ثم تجرش لتكون مثل البرغل
فى حله متوسطه نضع ملعقتين سمن .
ثم نضع الفريك ونقلب لنحمره
وبعد التقليب حوالى 5 دقائق نضيف الماء الساخن ..
الماء يغطى الفريك فقط يعنى مش كتير
واضح فى الصوره دى انه الماء مش كتير
ونضع الملح والفلفل الاسود
وحوالى دقيقتين او 3 هانلاقى الفريك شرب كل الماء بتاعه
نخليه على جنب لغايه ما يبرد
الفريك كده استوى نصف سواء او اقل .. لانه هايكمل سوا فى داخل الحمام
وبعد ما يبرد الفريك نبدا نحشى الحمام
وبعد كده نجيب ابره وخيط ..
انا بعقم الابره بانى احرقها على النار وبعدين امسحها بمنديل نظيف ..
ونبدا نخيط فتحه الحمام .. وبخيط الرقبه كمان علشان مايكونش فيه اى منفذ الفريك يخرج
منه
وبكده الحمام جاهز للسلق
فى حله كبيره نغلى الماء .. واول ما يغلى انزل فيه الحمام
ولو لقيت اى ريم ظهر على وش الماء اشيله وبعدين احط بصله وملح وفلفل اسود
وورق لورا والتوابل اللى احبها
وهاياخد تقريبا نصف ساعه ويستوى
وبعدها اطلعه واصفيه من الشوربة
واخيرا احمره فى السمن البلدى او زبده ومعاها ملعقه زيت علشان مش تتحرق
بس طبعا السمن البلدى بيدى طعم الحمام الاصلى ..
واقلبه فى السمن لغايه ما ياخد اللون الذهبى الجميل
ولا تنسى قبل التقديم تشيلى الخيط
