شعر هجاء نبطي مكتوب
حلحلت هاجوس الشعر واحتمى القاف ** قافن نظمته من عنا الوقت مجبور
في ليل لو يستر ردى الناس بلحاف ** يبدي عليه الصبح في كل مستور
ليلن يفيض الهم من قاع الاجواف** فيه الندى دمعن من الليل مقطور
ليلن مزمهر ساكنن عظم الاطراف ** فيه الزيازم وسط سمعي لها قور
ما به صباحن يمسح الدمع باكفاف ** غير الندى قطره على راس طنقور
كني من العزه وسط ذيك الارجاف ** ذيبن ذبح مهرن وعشا له نمور
شين تخايل واحسبه زول الاطياف ** في دامسن هبه حفيفه على الغور
يبدي فحيحن دونه الحرث تجتاف ** منه يتراجف مسرج الخيل معذور
حين تجاحر تحت طيات الاحقاف ** عينه كما خرزن تعاكس به النور
سمه تلاسب للبشر بين الاغلاف ** علمه كما حكمن على مله الزور
في عام الاول حل خلفا للاسلاف ** سايق معه من ديره البرت سنيور
حتى شهد له من سمع فيه ما شاف ** دون اسمه اللي نحتزم فيه محدور
في ما مضى كل التدابير باشراف ** علمن سهر ليله على سنين وشهور
وفي ما بدا هرمن تسابقه الاظلاف ** اليا انثبر مثبار ثورن تلا ثور
سمه عدا في جمله الروس الاصلاف ** وخيره غدا لحشوف سيسان وقشور
من يسنده حطو على ظهره اسناف ** بشتن ذراها لاقرب الناس مقصور
الفايز اللي لا عواء الذيب ما خاف ** اتجفله عنزن عن مقابل اصقور
ابن علي من وثق بحكم الاحتاف ** في سنتن من دونها الواو دستور
جمع مصير القوم في خيش الاصواف ** والصبح طار بحايتن تذبح الهور
قفل على ارزاق العرب ماشي خلاف ** لكن يقفلها عقب ضيقه ادهور
يا لعن حيه لعن ابو عفن الاوصاف ** يا ليت من جابه غفى الليل مفتور
ويش انت ياللي دونك الروس وقاف ** ذيخن عقب ذيخن على جيفه انسور
اللي خلقنا رازقك عفن الاجياف ** رازق بهوش الارض في قاعه اجحور
سواك رجلن وانت من عقب الاشناف ** خلى لذيذ التمر ما كان منقور
ناسن تموت ولا اعتلت هام الاكتاف ** ما عندها من تنتخي فيه دكتور
اللي شقى عامن تلا عام كراف ** واللي له اسنين على حال ميسور
واللي خذاه الله على الدرب معتاف ** روح مودع دنيته لادمس قبور
يابن الربيعه خاطري منك ما عاف ** لكن علومك مثل طعنات مغدور
نحسبك حر البوش واثرك مشعاف ** تقتاده البكره وهو ثلب مقحور
من ديره اهل جلوريا جبت الاخلاف ** سريتهم من قاصي ديار وجزور
جمعت في واد الشقى نياق مصياف ** في كل دارن وسمها صار محزور
كل ما بغيت اواسي بزين الالطاف ** قصدت دارن ما بها حد مسرور
دارن بها الطيب لفظ كل الالهاف ** حال المريض من العنا صار مدهور
فيها من اللي تستر الناس وتخاف ** وفيها من اللي بالغنج تفتن العور
وضح البكار اللي تمايل بالارداف ** تختال في مد الخطا كنها حور
تركتها ترعى على زين معلاف ** واحرار بل القوم تلقح لها ابكور
شملت جملان العرب بين الانجاف ** واطلقتها نياقن على عرقب اذكور
ضاع العشم ونفوس الابرار عياف ** ما شدها بيتن على الذل معمور
دارن لزبها مثبتن هش الارخاف ** خيرن من بيوت الردى لو هي قصور
هاذي معازيب الكرم دار مضياف ** وهذيك تكرم ضيفها ثلج واخمور
ان كان خيره فصل اضلوع واكتاف ** اثمه طغى باللي له اسنين مقهور
رجلن على العليا تباريه الاهداف ** صوب ودسم شاربه باربع امهور
لكن صيداته على بعد مشراف ** من دونها وعرن ولا منه معبور
مركاز حرن بالسماء صوت الاجحاف ** يكفخ تحت غيمن على الناس ممطور
واليا بدت بنت الضحى عقب الاصداف ** ظله غدا برقع على الغيم مخمور
دوني قليبن لا اندلت فيه الاغراف ** ياصلك ماها والرشا فيه مغمور
كل ما بغيت اروي به عروقن انشاف ** طاح الدلو ثم اجحف الفيض منثور
قشر الزمن جمع على قشره اصناف ** وفرق زحولن تحكم العلم والشور
خلى دنافيس العرب فوق الاشراف ** وخلى الحرار تحدها سربت طيور
شفت الزمن حكم على ذوده اخناف ** امبركه ما تلقح مياسر الخور
قومن على حيد الجبل دون الاطناف ** حمر الجلود مقدده قزه سيور
مزبانهم شيخن مسح دمع الاذراف ** يوم النشاما تعتلي هامه الطور
تالي زمنهم يا علي صاروا احلاف ** حطوا لهم بين العرب ساس دستور
مسكانهم قصرن وسط خضر الارياف ** من عقب دارن حدها ممحل البور
صالوا وجالوا والقلم صار سياف ** هذا يمد وذاك يقطع على الدور
ضاعت حقوق اهل الوفاء بين الاظراف ** ما بين ناسن عذرها الشين مخبور
قومن لفتنا ما لها ساس واعراف ** حشفن تطاير مع هواء الريح مقشور
اطروش ماتت بالبحر دون مجداف ** واطروش طششها القدر لاقرب بحور
الله يبيح اللي حكم حكم الانصاف ** فيصل عسى مع سيد الخلق محشور
دعوه عساها للولي قرب وازلاف ** يا رب لا تجعل على الروس مامور
يالله نطقت ابها معا زفر الاجواف ** شعرن كتبته يا عسى يسعد اصدور
بغين تعدى واعتلا راس مشراف ** يا من ترد الحق تاخذ هل الجور
الليل في عيني عن العين ما غاف ** نوم الهنا يا نجمه الليل باسطور
ليت الليالي في زمن برق الارهاف ** تسحب عروق الحنظله حب وابذور
جزوى تعبنا هالورق صار مهفاف ** خضار لونه بيرقن صار مدحور
هفهف عقب ما حارب ادروج الاتلاف ** الرزق راح وخاطر الخلق مكدور
نوب الحيا ضعفن من اعقولن اخفاف ** يشره على راعيه لا ضيق اشعور
يومن قضى على النبي قفله القاف ** لبوا وصلوا عد ما شعشع النور
