صور وخلفيات فيس بوك الحداد
الجزء الاول
شعرها متناثر على عيونها و الدموع على خدودها شكلها روعه
ساره جالسه بزاويه في غرف من غرف المستشفى وما تبي تقعد على السرير وطول الوقت
تبكي بحرارة
مابقى دكتور او ممرضه الا سالوها من انتي وين اهلك ووين ساكنه وساره ماتقدر تنطق
ولا باي كلمه وحده وش تقول لهم وهي ما تذكر ولا شي
” اخذت ساره تسترجع الاحداث الي مرت فيها وكيف وصلت للمستشفى فاقت من الاغماء ولقت
نفسها مرميه على حفنه تراب وصارت تمشي واتضح لها الانوار من بعيد انوار الطريق وصلت
ولقت ناس يصلون على جنب الطريق كانت عائله مصريه من اب وزوجته وعيالهم جايين من
الشرقيه للرياض شافتهم ساره وراحت تبكي تبيهم يساعدونها الاب خاف شاف فتاه تحمل جمال غير
طبيعي وعبايتها شبه مقطعه وجهها عليه غبار اسود
خاف احمد من تحمل المسئوليه وسالها من وين جايه لكن ساره ما تذكر شي ورفض
يشيلها ويوديها معاهم
وزوجته تناظرها وتترجاه بس احمد مصر على رايه ورافض يشيلها يا بنت الناس دي حتسبب
لينا مشكله حنا في غنى عنها هنا اغمى على ساره وماقدر احمد الا ان يوصل
ساره لمستشفى العسكري بالرياض وباقي الاحداث تعرفونها ”
راحت الايام ورجعت لساره عافيتها كما سمتها ام محمد هذي ” امراه كريمه دائما تزور
المستشفى وتنفق على المرضى ماجا عليها اولاد لانها كانت عقيم شافت ساره ورحمتها من كثر
بكاءها وحالتها الي تقطع القلب فطلبت ام محمد من اداره المستشفى ان ساره تعيش معها
الى ان ياتي احد يسال عنها
ام محمد تعيش بفله كبيره هي وزوجها عبد العزيز رفض ان يتزوج عليها رغم محاولاتها
تزويجه ودايم تلح عليه يتزوج لكنه
رافض حتى التفكير بالزواج ويقول انتي يام محمد عندي بالدنيا كلها ما تصور لي زوجه
غيرك ”
………………………………………………………………………………
ام محمد : تعالي يمه ساره ادخلي لا تستحين الحين البيت بيتك من اليوم واعتبري
نفسك فيه راعيه محل وحنا ضيوفك
ساره وهي تمشي وحامله هم الدنيا على راسها : تسلمين ياعمتي مدري وش اقولك او
وش اسوووي وقعدت تبكي
ام محمد والدموع في عينها : ساره الدموع هذي مابي اشوفها من اليوم ورايح ابي
بدالها الضحكه ماتفارق شفايفك والله يوفقك يابنيتي ويسعدك
ساره وهي منهاره وتصيح :صعب يا عمتي صعب اني اضحك ابتسم افرح وانا مدري منو
انا وين اهلي بس احمل اسم حتى مو اسمي الحقيقي وين ابوي وين امي وش
الي وصلني للوضع هذا وتبيني ياعمتي اضحك كيف اضحك كيف اقدر اشوف الناس اذا سالوني
منو انتي وين اهلك صدقيني ياعمتي صعب لكن ما اقول الا الله يقدرني على رضاك
ياعمتي ولا تشووفين مني ماتكرهينه ان شاءلله وضمت ام محمد وجلست تبكي وتبكي ام محمد
معها
ام محمد تواسيها : اسمعي يا بنتي الدنيا مليانه هموم همك ارحم من هم غيرك
شوفي الي حولك وراح تدرين ان ربي راضي عليك سخر الي حولك لك المصايب في
الدنيا كثيره غيرك مو لاقي بيت يحتويه اكثري من الحمد يابنيتي والاستغفار وبتشووفين النتيجه باذن
الله
ام محمد : ميري ميري تعالي يمه ودي ساره لدارها خليها ترتاح وانتي ياساره اذا
اذن العصر تجهزي ترى بوديك لسوق تشترين الي ناقصك
ساره مفتشله من كرم ام محمد : ماتقصرين ياعمتي ماخليتي شي الا وجبتيه لي مدري
شلوون اشكرك
اكتفت ام محمد ببتسامه دائما تشعر من امامها بالخجل من كرمها
راحوا للسوق واشترت كل نواقصها ماخلت شي الا وشرته حتى الله يكرمكم الشباشب
ودتها لغرفتها ورتبت كل اغراضها وجلست على السرير ترتاح من تعب السووق وقعدت تحاول تتذكر
لكن ماقدرت يارب مدري امي عايشه لو كانت عايشه هي مثل ام محمد بحنيتها وكرمها
وابوي وش يسووي الحين انا لي اخوان او لا وقعدت تبكي صعب على الانسان يعيش
مجهول الهويه مايتذكر وش اسمه كيف تربى وش ماضيه اشياء تدور في راس ساره تحاول
تدور لها حل
طق طق طق دشي
ساره تتوضى في حمامها تبي تصلي المغرب جتها ام محمد :
يابنتي بكره ترى عزمت خواتي وعيالهم ابيك تتعرفين عليهم وتستانسين مع البنات
ساره انحرجت كيف تستقبلهم ماتدري راح يتقبلونها او لا : ابشري ياعمتي بالي يسرك
ام محمد لها ثلاث خوات واخووين
خواتها الجوهره الكبيره والكل يحترمها وعيالها سعود الكبير وعمره 27 سنه وماتزوج انسان جدي راعي
شغل ماعنده وقت للحب ولا للخرابيط على قولته يشتغل مدير في شركه من شركات ابو
محمد وماسكها وبعدين اخوه عبدالله عمره 25 هذا دمه خفيف يموت في شي اسمه كووره
موته الهلال وياويل احد يقول فيه كلمه مخلص جامعه قسم محاسبه ولا لقى وظيفه ماغير
سهر ونوم ريم اختهم الوحيده عمرها 22 تموت في شي اسمه كتاب دايم تحب تتهاوش
مع اخوها عبدالله اذا تبي تقهره تسب الهلال وهات ياهواش واذا جا سعود يسمونه هادم
اللذات ومفرق الجماعات تلاقيهم هادين ويتهامسون همس ” طبعا مسمينه كذا لانه مايخليهم يسهرون ولا
يشوفون التلفزيون لوقت متاخر ” بس ريم تموت عليه وتدلع عليه كانه ابوها الي توفى
من يوم ماكانت صغيره ولا شافت الا سعود قدامها رباها ومايحب يشووف دموعها دايم يقول
دمعتك ياريم غاليه مابي اشوفها
صيته هذي اخت ام محمد الثانيه لها بنتين وولدين غاليه اكبر بناتها وعمرها 26 ومتزوجه
وعندها ولدين تؤم راكان وريان عايشه مع زوجها بجده واهلها بالرياض
بعدها مها عمرها 22 صديقه ريم وتموت فيها ودايم مع بعض ابد ماعمرهم شافو مها
بدون ريم ولا ريم بدون مها مها انسانه حساسه تحب الشعر تموت في شي اسمه
عبدالله ودايم تسئل ريم عنه وهو مايدري انها تحبه
خالد عمره 24 سنه خطيب دانه بنت خالته نوره مايعرف اي شي عن دانه الا
انها بنت خالته وتدرس ادب انجليزي سنه ثالث
ماجد 22 هذا مطفوووق يحب شي اسمه هجوله وتفحيط سيارته عليها علامات تحدي سيارته يغبرها
دايم
نوره اخت ام محمد الثالثه عندها تركي عمره 27 وصديق سعود الروح بالروح ونفس افكارة
ودانه عمرها 23 خطيبت خالد
اخوان ام محمد سعيد وهو الكبير وعياله طلال وعمره 27 مغرور وشايف نفسه الى ابعد
حد ويموت في شي اسمه بنات ينسى نفسه اذا شاف عبايه سودا لكن علاقاته مختصره
على التلفون بس
فهد 25 ملتزم هادئ داعية
روان عمرها 19 تموت في شي اسمه كوره دايم صور الاعبين معلقه بغرفتها ويموت فيها
ابوها وااوامرها مطاعه عنده دايم اهي وماجد يتطاقوون من كانو بزران
اخو ام محمد الثاني عادل توفى وهو صغير وموته اثر على سعود وتركي لانه صديقهم
وصارو يكرهون شي اسمه تطعيس لانه مات وهو متحاد مع ولد جيرانهم
