العلم بحر لا ساحل له
امعنت في معنى ومفهوم الاحسان
حتى امطرت وسمي بصدري وصيفي
وسهرت لين اقبل مع الصبح الاذان
وذبحت له شيطان واكرمت ضيفي
هذا وانا مذنب . وعاصي . وغلطان
وغاوي … ومغويني على الغي كيفي
لكن على ايه حال انا اظل انسان
واعكس ثقافه مايدور.. ابمضيفي
ساكت .. لكن لي جرح موهل وفتان
يفضح سكوتي .. ما نطقبه نزيفي
تناقضي رحمه .. وكتماني اذعان
ل اشياء اكبر من حروفي وسيفي
راح العمر وفلان .. ما عاده فلان
وللحين انا هذا.. وهذا رصيفي
محطم ومكسور ترقه وجنحان
ومرهق واحس بثقلي وثقل حيفي
والظلم بالدنيا له اشكال والوان
ولا اظلم من المظلمه من وليفي
اشوف بوجيه الرغبات خذلان
وجثمان حلم كان دايم .. حليفي
من العدل تتساوى الاسائه بالاحسان
في ذا الزمان اللي غموووضه مخيفي
ومن الخيانه اني ابات شبعان
ويموت جوع وقل حيله رديفي
اذا رغيفي جبته بفرد ذرعان
باكر تجي ذرعان تاخذ رغيفي
انا اشتراكي طبع وبحث عن امان
ياخذ من المستضعفه للضعيفي
مانيب طالب علم طلاب الايمان
وذخرت له دمعه وقلب نضيفي
العلم بحر واكثره لابن فوزان
وخلا سواليف الضحى للعريفي
