طريقه عمل كيك التورتة
المقادير بالكوب :
6 بيضات مفصول الصفار عن البياض
كوب دقيق الا معلقتين كبار
كوب سكر الا معلقتين كبار(سكر مطحون او ابيض ناعم )
معلقتين مايه دافيه مش سخنه
كيس بيكنج بودر او 3 معالق كبار
معلقتين كبار نشا
ذره ملح يا دوب رشه خفيفه جدا جدا عشان متبانش في الكيك
****************
المقادير بالجرام:
120 جرام دقيق
120 جرام سكر مطحون او سكر ناعم ابيض
20 جرام نشا
6 بيضات مفصول الصفار عن البياض
كيس بيكنج بودر او 3 معالق كبار
فانليا
معلقتين كبار مايه
ذره ملح
********
اولا لازم نعرف يا بنات شويه حاجات بيعتمد عليهم نجاح الكيك الاسفنجي
1- الاواني ) اللي هنضرب فيها البياض لازم تكون ناشفه تماما مفيهاش نقطه مايه ونظيفه.
2- (فصل البياض عن الصفار ) خلو بالكو ان ما فيش نقطه صفار واحده تيجي
علي بياض البيض لان لو ده حصل يبقا بياض البيض مش هيبقا هش خالص وطبعا
كده يبقا الكيكا مش هترتفع وتبقا اسفنجيه زي ما احنا عاوزين وعشان نضمن واحنا بنفصل
الصفار عن البياض اننا منكسرش الصفار غصب عننا وييجي علي البياض ،يفضل انك تفصلي الصفار
والبياض اول ما تطلعي البيض من التلاجه وهو ساقع لانه بيقا متماسك شويه من جوا
وتقدري تتحكمي فيه.
3-(المكونات في درجه حراره الغرفه )لازم يا بنات كل المكونات تبقا في درجه حراره الغرفه
ومتكونش لسه خارجه من التلاجه يعني البيض اول ما تطلعيه من التلاجه افصليه عن بعض
وحطي الصفار والبياض كل واحد في طبق لوحده وسيبيه حوالي ساعه عشان يوصل لدرجه حراره
الغرفه قبل ما تبداي في الكيك ولازم تغطو الطبق عشان البيض بيتجلط لما يتعرض للهوا.
4-(الفرن) افتحي الفرن اول ما تبداي في ضرب البيض عشان يوصل للدرجه المطلوبه علي بال
ما تكوني انتهيتي من عمل خليط الكيك.
5- (نخل الدقيق ) لازم تنخلي الدقيق 3 مرات بمنخل او مصفاه سلك مرتين قبل
ما تبداي عمل الكيك والمره الثالثه وانتي بتضيفي الدقيق علي الصفار تنخليه وانتي بتضيفيه .
6-(السكر )مهم جدا ان السكر يبقا ابيض وناعم جدا شبه سكر الاسره كده او مطحون
ولو السكر مطحون يبقا لازم يتنخل زي الدقيق برضو.
7-(الصينيه ) مهم جدا الصينيه تكون جوانبها مرتفع قوي يعني اقل كده من ارتفاع الحله
بشويه صغننه ولو مش متوفر عندك يبقا ممكن تحطي جواها ورق زبده توقفيه من جوا
حوالين الجوانب بحيث تعملي بيه جوانب عاليه للصينيه زي دي كده
.ويفضل طبعا تفرشي الارضه ورق زبده بس لو مش متوفر خلاص ممكن ورق فويل ولو
مفيش خلاص ادهنيها زبده وذقيق .كمان كميه الكيك المفروض تبقا تلت او نصف ارتفاع الصينيه
بالكتير لان لو اكتر من كده هترتفع جدا وتفور او هتهبط تاني .
8-(مضرب البيض ) لازم بعد ما نضرب الصفار نغسله وننشفه كويس جدا عشان لو فيه
مايه او رطوبه البياض مش هينفش كويس والافضل نشفيه بمناديل عشان تضمني ان مفيش فيه
نقطه مايه .
يلا نبدا بقا احلى ابتسامة
الطريقه-
****
افتحي الفرن علي درجه حراره 200 سليزيه او 375 فهرنهايت.
*هنضيف البيكنج بودر والنشا للدقيق وننخله مرتين ونسيبه علي جمب .
السكر لو مطحون هننخله برضو مره واحده ونسيبه علي جمب ولو ناعم خلاص متنخليهوش.
اضربي صفار البيض لحد ما تحسي ان لونه بقا فاتح قوي زي البيج او الاصفر
الباهت قالب علي ابيض كده هو تقريبا بياخد خمس دقايق ضرب بالمضرب الكهربائي واطول الضعف
تقريبا لو بالمضرب اليدوي.
ابداي الضرب بالسرعه البطيئه دقيقه وبعدين علي السرعه خالص.
لما لونه يفتح خفضي سرعه المضرب وابداي ضيفي نص كميه السكر للصفار معلقه معلقه ولما
تخلصي نص كميه السكر زودي السرعه تاني واضربي وضيفي 3 معالق مايه والفانليا واضربي دقيقه
ووقفي .
اغسلي المضرب ونشفيه كويس جدا واضربي البياض مع ذره الملح (ابدائي بالسرعه المنخفضه دقيقه وزودي
بعدها السرعه ولما يبقا البياض عامل زي رغاوي الصابون كده خفضي السرعه وضيفي باقي كميه
السكر معلقه معلقه ومتضيفيش معلقه سكر الا لما اللي قبلها تختلط كويس بالبياض .
لما تخلصي كميه السكر كلها زودي السرعه للاخر وكملي ضرب لحد ما تحسي ان المضرب
بيعمل علامات في البياض وانتي بتضربي (علامات شبه التموجات البارزه كده ) عشان تعرفي ان
البياض كده جاهز اقلبي بشويش الطبق لو لقيتي ان البياض مبيتحركش منه ومش بيقع يبقا
كده تمام .
ابداي ضيفي بقا الدقيق للصفار معلقه وقلبي معلقه وقلبي (تضيفي الدقيق عن طريق المنخل او
المصفاه مش تحدفيه كده علطول عشان ميهبطش الصفار .
تحطي معلقه دقيق في المنخل وتنخليه علي الصفار وتقلبي من تحت لفوق في اتجاه واحد
نص دايره فقط وبالراحه عشان الهوا ميجرجش
.
لو حسيتي ان الدقيق والصفار تقيل ومش عارفه تقلبي كويس ضيفي معلقه او اتنين من
البياض عليهم وقلبي ده هيساعدك علي التقليب .
،كل ما تحتاجي اعملي كده بس خلي بالك مش عاوزين ناخد من كميه البياض كتير
عشان نحتفظ بالهوا اللي فيه وهنضيفه في الاخر خالص .
خلصتي كميه الدقيق خلاص ؟ضيفي البياض علي 3 مرات بس بالراحه خالص وقلبي بشويش (الغرض
من التقليب ان الخليط يتجانس فقط يعني بلاش ضرب جامد عشان ميهبطش والهوا يطلع منه
.
صبي الخليط في الصينيه المدهونه او اللي فيه ورق زبده بالراحه ودخليها الفرن في الرف
الاوسط العشر دقايق الاولي علي درجه حراره 200 وبعد كده هديها 180 لحد اخر النص
ساعه ومتزوديش في الفرن ابدا عن 40 دقيقه اقصي مده.
ده في حاله لو اختبرتي الكيك بعد نص ساعه ولقيتيه مستواش ؟(اختبري الكيك بعود خله
اسنان او عصي الشيش طاووك او سكينه رفيعه).
اطفي الفرن وسيبي الكيك في الفرن خمس دقايق وبعدين خرجيه في مكان دافي ممكن جمب
البوتاجاز من فوق عالرخامه وبعد شويه اقلبيه علي منخل سلك يبرد.
يفضل متقسميش الكيك للتزيين والحشو الا تاني يوم لان الكيك بيكون خارج من التلاجه بارد
وبينقسم بسهوله ومن غير فتافيت .(حددي علامات بالسكينه علي جوانب الكيك ودخلي فيها الخيط وبعدين
شدي الخيط معكوس زي الصوره كده هيتقسم معاكي مظبوط وبسهوله.
.
عند الحشو جهزي قطر عشان تسقي منه الكيك وتكون طريه وجميله .
مقادير القطر :
******
كوب ماء نصف كوب سكر وفانليا
حطيهم علي النار ولما يغلو سيبيهم بعد الغليان 10 دقايق واطفي عليه
ومتزوديش القطر قوي في الكيك عشام ممكن يتهري الغرض منه يخلي الكيك طري فقط .
وكملي تزيين الكيك من ابداعك .
(الكريمه اللباني في حشو الكيك تحفه بجد خصوصا لو مزودتيش ليها السكر بتبقا كاناها قشطه
لكن في التزيين الخارجي نتيجتها معجبتنيش.
