حوار هادئ بين افراد عائلة
الاب مخاطب الابن : تعال وله
الابن و بكل براءه : نعم
الاب : نعامه ترفصك … تعال وله
الابن : ليش شو سويت؟
الاب : سواك ضريب يخلع رقبتك
الابن : شو فيه؟
الام : شاوي يشوي عضمك …رد على ابوك بادب وله
الابن : هوه انا حكيت شي؟
الاب:حكحكوا جنابك بالعصايه اوقف عدل يا حيوان
الابن : حاضر
الام : يحضروا على قبرك ان شالله … لما ابوك يحكي انت بتخرس
الابن : اخرس؟
الاب : ايوه ان شالله خرسه
الابن: ماشي
الام: اجاك مشش بركبك ما تقوم منه انشالله
الابن : مشش ؟؟؟ شو هاذا المشش؟؟
الاب: اما انك قليل حيا ..وبترد على امك كمان ؟ هات العصاي وتعال وله
الابن: انا رديت على امي؟ يمه احكي كلمه
الام: موا يمزع نيعك وله …حكيتلك اخرس
الابن الان اصبح مغلوب على امره ومش فاهم ايش الموضوع وصمت
الاب: اما جيل قليل حيا…احكي وله … مالك انخرست
الابن : شو احكي؟ اذا حكيت بتقولوا عني قليل حيا وبتشوفوني غلط
الام : حيه الي تقرصك انشالله … قلتلك تادب وانت بتحكي مع ابوك
الاب : ايش “بتشوفوني غلط” هاي … شايفنا عميان ولا حول ؟
الابن : لا اله الا الله
الام : الله يوخذك انشالله … يا ريتني خلفت ابن الجيران ولا انت
الاب: انا مش عارف هاذا الولد متى بده يصير زلمه…دايما فاضحني بين الرجال
الابن: طيب شو اعمل عشان تشوفني زلمه ؟
الاب: قلتلك اخرس وله
الابن: يا الله … يا الله … يا جماعه شو مالكوا … شو فيه ؟
الام: اه صحيح انت ليش ناديت عالولد يا زلمه ؟
الاب : بتصدقي يا مره اني نسيت…. نساني شو كنت بدي منه هالكلب
الاب : خلص روح ارجع على غرفتك يا ولا
