مميزات وعيوب لانسر شارك
العيوب
الشنطه ضيقه بشكل ملحوظ جدا من جهه العمق .. انما الطول والعرض عادي
عزل العربيه سيء جدا .. صوت الموتور واضح جدا جوه العربيه .. انما مع السلانسيه
مفيش صوت خالص .. ولو دخلت في شويه طينه او حصي بتسمع صوتهم بيخبطو في
الرفارف من جوة
الاضاءه الحمرا بتاعت شاشه المعلومات في التابلوه مش حلوه .. احنا اتعودنا ان النور الاحمر
بيكون تحذيري .. متعودناش عليه شغال كده على طول .. مزعج جدا وخصوصا في السفر
بالليل والدنيا ضلمه .. اضطريت اخفف اضاءه التابلوه خالص عشان ميضايقنيش
الباور تقيل بشكل ملحوظ .. فين الباور الكهربا والدلع بتاعه .. حتى لما تحرك الدركسيون
وهي واقفه سلانسيه تلاقي الار بي ام بيزيد دليل على تحميل طرمبه الباور عالموتور ..
ده في العربيات القديمه مبيحصلش كده .. اكتر حاجه ممكن تحصل انك لما تكسر عالاخر
الار بي ام ينزل سنه وتسمع زنه .. انما حركه الدركسيون ترفع الار بي ام
بالشكل ده .. فيه حاجه غلط
التوكيل مش كويس .. لازم تبقى مصحصح معاهم .. عند غيار زيت الالف كم حطو
ال4 لتر 5w30 وزود النص لتر الاخير 5w40 .. هي مش مشكله بس ده يخوفك
لما تيجي تعمل عندهم حاجه كبيره .. ويديك دليل على عدم احترافيتهم ودقتهم .. قررت
مروحلهمش تاني
الكاسيت والسماعات على قدهم خالص .. السماعات في البيبان الاربعه بس .. مفيش ورا ..
اللي هي بتبقى اهم سماعات وبتعمل لك البيز والدوم المحترمه نتيجه فراغ الشنطه .. ومفيش
يو اس بي
واجهه العربيه غريبه اوي .. شكلها طبعا جامد مفيش كلام .. بس الاكصدام مالوش لازمه
لانه مش اكتر حاجه بارزه من قدام .. يعني لو ريحت بالعربيه على حاجه قدامك
اول حاجه هتتلمس الشنب العلوي مش الاكصدام .. وده السبب ان العربيه لما بتقدم شويه
بتلاقي شكلها وحش من الترييحات الاماميه .. انا بعتبرها عربيه بدون اكصدام
مفيش مسند خلفي ولا كونسول امامي برغم انها حاجات مش مكلفه ومش ده اللي المفروض
يفرق بين فئه وفئة
المميزات
واسعه من جوه .. من ورا ومن قدام .. حتى مع الديناصورات امثالي .. مرتاح
جدا فيها
عاليه عن الارض بشكل محترم ولا مجال لاي حك في المطبات حتى مع التحميل لغايه
5 اشخاص
عفشه مميزه وهي الانسب لمصر ومطباتها .. انزل نام تحتها واتفرج عالمقصات الخلفيه وانت تفهمني
مقاس الكاوتش والجنط رائع .. باختصار كل مكونات تعليق العربيه هي الانسب لمصر ولساكني القاهره
خصوصا
الموتور قوي والفتيس حلو مفيهوش مشاكل .. العربيه جابت ال 180 كم/ ساعه بسهوله وبسرعه
وكان فيها لسه كتير بس معرفتش اجرب اكتر من كده .. الطريق كان زحمه ..
والثبات بتاعها محترم .. تحس على السرعه دي انك راكب اوروبي .. برغم انها عاليه
.. بس تصميم الايروديناميك والعفشه فيها .. ابداع
واضح جدا الاهتمام بقوه وصلابه الاجزاء المهمه بالعربيه .. انزل اتفرج على مفصلات الشنطه وجوز
المساعدين اللي فيها وميكانيزم الحركه بتاعها وانت تفهم قصدي
كفايه انك تعرف ان العربيه دي نفسها في الخليج نازله بمحرك 2000 سي سي وفي
الغرب موتور 2400 سي سي .. يبقى البودي بتاعك متصمم ازاي ولحاماته عامله ايه ..
دي كانك عامل اساسات عماره تشيل 20 دور وبنيت عليها العماره 10 ادوار بس ..
تبقي عماره قويه ولا لا
الكونسول الامامي منظم وشيك اوي بدءا من الكاسيت نزولا الي تحكم التكييف والولاعه وعصايه الفتيس
والهاند بريك .. مفيش حاجات تضايقك زي عربيات كتير بتلاقي فيها غباوه تصميميه في الحته
دي بالذات
التكييف حلو .. استلمت العربيه في اول 9 .. ملحقتش اجربه في نار الصيف بتاعت
7 او 8 .. بس واضح انه هيبقي تلاجة
الفرامل حلوه جدا برغم ان مفيهاش اي حاجه زياده ولا ايه بي اس ولا اي
بي دي ولا يحزنون .. انا شخصيا الايه بي اس مبقتنعش بيه اوي طالما العربيه
لاستخدام داخل المدينه ومشاكله وعيوبه والاصوات اللي بيطلعها تخليك تكرهه متحبوش .. طبعا هتختلفو معايا
.. عموما الشتيمه حرام
استهلاك البنزين حلو مش وحش بالنسبه للقوه اللي بتاخدها من العربية
سعر العربيه حلو جدا قياسا بامكانياتها .. وهي الافضل في هذه الفئه السعريه بلا منافس
.. شوف الريو بكام والاكسنت بكام والالنترا والسيراتو .. تهريج .. مع كامل احترامي لملاكهم
