قصص مغامرات اكشن للقراءة , قصة ضحكات شريرة وسافلة
مريض بالمستشفى كل ما يطلع احد من عنده يضحك
(( قصه طريفه و واقعيه ))
جلس ذلك الرجل على السرير الابيض …
في احدى المستشفيات في بلدنا الحبيب .
وكان كل جسمه شاش ورجلينه كلها جبس
وما تسمع الا الاهات
ماغير يحن ويون من الاوجاع اللي فيه
عاد انا قلت يمكن انه مسوي حادث قوي
او انه محترق او او او … الخ
المهم جت الساعه 4 العصر
وبدا وقت الزياره
انا استغربت من شي غريب مره
كل من جاء يزور هالشخص يطلع من عنده ميت من الضحك
انا جاني الفضول وقلت وش السالفه ؟
وعلى هالحال كل من جاء وسلم عليه ما تسمع الا ضحكهم من وراء الستاير
انا قلت لازم اعرف وش السالفه …
انتهى وقت الزياره
وانقز له على طول !
واتشافا له واقوله الحمد لله على السلامه
عسى ماشر ومن هالكلام
وانا كل همي اعرف ليش يضحكون ؟
المهم قلت له : انا اشوف اللي يجونك ما يرحون من عندك الا و ضحكهم
واصل اخر المستشفى !
قال لي : هههههههههه ليش عاد انت حاسدنا على الضحكه ؟
قلت له : لا ياخوي مو كذا السالفه والله لو عندك مليون كان يمكن احسدك
!
بس اضحكوا عادي خذوا راحتكم بس بغيت اعرف السر يعني ؟
اذا ما عندك مانع .
قال لي : طيب ولا يهمك … انت مثل ما تشوفني مكسر ومربط بالشاش .
قلت له : ايوه والله … الله يشفيك .
قال لي : يا طويل العمر انا ساكن في شقه في الدور الثاني ، وعندي
بلكونه مامن زينها ،
واذا نمت فتحت باب البلكونه وطفيت النور وتسدحت على السرير .
ويوم نمت على السرير . وغصت في اعماق اعماق نومي ،
حلمت اني في يوم القيامه ! وحلمت مثل ما تقول ان الناس في مكان مثل
موقف الباصات
وفيه باصات رايحه للجنه وباصات رايحه للنار !!!
المهم الجماعه ينادون بالاسامي .. فلان بن فلانه باص النار … فلان بن فلان باص
الجنه ..
وهكذا …
فلان بن فلانه .. هاه هذا اسمي .. وقلبي يدق و يدق .. روح باص
الجنه .. اوووه الحمدلله ارتحت .
ومشيت ادور على الباص اللي مكتوب عليه الى الجنه … وحصلته ودخلت فيه .
مشينا بالباص وبعد فتره جاتنا لوحه مكتوب عليها
(( الجنه 50 كيلو )) ، (( النار 100 كيلو ))
وهذا وحنا مع اللوحات .. والله ونتعدى الجنه … قلت يمكن السواق يعرف مكان لباب
ثاني .
شوي وشفت النار 15 كيلو … وبعد شوي النار 10 كيلو … وكل شوي نقرب
من النار .
يا رجال وش السالفه .. المشكله الناس ساكتين وما احد قلقان في الباص الا انا
.
قلت بدخل عالسواق وشفته معطيني ظهره … هي انت وين رايح ؟
قال لي بدون ما يلتفت : رايح النار يا حبيبي .
قلت له : انا من اهل الجنه .. وليش توديني النار يا وجه النحس ؟!
والتفت لي … طلع هو ابليس !!!
الله يلعنك . انا من اهل الجنه .. يا ملعون لا توديني النار .. انا
من اهل الجنه .
والله العظيم اني من اهل الجنه ، تو من شوي قايلين اسمي ، وقف يا
ملعون ، وقف يا ملعون .
وهذا انا اصارخ … وهو بانواع الضحكات الشريره هاهاها … هاهاها … هاهاها …
قلت له : يا ملعون وقف !!! ابي انزل !!!
قال : والله الباص هذا مبرمج على انه ما يوقف الا في النار …
تبي تنزل اقفز منه .
وركضت على الباب وفتحته … وهوووب
ولا وعيت الا في المستشفى … قافز من البلكونه … في الحوش !
القصه حقيقيه … وحصلت لواحد كان منوم في مستشفى المجمعه العام
دخيلكم لا احد يحلم تعوذوا من ابليس قبل تنامون ,
واللي يبي يحلم يقفل باب البلكونه ..
