كيف اكتب شعر بسهولة
وهي اجتهاد شخصي بحت ابتعدت فيه قدر الامكان عن التعقيد
وابتكرت بعض الامور وكتبت ابيات وقصائد خصيصا لتوضيح بعض النقاط فيه
وستكون مواضيعنا كالاتي :
– كيف تكتب القصيده ؟؟ – ظوابط مهمه للكتابه الشعريه – خطوات عمليه لكتابه الشعر
– الفكره والقصيده – ماهي القافيه ؟! – المفرده واهميتها – الوزن بشكل صحيح
هذه السلسله موجهه لمن لديه رغبه حقيقيه ليتعلم نظم القصيده المقفاه الموزونه
وكذلك سيجد من يجيد الوزن والقافيه مايفيده ولن اطيل اكثر بالمقدمه
وارجو الايبخل احد بملاحظاته اوتساؤلاته كيف ماكانت
وباسم الله نبدا
الموضوع الاول
كيف تكتب الشعر؟؟؟
تحتاج الي:
1- فكره2- مفرده (حاول تكون المفردات اللي تستخدمها سهله ومفهومه ولاتعقد الامور)3- قافيه ( لاتفكر
فيها في البدايه راح تجي بروحها بس بعد البيت الاول التزم علي الاقل بالحرفين الاخيرين
)
4- وزن ( لاتحاتي )
الخطوات:
1- اختر الفكره:
مثال :
( ابي اكتب للمنتدي ومولاقي كلام اقوله)
شلون اصيغ هالفكره ؟!؟!؟؟!؟!
اسال نفسي سوال شنو ممكن اقول؟!؟!
شلون ابدا ؟!؟!؟!
وشنو القافيه اللي اختارها ؟!؟!؟
– اجاوب
اول شي انسا مساله القافيه راح تجي بروحها
اهم شي فكر باللي ممكن تقوله حتا الوزن انساه
وعبر عن اللي بخاطرك !!!!
شلون ؟؟؟!
انت ودك تكتب للمنتدي بس مو لاقي كلام تقوله
قول مثلا :
ودي اكتب لي كلام ومالقيت اللي اقوله ؟؟!؟!!!
بدايه لشطر بيت حاول تكمله بنفسك
المطلوب انك تسترسل بالكتابه بس
لاتنظر للوزن في البدايه
الوزن راح يظبط مع ال******
بس شلون اظبطه من غير تعقيد او التزام بالتفعيله وبحور الشعر مثل
فاعلاتن مستفعلن فاعلاتن
او
فعلن فعلن فعلن فعل
وهلم جره
الاجابه سهله
في البدايه حاول تغنيها واذا جت بالغناء سهله وسلسه
فهي اقرب انها تكون موزونه
وحاول باغاني مثل :
لمني في محجر عيونك لراشد الماجد
او حبيبتي وحيات قلبك وعينك لاحلام وميحد حمد
او اسمحيلي يالغرام لمحمد عبده
او تناسيني بنفس الموعد اللي به ذكرتيني لمحمد عبده
وانا اخترت هالاغاني بالذات لان كل وحده فيهم تخدم وزن معين
ومو بالظروره هالاغاني
الاغنيه اللي تبيها
المهم شيلها بطاروق تفضله وترتاحل
بالنسبه للقافيه
حاول تكون نهايه البيت من حرفين او اكثر
مثال 2 :
(ودي اكتب قصيده في حب الوطن السعوديه)
شلون اصيغها ؟!؟!
انت تحب الوطن؟!؟!
قول مثلا
ودي اكتب لك قصيده حب ياسعوديه وماقدرت اكتب
،،،،،،،،،،،،،،،،،،،،،،لقيت اصعب مواضيع الهوي كلمات في حقك
لاحظ ان الشطر الاول مو موزون حاول اتغنيها
حاول اتغنيها بنفس لحن تناسيني لمحمد عبده
تناسيني بنفس الموعد اللي به ذكرتيني ………….
ماراح تغنيها بسهوله
حاول تصلحها
ابي اكتب قصيده حب ياسعوديه وعجزت اكتب
،،،،،،،،،،،،،،،،،،لقيت اصعب مواضيع الهوي كلمات في حقك
حاول تغنيها وراح تمشي معاك ميه بالميه
او ممكن اقول :
احبك ياسعوديه العز ياتاج الفخر والطيب
،،،،،،،،،،،،،،،،احبك وارخص الغالي وابيع الروح لترابك
وعلي هالمنوال كمل
ولاحظ انك في البدايه ما اخترت قافيه
لكن هالقافيه راح تلتزم فيها بالابيات اللي راح تكتبها بعدين
ملخص الكلام
اختار الفكره واكتبها بطريقتك باي شكل كان
وكمل القصيده كامله مع الالتزام بالقافيه
وفي الاخر حاول توزنها مثل ماوضحت في البدايه
بس
ما ادري اذا كان كلامي مفيد او لا
لاكنه محاوله مني ارجو انها تكون مفيده
واي شي انا بالخدمه
سلسله تعلم الشعر بسهوله :
الموضوع الاول هو :
((كيف تكتب الشعر ؟؟))((1))
الزبده :
بالموضوع الاول تعلمنا شلون نكتب شعر !؟!؟!
طبعا مافيه شي بدون ******
ولا تتوقع انك قريت معلومه خلاص صرت تعرف لا
اسال نفسك لما تعلمت القراءه والكتابه
كم اخذت من وقت و****** علي ماعرفت تقرا وتكتب تمام
( انا عن نفسي اكثر من سنه )
واسال نفسك وانت قاعد تكتب علي الكمبيوتر هالسوال
( هل انا اكتب الحين بالكمبيوتر بنفس صعوبه وسرعه اول مره ؟؟!؟!)
ما اعتقد
لان كل شي مع ال****** يكون اسهل ( حتي كتابه الشعر )
نرجع للموضوع
انا راح افترض انك قريت وطبقت اللي بالموضوع الاول
والنتيجه هنا هي انك الحين تقدر تكتب كلام موزون ومقفي
(هذا طبعا مع ال****** والتطبيق ) !!
لكن
هل الكلام الموزون والمقفى شعر ؟؟!؟!؟!؟!
طبعا لا
مثال علي هالشي
وهي سالفه معروفه عن واحد وفروا له كل الظروف انه ايصير شاعر
وقعدوه بمكان حلو ماء وخضره ووجه حسن وقالوله قول شعر
شوفو شنو قال
وكاننا والماء من حولنا
،،،،،،،،،،،،،،،،،، قوم جلوس حولهم ماء
؟؟؟؟
بالله عليكم هذا كلام ؟؟؟
اللي ابي اقوله ان مو كل كلام موزون مقفي شعر
لان الشعر مشاعر تترجم بصور جماليه واضحه
وانتبه لكلمه واضحه هنا
ولحد ايقولي لا المعنا في بطن الشاعر
لا هالمقوله كانلها مناسبتها وغير صحيحه
المهم
انت تعرف تكتب كلام موزون ومقفي
( وهذا شي خلصنا منه )
وينقصك هنا انك اتعبر عن مشاعرك
واللي يدور براسك وببساطه
وراح يكون هالكلام الموزون المقفي المعبر المفهوم الواضح
شعر
بس ؟!؟!؟!؟!
لا مو بس
في امور ثانيه
( وهذا اللي خلاني اكتب الموضوع )
امور ثانيه لازم الكاتب يحاول يلتزم فيها
وانا اقول يحاول
مو غصب
اتبع الاتي :
1- ابتعد عن الكلام اللي يمس الدين والمقدسات
2- استخدم كلام مفهوم ( يعني مو تدور كلام قديم مو مفهوم وتكتبه)
3- استخدم معجمك الخاص ( راح اشرحها لكم )
4- عبر عن نفسك وبس ( لاتفكر براي الاخرين )
5- لاتناقظ نفسك وواقعك بصوره غلط ( هم راح اشرحها )
6- لاتكرر القافيه
7- لاتكرر الالفاض اكثر من اللازم
8- اكتب وانسا واي فكره تطري علي بالك سجلها ولو بكلام عادي
( هذا اذا مو مستعجل ) .
نقاط شكثر علي الفاضي صح ؟!
( لا موصح )
نبدا من الاول مع الشرح :
1- ابتعد عن الكلام اللي يمس الدين و والمقدسات
واعتقد هذي الوحيده اللي ماتحتاج للشرح
2- استخدم كلام مفهوم ( يعني مو تدور كلام قديم مو مفهوم وتكتبه)
لان البعض يدور وين الكلمه القديمه ويحطها
يا اخي الشعراء القديمين كانوا يستخدمون الكلام الدارج بحياتهم اليوميه
وهذا اللي خلاهم يتميزون
( ماراح ازيد كلام اهنيه لان يمكن اطب )
3- استخدم معجمك الخاص ( راح اشرحها لكم )
لما تكتب استخدم الكلام اللي انت اتكلم فيه لا تتعمد تستخدم لهجه مو لهجتك
ولا كلام مو من بيئتك مثال علي هالكلام
تخيل شاعر
او خل نقول تخيل شاعره مثقفه
وتعليمها عالي وحضريه وفري قالت هالبيت :
كل الاماني غاديه في يميني
،،،،،،،،،،،،،،،مير الظروف القاسيه ضيعتها
علي طول راح تتساءل (ويمكن تشك)
وتقول من وين كلمه مثل غاديه وكلمه مير ؟؟؟؟!!!!!
يعني شفيها لو انها قالت
كل الاماني صايره في يميني
،،،،،،،،،،،،،،، بس الظروف القاسيه ضيعتها
يعني استخدم وابحث في معجمك الخاص وكلامك اليومي العادي
لا ترد لكلمات غريبه عليك
4- عبر عن نفسك وبس ( لاتفكر براي الاخرين )
لما تكتب عبر عن نفسك
وتاكد اذا كنت عفوي وصادق بتعبيرك انه كلامك بيكون احلي
ولكن اذا كنت تبي يقال عنك الشاعر الفلاني
فاقترح انك تترك الكتابه
5- لاتناقظ نفسك وواقعك بصوره غلط ( هم راح اشرحها )
هذي بابداها بمثال وهو
تخيل مثلا ان هالابيات قالها شاعر مليونير او امير ؟؟؟!!!!!!
الموضوع الاصلى من هنا: منتدى الخليج http://forum.khleeg.com/showthread.php?t=101842
شف حالتي فقران والحال دوني
،،،،،،،،،،،،،،، والجسم من زود الفقر زاد سقمه
اقعد مع السكه وانادي عطوني
،،،،،،،،،،،،،،،،،،،، من مال ربي يالاجاويد لقمه
(راح تطق علي راسك وتقول الله يالكذب )
ولحد يقولي المعنا كيت وكيت انا لي الظاهر
وهذا اللي يفترض وانت تكتب تتبعه
يعني
بعد الكتابه الاوليه للقصيده
فكر بمعنا الكلام وتفسيره وبعدين اعتمده
6- لاتكرر القافيه
وهذي واضحه يعني لو عندي بيت شعر مثلا
اقعد مع السكه وانادي عطوني
،،،،،،،،،،،،،،،،،،،، من مال ربي يالاجاويد لقمه
مايصير نفس القافيه بالابيات الثانيه ( عطوني ) او ( لقمه ) !
وان حدث فيكون ضعف
او لاغراض متعمده ومقصوده بس
{ بيني وبينكم هذا مافهمتها هع )
7- لاتكرر الالفاض اكثر من اللازم
لان تكرار اللفض الواحد بكثره يبعث الملل وكانك مو لاقي الا هالكلمه تعيد وتزيد فيها
الموضوع الاصلى من هنا: منتدى الخليج http://forum.khleeg.com/showthread.php?t=101842
يعني مره قول احبك ومره اهواك ومره متيم ومره اشتاقلك
كلها تعبر بطريقه او باخري عن الحب ولكن اللفظ اختلف
8- اكتب وانسا واي فكره تطري علي بالك سجلها ولو بكلام عادي
( هذا اذا مو مستعجل ) .
وهذا من واقع تجربه سو اللي اقولكم عليه وعلى مسؤوليتي راح تصيرون شعراء متميزين
وكان الله غفورا رحيما
