تجربه شراء سياره من امريكا
في البدايه حبيت اعتمد على نفسي في الشراء عن طريق الانترنت وبدات ابحث عن السياره
الي كنت ارغب اشتريها وكانت
Yukon Denali XL 2004
بشرط يكون لونها فضي او فحمي او ذهبي وفي نفس الوقت لفيت في سوقنا المحلي
حتى اخذ فكره عن قيمه السياره عندنا حتى اعرف متوسط سعرها
الغريب في الامر اني اكتشفت انه في سوقنا العجيب اذا كان متوسط سعر السياره وخلينا
نقول 72 الف ريال يرتفع السعر مع نظافه السياره ولونها بشكل كبير يعني تدخل معرض
وتلاقي عنده 5 سيارات مثلا من نفس النوع الي تبحث عنه ووحده فقط الي دخلت
مزاجك بحكم اللون والنظافه فتلاقي الاربعه بحدود 70 ولكن الي عجبتك ما تقل عن 78
ويمكن 82 الف ريال
المهم بدات ابحث في النت وصفيت على 3 مواقع
http://www.motors.ebay.com/
http://www.cars.com/
http://www.autotrader.com/
لقيت الايبي اسعاره دائما اعلى من الموقعين الثانيين ولكن كانت السييارات المعروضه فيها تفصيل اكثر
وصور اجمل يعني تقدرو تقولو زي المعارض الموجوده عندنا الخمس نجوم والسيارات ملمعه وتبرق تقول
جديده تماما
لذلك صفيت على الموقعين الثانيين وصرت ابحث والسياره الي تعجبني بالمواصفات اتصل على اصحابها وطبعا
هناك نوعين من الملاك اما معارض سيارات (Dealer) او بائع خاص ( Private Seller) وطبعا
الاخير افضل لان السعر دائما يكون اقل
ولكن واجهتني مشكله وهي اما انهم يطنشوني ويعطوني اشكل او يرفعو السعر بمجرد ما يعرفوا
اني من السعوديه ا وان السياره مباعه والاهم هو اني فرضا لو اتفقت مع Private
Seller كيف اضمن حقي واحول له القروش
واخيرا وصلت الى نتيجه حتميه وهي اني بحاجه الى وسيط للشراء فاتجهت الى مواقع السيارات
العربيه ومنهم بن سفر بس لقيت انه حاط عموله كبيره وهي 4500 دولار بما فيها
الشحن وبذلك في احتمال كبير انه تكلفه السياره الاجماليه تكون اكبر من هنا وكان في
اكثر من وسيط وكانت اسعارهم كبيره فتجنبت حتى التواصل معاهم
واستمريت في البحث حتى لقيت واحد اسمه ناصر الحارثي وعايش في نيويورك وهو الوحيد الي
اعجبني اعلانه لانه كان بسيط جدا ومافي عنده لا لف ولا دوران فاتصلت عليه واكتشفت
انه طالب هناك ويمارس عمل الوساطه كدخل اضافي له فسالته ايش الضمانات الي عندك فرد
علي انه ما عنده ضمان الا اذا حبيت اسلم الفلوس لاحد اخوانه في جامعه الملك
عبدالعزيز واخذ ايصال بذلك بالاضافه الا ان الايداع يكون في حسابه او حساب ابوه في
بنك الراجحي وهذي بالنسبه لي كانت على الاقل ضمان لحقي فاقتنعت به وبدانا في عمليه
شراء السيارة
طبعا احب اضيف نقطه وهي اني انا من ابحث عن السياره واععطيه الرابط وهو يتواصل
مع البائع وفي نفس الوقت ما اعطيه رابط الا وانا مشيك على السياره على تقرير
السياره وحالتها عن طريق
http://www.carfax.com/
وكان هو احيانا يشير الى سياره ويطلب رايي فيها
نجي لاهم نقطه وهي ان شحن السياره ب1400 دولار في داخل كونتينر وعمولته هي 1000
دولار يعني تعمل حسابك على 2400 دولار اضافيه لقيمه السياره وانت تعمل حسبتك
بعض صور السياره الي اشتريتها من هناك وكلفتني واصله ميناء جده مع الجمارك والتخليص 64500
ريال
