طريقه تنظيف المطبخ بالصور
( 1) يا عيني علي البوتاجاز ودهون البوتاجاز :
حلها بقي
شوفي يا قمر لو عايزه تتخلصي من اي اثار للدهون اللي موجوده على البوتوجاز نتيجه
القلي والتحمير يبقى هاتي اسفنجه فيها مسحوق غسيل وامسحي البوتوجاز بيها وبعد كده امسحيه باسفنجه
مبلله بالميه وبكده يبقى البوتوجاز نظيف من غير اي مجهود ولو عايزه زياده في اللمعان
يبقى امسحيه بورق جرائد مبلل بالميه…
دي كانت طريقة،
فيه طريقه تانيه ودي ممكن تلجئي اليها لو كان البوتوجاز اللي عندك فيه دهون ناشفه
ومش عايزه تطلع يبقى ضعي على الدهون دي خليط مكون من نص كوبايه ميه +
نص كوبايه اي مسحوق تنظيف عندك وسيبيه عليه لمده ساعه وبعد كده ابدئي في تنظيف
البوتوجاز بنفس الطريقه السابقة.
(2) حله المطبخ
من المشاكل اللي ممكن تقابلك وتبقي مش عارفه تعملي معاها ايه مشكله ان الحله يكون
فيها سواد من تحت وعلشان تتخلصي من المشكله دي يبقى افركي السواد ده بشويه ملح
خشن وليمون وبعد كده اشطفيها كويس واغسليها بالصابون وفرشاه خشنه وبعد كده اشطفيها كويس بالميه
وهتشوفي الفرق بنفسك هتلاقي الحله رجعت جديدة.
(3 ) الكوبايات مش بتلمع
من ضمن المشاكل اللي ممكن تقابلك مشكله ان الكوبايات والاطباق مش بتلمع بالرغم من انك
غسلتيها اكتر من مره بمسحوق غسيل فيه ماده ملمعه لكن مفيش فايدة!!!
وعلشان تتخصلي من المشكله دي يبقى بعد ما تغسليها بالصابون حطيها في طبق فيه ميه
فاتره مذاب فيها ملح وسيبيها لمده ساعه وبعد كده اشطفيها كويس قوي وسيبيها على ترابيزه
المطبخ علشان تنشف في الهواء من نفسها واوعي تنشفيها بفوطه المطبخ لانها هتخليها تفقد لمعانها.
اما بالنسبه للاكواب الكريستال فاشطفيها بميه فاتره مضاف اليها قطرات من الكحول الابيض وسيبيها لغايه
ما تنشف من نفسها.
(4) ريحه اللحمه ماسكه في المفرمه باديها وسنانها
حلها ياسيتي ايه بقي
ساعات كتير لما تيجي تفرمي لحمه في المفرمه ريحه اللحمه بتفضل موجوده فيها ومهما تحاولي
تغسليها بمساحيق ليها ريحه حلوه الا ان ريحه اللحمه بتفضل موجوده برضه.. نفس الموضوع ده
بيتكرر لما تيجي تطحني بهارات ريحه البهارات برضه بتلزق هي كمان…
وعلشان تتخلصي من المشكله دي نهائي يبقى هاتي عيش محمص واطحنيه في المطحنه او المفرمه
وبعد كده اغسليها بنفسك واوعدك انك مش هتلاقي اي اثار لريحه الحاجه اللي اتطحنت لان
العيش هيمتص اي ريحة.
( 5 ) الدهون اللي لازقه علي الاخلاط يا ساتر عليها
ساعات كتير بتستخدمي الخلاط علشان تضربي فيه خليط فيه دهون بس للاسف الشديد ساعات الخليط
ده بيلزق فيه وبتبقي مش عارفه تطلعيه ازاي…
وعلشان تحلي المشكله دي يبقى حطي في الخلاط شويه ملح +قشر ليمون +كوبايه ميه سخنه
واقفلي الخلاط ورجي الخليط ده جواه اكتر من مره كويس وبعد كده اغسليه زي ما
انت عايزه وهتشوفي الفرق بنفسك.
(6 ) المعالق والشوك والسكاكين عايزه تلميع
علشان تلمعي السكاكين والمعالق وادوات المائده غير الفضيه يبقى دوبي شويه مسحوق غسيل في لتر
ماء + عصير ليمونه وحطيه على نار هاديه مع المعالق اللي انت عايزه تنظفيها وسيبيه
لغايه ما يغلي لمده ربع ساعة…وبعد كده سيبيه لغايه ما يبرد وبعد كده اشطفي المعالق
او السكاكين بالميه وسيبيهم لغايه ما ينشفوا في الهواء وبلاش تنشفيهم بفوطه وهتلاقيهم بقوا يلمعوا
كانك لسه جايباهم.
(7 ) ريحه البصل وما ادراكي ما البصل ماسكه في لوحه التقطيع
علشان تتخلصي من رائحه البصل والثوم والسمك وغيرها من الروائح اللي ممكن تكون موجوده على
لوح التقطيع يبقى ادعكي لوح التقطيع بنصف ليمونه او حطي عليه طبقه معجون عباره عن
“كوبايه ميه + بيكربونات الصودا “وسيبيهم لمده ساعه وبعد كده اغسليه كويس بالصابون والمية.
(8 ) سيراميك المطبخ مش عايز يطلع اعوذ بالله
علشان تلمعي سيراميك المطبخ سواء سيراميك الجدران او الارض يبقى دوبي فنجان خل ابيض +
عصير ليمون + ملعقه كحول نقي “موجود في الصيدليات” في ميه فاتره ولمعي بيه السيراميك
وهتشوفي الفرق بنفسك.
ولو عايزه ريحه المطبخ تبقى حلوه بعد ما تخلصي يبقى ضيفي الى ميه المسح عصير
5 ليمونات وهتشمي الريحه بنفسك.
(9 ) اسفنجه الحوض بقت مش نضيفه
بعد ما خلصتي غسيل كل حاجه لقيتي ان اسفنحه التنظيف شكلها زي ما يكون قديم
ومش نظيفه ونفسك ترجعيها زي الاول يبقى انقعيها في ميه سخنه مضاف اليها ملح خشن
او بيكربونات الصودا او صابون الغسيل وبعد ساعه اغسليها كويس بالصابون والمية.
(10 ) بقايا الاكل والدهون سدت حوض المطبخ
ساعات كتير البلاعه الخاصه بالحوض ممكن تتسد نتيجه تجمع كميه كبيره من بقايا الاكل عليها
او الدهون وعلشان تتغلبي على المشكله دي يبقى هاتي كوبايه كلور + كميه كبيره من
الميه وضيفيها اليها وافتحي حنفيه الميه السخنه لمده عشر دقائق وكل حاجه هترجع زي الاول
واحسن
