شعر عن اليوم الوطني للمملكه العربيه السعودية
يا وطنا دام عزك شامخ والدين سيرة
……………… مارضينا غير ارضك نسكن ونعشق ثراها
انتمي لك والفخر لي شخص وارضه جزيرة
……………… من يلوم اللي يحبك ام وتغلي ضناها
يالسعودي بس اسمك لا لمع في كل ديرة
……………… والله انه تاج اكبر من على هامه سناها
شعب ودستور وامه ترتوي من فيض خيره
……………… لا عدمنا من حكمنا ولا نسينا من بناها
من شمالك لي جنوبك كل شبر فيه غيره
……………… حاسدك ربي يعينه مادرى انه ما نساها
يحتمي بك رغم غيضه اه ياشين البصيره
……………… وين ماترحل عيونه يرجع ويذكر سماها
كل حرف لا كتبته غير اسمك استشيره
……………… وين يا كلي تمهل ارفق ولملم حلاها
ايه احبك يا بلادي دون شك ودون حيره
……………… كل عرق لا نشدته قال ينبض من غلاها
يا فديتك بالمشاعر والا روحي لك ذخيره
……………… ما تردينا من اول كيف لاجت في سواها
يحفظك رب كريم من صودايف عسيره
……………… يا منار الحق للي ضاعت حقوقه لقاها
دام ابو متعب يقودك سيري دروبك يسيره
……………… والمواطن في يمينه خط ما نبغى سواها
ايه احبك يا بلادي دون شك ودون حيره
……………… كل عرق لا نشدته قال ينبض من غلاها
يا فديتك بالمشاعر والا روحي لك ذخيره
……………… ما تردينا من اول كيف لاجت في سواها
يقول الامير خالد الفيصل:
لاح يوم الوطن والعز لاح
وكلمه الله على البيرق تلوح
يوم الاسلام يا يوم الفلاح
والوطن كل روح له تروح
فوق الايمان ركبنا السلاح
والمقابيل بالخافق تبوح
الله اكبر مثل ضرب الرماح
سيلت في خفى الباغي جروح
**
ومن رائعه اخرى للوطن حيث يقول:
غنيت حبك يا وطن
ولثمت بحروفي سماك
وعشتك اكثر من زمن
وسقيت من عروقي ثراك
انت الابو وانت الولد
وانت التغرب والبلد
وانت الشدائد والرخا
اموت وتاريخك خلد
عنيت حبك يا وطن
نبعك شرابي في الحياة
يا نشوه العز وهواه
لاجلك لو كفوفي تذوب
امشي على جمر الغضاه
وفي الوطن ايضا يقول:
البست شعري غتره وبشت وعقال
وخليت تغريب المذاهب لغيري
في ساحتي للفكر مليون منهال
وبحري بمكنوز المعرفه غزيري
**
ومن رائعه اخرى يقول:
ارفع راسك انت سعودي
طيبك جاوز كل حدود
مالك مثيل بالدنيا
غيرك ينقص وانت تزود
فارس واجدادك فوارس
واصبحت لبيت الله حارس
مغروس بالمجد وغارس
في ميدان العز شهود
علمك غانم وجارك سالم
يخشى من هيبتك الظالم
راعي صمله دايم والم
سيف وقلب وفعل زنود
الى ان قال:
فهد القايد فهد الرايد
فهد الصقر الحر الصايد
والعيد بفضل الله عايد
وسعودك يا وطن سعودي
**
وفي قصيده اخرى يقول:
نحمد الله تعافا شيخنا
وارجهنت قلوب المسلمين
زان حاله وزانت حالنا
طاب واليوم حنا طيبين
والفرح عم كل بلادنا
والغلا يا عرب لازم يبين
يا ملكنا فدتك ارواحنا
اشهد انك على شعبك امين
طول الايام بجهاد وعنا
جعل عمرك على الطاعه سنين
فوق الامتان ناقل حملنا
ما تراخيت يالحصن الحصين
تسهر الليل همك عزنا
تقدح الفكر والراي الرزين
واستنارت برايك دارنا
واستقامت على الدين المكين
**
وللامير نواف بن فيصل بن فهد قصيده تقول:
نجد شمس العرب والجزيرة
نحمد اللي على حبك فطرنا
يا وطنا كلنا لك ذخيرة
لانوى الباغي بك الشر ثرنا
من ورا شيخ يقود المسيرة
وتحت راياته مشينا وسرنا
المليك اللي الملا تستشيره
ابو فيصل عزنا مع فخرنا
سيفنا للحق دايم نعيره
والخطر يحفل الى اقبل خطرنا
نفتخر بامجادنا بكل سيره
في مضارب بدونا وفي حضرنا
**
وهذا مهندس الكلمه الامير بدر بن عبدالمحسن في احدى قصائده يقول للوطن:
عزنا للاسلام هو غايه فخرنا
فيه سر وجودنا ونموت دونه
ارضنا ارض الذهب وانقى المذاهب
والرجال اللي عهدهم يحفظونه
هم عهدنا ما قروا التاريخ والا
قد قروا التاريخ لكن ما يبونه
**
ومن قصيده اخرى يقول:
الله الاول وعزك يا الوطن ثاني
لاهل الجزيره سلام وللملك طاعة
حنا جنود الحرس للقايد الباني
رمحه,, ودرعه وكف الشيخ وذراعه
مثل السيوف البواتر وان جنى الجاني
يضرب بها ارقاب من بالدار طماعه
من بان عبدالعزيز وصبحنا باني
ما عاد نقبل ظلام الليل لو ساعه
في السلم يشهد لنا عمرا الاوطاني
وفي الحرب لا رواحنا للموت بياعه
حنا سياج الوطن عن كل عدواني
والجيش والامن ساري العز وشراعه
**
ومن رائعه اخرى يقول الامير بدر بن عبدالمحسن:
ارفع الراس يا الحر القطام
واكثر الحمد,, للي صانها
انت فالمجد لك راس السنام
وعزه الناس من اوطانها
انت الاول الى سل الحسام
وقالوا الخيل من فرسانها
الفخر لك ولا تسمع كلام
لا يهمك حكي عدوانها
ديرتك من عشقها ما يلام
ويغصب الله على من خانها **
*
**
كما يقول الامير سعود بن بندر بن محمد يرحمه الله:
مشتاق لك يا كل ما في بلادي
شوق الرياض للسيل وادي حنيفه
رغم الفراق وطول وقت البعادي
حبك يزيد ولهفتي لك عنيفه
ولهان لك وله الحضر والبوادي
لخضره ربيع ضاحك الوجه ريفه
عطشان اشوفك مثل ما كل وادي
ثراه ظامي للحيا عقب حيفه
يا نجد لك منزل بداخل فؤادي
يشبه جبال طويق هاك المنيفه
يا ليت والله ديرتي في مرادي
اوليت قلبي دايم يطيع كيفه
لو هو بودي ما يطول ابتعادي
ليالي الفرقا تراها مخيفه
**
ويقول الشيخ محمد بن ابراهيم الوافي :
رايه الاسلام بالعز منصوره
ودوله التوحيد بظلال قايدها
شرعنا الاسلام من عهد اخو نوره
البلاد اللي على الشرع وحدها
من بحر جده الى راس تنوره
ومن ورى الخرخير لطريف حددها
الامام اللي مساعيه مشكوره
سيره المختار جاهد وجددها
بعد ميه عام من وضع دستوره
كل شبل سيره الليث جودها
يالله انك تسقي العود وقبوره
واحفظ الباقين في عز وايدها
اسره في نصر الاسلام مشهورة
السعود الله ينصره يساعدها
يا ذري الشعب السعودي ويا سوره
الولايه والعهد لك نجددها
يالبلاد اللي على الخير مفطوره
ما احد ينكر جهودك ويجحدها
اسمها يعرف على كل معموره
حاكم كل المشاريع شيدها
نهضه بالمملكه صارت اسطورة
والمعارف صار بالعلم رايدها
المعارف اول انتاج باكورة
بصمته في كل حاجه تقلدها
في سماء مكه وطيبه طلع نوره
شامخ في خدمه الدين يجمدها
دارنا في كل الاقطار مذكورة
وكل مسلم يحترمها ويقصدها
ما احد سوى سواته ولا دوره
سيرته بالخير كل يرددها
الفهد واخوانه الفعل والصوره
ما نحصر افعالهم لو نعددها
امر ناشورى وراضين في شوره
ومملكتنا في ولانا نعاهدها
من نوى تخريبها تقصر شبوره
يحترق في نارنا اللي يهددها
من يجرب حربنا يقصد شعوره
والله انه لو سلم ما تعودها
**
**
وفي احدى القصائد يقول الشاعر احمد الناصر الاحمد:
زان القصيد وقيمت الشعر لازان
انك على اللي يعشقونه تذيعه
يقولها الي عارف كل الاوزان
نظم الشعر عنده من الله طبيعه
جال النظر والفكر في كل الاوطان
والله ما يوجد بكل الوسيعة
دوله سحابه خير واشجار امان
دوحه رخا في ظل حكوم الشريعه
اعني السعوديه لها المجد عنوان
معروفه في منزلتها الرفيعة
الشعب والقاده يعلون الاركان
كل الوفاء بارض الجزيره جميعه
ان جيت لداخل ولا الشعب فرحان
وان رحت بالراء شفتها بالطبيعة
**
ومن رائعه اخرى يقول:
همست كتاب للاحبه رقيقة
من خاطر يهو القصائد والاشعار
هذا الوطن للمجد وجه طريقه
واجب علينا نغرس الدرب بازهار
ذخر مشاريع الوطن بالدقيقه
كثر الدقايق عندنا انجاز واعمار
**
ويقول الشاعر خلف بن هذال العتيبي:
يا لله بامانك من النكبات تامنا
والدار بحماك تمنها وتامنها
لاوامر القايد الاعلى تمثلنا
ارواحنا في سبيل الله نعربنها
بقياده الفهد شلنا الصوت واذنا
على المنابر تلج بنا ماذنها
**
ومن قصيده اخرى:
يا بلادي يا ملاذ المستجير
يوم اشوفك فيك شي من الخيال
جوهره حصباك ورمالك حرير
الطبيعه صورت فيك الجمال
فيك نجد وفيك مجد وفيك خير
وفي جبال طويق للاجي ظلال
ومن قصيده الحميدي الحربي والتي تقول:
الفكر حلق جاوز السحب يجتال
بافاق مجد ديرتي تنتمي له
صافح وهو في هاله الفخر يختال
حقايق صافي الذهن تستميله
قرا حروف جسدت صدق الافعال
بقصه كفاح اللي غزا قبل خيله
عبدالعزيز اللي بلا ند وامثاله
من فجر ميلاده لساعه رحيله
عبدالعزيز وخير ما عنه ينقال
هو معجزه جيله وما بعد جيله
سن الطفوله عاشه بعقل رجال
عن اللهو هو مات فكره تشيله
الى ان قال:
رايه براسه,, ما تردد ولا سال
وش كثر عدوانه,, وويش اتعبي له
من السيف غرب ما تسمع للاقوال
كن المسافه كلها تنطوي له
هجد,, وصابح طيبه الحال والفال
بفتح الرياض اللي بها طال ليله
وبدت زلازل تصفق الجال بالجال
واهتزت عروش باهلها ثقيله
لين احكم القبضه عقب كر وقتال
وكل تبرا من عمله وعميله
طاعوا وصارت وحده مالها امثال
فيها الولا للدين قبل القبيله
ثم الوطن واللي لغيم الجهل زال
رفع سراج العلم واشعل فتيله
