ناس يعادونك بليا سبايب
جربت في الدنيا تجاريب شايب
وعرفت عدواني وميزت الاصحاب
وعرفت طبع الناس مخطي وصايب
ومانيب خبل تخدعه ضحكه الناب
جنبت انا العالم وبعض القرايب
البعض منهم قربهم عقرب وداب
لو كان تعطيهم عيونك وهايب
ماينفعونك جيدهم عند الاجناب
ناس يعادونك بليا سبايب
حط الحواجز دونهم واغلق الباب
واللي تكبر عنك شد الركايب
جنب طريقه واحقره كنه ذباب
بعض البشر قلبه من الحقد عايب
لافيه طب وقلبه اسود من غراب
عنده نجاحك من كبار المصايب
واذا سمع مدحك من الغيظ ينصاب
لولا الحيا سالت دموعه سكايب
مسكين من نار الحسد ماكل تراب
اللي يذمك كلما صرت غايب
وان جيت قدم لك تراحيب واعجاب
كبه ترى مثله مع الناس خايب
عادات ابو وجهين يكذب ويغتاب
لو تغرقه بالطيب ماهوب طايب
لاتنخدع في مثل شرواه لو طاب
وتبقى الحقيقه يازمان العجايب
الروس روس ولو يغارون (الاذناب)
ناس يعادونك بليا سبايب
حط الحواجز دونهم واغلق الباب
