معلومات عن كلاب البيتبول الامريكي
هتكلم عن كلب متفرد من نوعه و هو البيت بول، الكلب المظلوم ابدا واكتر كلب
مهدور دمه و مش واخد حقه، واللي ياما سمعنا عنه كلام مفيش اسوا منه والسبب
هو احنا كمربين مش حد تاني.
وزي مانتو عارفين انا بعيد شويه عن التقليديه، وعلشان كده الموضوع هيناقش المجموعه دي من
النقاط بالترتيب ده:
1- مقدمه عن البيت بول.
2- السمات المميزه لشخصيه البيت بول.
3- التكوين العام لجسم البيت بول و ودراسه لمميزات التكوين الجسماني.
مقدمه عن البيت بول
البيت بول من اشهر الكلاب في العالم، واكتسب شهرته بسبب السمعه السيئه اللي لاحقته في
كل الدول. و البيت بول بينتمي لمجموعه من الكلاب اسمها Bullies وهي مجموعه من سلالات
الكلاب التي تم تهجينها بغرض صيد الثيران والسيطره عليها، ومن هنا اكتسبت الاسم Bull في
احد مقطعي الاسم. والمجموعه دي بتحتوي على العديد من الكلاب منها على سبيل المثال لا
الحصر البيت بول (Pit bull)
والبيت بول من الكلاب التي لم يوضع لها مواصفات قياسيه ثابته زي الجيرمن مثلا، علشان
كده هنلاقيه في كل دوله شكله مختلف بصوره طفيفه عن الدوله التانيه، واشهر الدول اقتناء
للبيت بول هي الولايات المتحدة، وهناك في انديه معترف بيها للبيت بول وتم اخيرا الاستقرار
على نوع وسموه American Pit bull Terrier اللي هي بنشوف اختصارها كتير اوي APBT. ومن
الدول المحبه جدا للبيت بول دول امريكا اللاتينيه زي بيرو و الارجنتين على وجه الخصوص،
وبعدهم روسيا ودول الاتحاد السوفيتي السابق، وبعدين اوروبا.
ودي مجموعه صور لكلاب بيت بول امريكيه :
وايضا توجد كلاب بيت بول روسيه …
واكيد طبعا هنلاحظ الفرق في البنيه الجسديه بين الامريكي و الروسي، فالامريكان بيميلوا للضخامه الزايده
مع قصر القامة، في حين ان الروس بيحبوا الرشاقه والجسد المعتدل ومعاهم بتوع امريكا اللاتينية.
والبيت بول من الكلاب اللي بتتمتع ببنيه عضليه رائعه وشراسه طبيعيه زائده وسمات شخصيه مميزة،
وده خلاها اداه مناسبه لكل اصحاب النفوس الضعيفه علشان يستخدموها في اعمال العنف والسطو المسلح
و التظاهر والمنظرة. وطبعا الكلب مجرد حيوان لو تم تدريبه على اعمال العنف هيبدع فيه
وبالتالي البيت بول اكتسب السمعه السيئه دي، وتم منعه في العديد من الدول منعا للمشاكل،
ونقدر نمثل البيت بول بالعربيه الهامر مثلا، عربيه قويه و امكانياتها جباره، لكن ممكن تستخدم
غلط وهو ده بالظبط اللي حصل مع البيت بول وطبعا منقدرش نظلم الكلب انما الذنب
واقع على اللي بيربي الكلب على الاعمال الوحشيه دي.
لكن على الجانب الاخر، البيت بول اثبت كفائه تامه في كل الاعمال اللي تم تدريبه
عليها زي اعمال الحراسه واعمال الانقاذ ومكافحه المخدرات، ده غير تالقه الدائم في الحراسه الشخصية،
وحراسه الاماكن المغلقة، زي المستودعات و المخازن لقابليته الكبيره على القفز والمناوره في اماكن مزدحمه
وضيقة.
ودي صوره بسيطه كده بتوضح الارتفاع اللي ممكن يوصل ليه بيت بول من الثبات، واكيد
ملاحظين ان القفزه كانت من بعد العربيه وملاحظين اد ايه المسافه الافقيه صغيره جدا في
حين ان الارتفاع اللي وصل له رهيب.
2- السمات المميزه لشخصيه البيت بول :
نيجي بقى لتاني نقطه في الموضوع وهي شخصيه البيت بول، وما يميز شخصيته، وفهم شخصيه
البيت بول هو طريق النجاح علشان نعرف نتعامل معاه. والبيت بول عامه كلب غريب جدا،
وشخصيته غير واضحه على عكس بقيه الكلاب، هنلاقي الرودفايلر مثلا عنده كبرياء و عزه نفس
واضحه، و الجيرمن مثلا فيه وفاء و خضوع بصوره لا تخفى عن عين حد ،
في حين ان البيت بول شخصيته غير واضحه، وناس كتير اوي بتقول عليه عنيد و
غبي واللي بيحركه شراسته المبالغ فيها، و الكلام ده غير صحيح بالمره. وممكن نحدد السمات
المميزه لشخصيه البيت بول كالاتي:
1- طباعه حاده جدا.
2- عنده كبرياء شديد.
3- عنده لا مبالاه ولا يهتم باي متغيرات بتحصل حواليه غير لما تكون كبيره.
4- واثق من نفسه ومن قدراته لابعد الحدود.
5- وفي لصاحبه لابعد الحدود.
6- وطبعا كلب شرس لابعد الحدود وشراته غالبا موجهه تجاه الحيوانات اكتر من البشر.
7- كلب جسور و مغامر ومبيفكرش في عواقب تصرفاته.
8- صموت وهادئ وغير محب للضوضاء.
وكالعاده هنمسك نقطه نقطه نحللها، وبسم الله نبدا.
1- حده الطباع:
البيت بول كلب طباعه حاده جدا، و يعني ساعه الهجوم بيهاجم بكل طاقته، وساعه اللعب
بيلعب بكل طاقته، وبينقلب من مود الللعب مثلا لمود الهجوم في لحظة، ده غير انه
بيرد الهجوم باعنف ما يمكن، وحده طباعه خلته من اشرس الكلاب لانه بيستخدم كامل قوته
في الهجوم وده بيخدم شراسته جدا.
2- الكبرياء:
اكتر حاجه بتميز البيت بول كبريائه اللي دايما بيتفهم على انه غباء خصوصا لما بيختلط
بحده طباعه. البيت بول كلب عنده كبرياء شديد، ومش بيتقبل الهزار او الاهانه ابدا، ده
غير انه دايما بيصر يكون هو القائد، ودي اكتر مشكله بتواجه المربين، وهو ازاي نخلي
الكلب يسلم القياده لصاحبه من غير ما نهيت كرامته او نلغيها من شخصيته. ودي طبعا
نقطه محتاجه نوع خاص من المعامله وهو اننا بندي الكلب وضعه و مركزه وفي نفس
الوقت نحسسه ان زي ما هو له شخصية، القائد شخصيته اقوى منه وان هو لازم
يطيع القائد لحبه فيه مش لمجرد الخضوع له. يعني مفتاح البيت بول في استغلال كبريائه
وجعله هو المحرك للوفاء. بمعنى اخر يكون الكبرياء هو الدافع للوفاء لصاحبه وطاعته لان الطاعه
بتعني تحقيق الوفاء و ده بيزود من كبرياء الكلب. اتمنى اكون قدرت اوصل المفهوم ده
لانه معقد شويه.
3- اللامبالاه:
البيت بول من الكلاب اللي عندها ثقه كبيره في نفسها وده بيخلي عندها نوع من
اللامبالاه، ومش مهتم باي حاجه تحصل حواليه طالما مش حاجه كبيره. يعني مثلا حاجه مكانها
اتغير او صوت عالي حصل نلاقي الكلب مش مهتم بالصوره الكبيره، كل اللي بيحصل انه
بيوجه اهتمامه ليها ويتابع من بعيد، ولو الامور اتطورت لشيء مقلق ساعتها يبتدي يتحرك وينفذ
مش مجرد استطلاع. ودي نقطه من النقط اللي بتعمل مشاكل في حراسه البيت بول، لانه
مش بيكتفي مثلا بالتهويش او النباح و الحاجات دي، لا ده على طول بيهاجم اي
وضع غريب، يعني لو لص مثلا دخل مكان بيحرسه بيت بول الكلب لما بيدرك ان
ده شيء غريب على طول بينفذ و يهاجم ويتعامل باعنف ما يمكن بسبب حده الطباع.
4- الثقه:
كلب البيت بول من اكتر الكلاب ثقه في نفسها وقدراتها، وده لانه مقتنع تماما ان
مفيش كلب تاني اقوى منه، وعلشان كده نلاقي ان البيت بول مش بيهاجم ابدا اي
كلب تاني غير لما ياخد الامر، او الكلب التاني يبدا الهجوم، وغالبا البيت بول بيهاجم
بعد اول ضربه ومش بيكون هو البادئ. والثقه دي هي اللي اهلت البيت بول انه
يكون من اقوى كلاب مصارعه الثيران، لانه مش بيهتم بحجم او قوه الخصم لقته الشديده
في قدراته وده بيخليه يهاجم اي خصم مهما كان بيستخدم من وسائل الارهاب المعروفه في
عالم الحيوان.
وطبعا دي من الامور اللي خلت الناس تاخد انطباع سيء عن البيت بول بانه كلب
شرس ومش بيتفهم، وده غلط جدا لان البيت بول مش بيخاف بس، وده اللي بيوحي
بالشراسه الزايده.
5- الوفاء:
البيت بول من اوفى الكلاب، وعامه مفيش كلب مش وفي، لكن وفاء البيت بول شديد
جدا لصاحبه لدرجه انه بيستميت في القتال علشان صاحبه وبيضحي بنفسه علشانه ومستحيل ابدا يتراجع
في قتال علشان صاحبه حتى لو الخصم كان اقوى منه و تمكن منه واصابه اصابات
خطيره جدا. على عكس كلاب تانيه كتير اوي لما بتصاب بتتراجع وتعلن الاستسلام، لكن البيت
بول بيشترك مع الدوجو و الرودفايلر في عدم الاستسلام مطلقا.
6- الشراسه:
شراسه البيت بول طبعا مش محتاجه كلام، ومعروف عنه انه من اشرس انواع الكلاب، وشراسه
البيت بول بتحركها اربع حاجات وهي “القوه الجسدية” و “الثقة” و “الحدة” و عامل فطري.
وهنلاقي ان الاربع عوامل دول هم اللي بيرسموا شراسه البيت بول لان القوه الجسديه و
حده الطباع و وعدم التردد بتخلي عنده ثقه تامه في قدراته وبالاضافه لعامل الشراسه الفطري
الزائد، كل دي حاجات بتدي البيت بول شراسه فوق الطبيعية، لكن ميزتها انها شراسه مميزه
و موجهه وسهل التحكم فيها على عكس الشائع عنه. والتحكم في شراسه البيت بول بيكون
بتعريفه من الصغر على كل ما هو عادي وكل ما هو غير عادي، علشان زي
ما قلت في نقطه اللامبالاه اي شيء غير عادي البيت بول بيتحرك ضده باعنف ما
يمكن.
7- الجسارة:
طبعا مش محتاجه كلام و الادله عليها كتير، البيت بول من اكتر الكلاب جساره وعناد،
فهو كلب مبيهموش اي حاجه وقلبه ميت ولما بيحط حاجه في دماغه لازم يوصل لها
بجساره مش موجوده في اي نوع تاني من الكلاب باستثناء حاجات قليله جدا زي البول
تيرير و الدوجو ارجنتينو كمثال.
8- الهدوء:
البيت بول كلب هادئ جدا بطبعه، وغير محب للنباح بالمره حتى في اوقات الهجوم، ودايما
نلاقي هجوم البيت بول بيتم بدون نباح، ولا حتى نباح تحذيري، انما بتكون مجرد زمجره.
وفي اوقات الهدوء بنلاقي البيت بول بيحب الاستجمام وبيميل للهدوء التام، ولو صاحبه انشغل عنه
بيفضل انه ينام جنبه عن انه يعمل اي حاجه يجذب بيها انتباهه. على عكس البوكسر
مثلا. كلب البوكسر من الكلاب اللي لو صاحبها انشغل عنها تلاقيها بتعمل اي حاجه علشان
تجذب انتباهه. ودي من النقط المميزه جدا و الجميله جدا في البيت بول، وكمان بتاهله
انه يقضي فترات طويله بعيد عن صاحبه بدون مشاكل، وبيكون كل همه فيها انتظار صاحبه
وبس بدون ما يعمل اي حاجه ممكن تتسبب في مضايقته.
وبعد تحليل الشخصيه نقدر نستخلص النقط دي:
-1 من اقوى وافضل الكلاب التي يمكن استخدامها في الحراسه علشان بينته القويه جدا وامكانياته
العاليه جدا في القتال، وكمان شجاعته المتناهيه و حده طباعه بثقته بتاهله انه يكون حارس
ممتاز، وخاصه في الحراسه الشخصيه او حراسه الاماكن المغلقة. وعامه البيت بول من افضل الكلاب
لحراسه المخازن و الاماكن المزدحمة، لانه بيقدر يتعامل بسهوله شديده مع العوائق لامكانيته الجسديه، وكمان
كلب هادئ في هجومه وسريع التصرف.
2- سهل تربيته في المنازل بشرط ان يكون المربي على درايه تامه بشخصيته علشان يقدر
يوظف امكانياته صح وميتعاملش معاه بصوره تؤدي لنتائج عكسية. وحجمه الصغير بيخليه سهل تربيته في
البيت، وحبه الشديد للاطفال وحنيته عليهم بتاهله لانه يكون جليس اطفال ممتاز.
3- كلب محتاج معامله غذائيه ورياضيه خاصه جدا، وطبعا معامله نفسيه خاصه ومن شخص على
درايه وخبرة.
4- تدريبه سهل جدا بشرط معرفه كيفيه التعامل معاه.
5- ممتاز في الحراسه وكمان تم استخدامه في حاجات تانيه كتير زي عمليات الانقاذ و
وغير مناسب لاعمال الرعي.
3- التكوين العام لجسم البيت بول و ودراسه لمميزات التكوين الجسماني :
البيت بول له مميزات جسديه لا توجد في اي نوع اخر من الكلاب، ودراسه البنيه
الجسديه تتطلب اننا نوصف الجسم الاول.
جسم البيت بول عضلي جدا، ويتميز بتكتل العضلات وبالذات في منطقه الصدر و الذراعين و
العنق و الفك والاكتاف و الارداف، ونلاحظ ان حجم العضلات بدون اي تمارين بيكون كبير،
يعني كتله العضله نفسها كبيره، وده بيسمح للبيت بول انه يحصل على تكوين عضلي ممتاز
و متناسق و حجمه كبير مقارنه بحجم البيت بول ككل.
والبيت بول كلب قصير، صدره عريض وقوائمه متناسقه، وارتفاعه في المتوسط بيكون بين 45 سم
و 55 سم، ووزنه بيتراوح بين 15 كيلوجرام و 25 كيلوجرام. الذراعين فيهم تقوس بسيط،
والرقبه عريضه وقويه والراس متناسق و مربع الشكل، العيون مستديره او شبه لوزيه و متباعده
وفي اعلى الجبهة
العريضة. الفك عريض جدا ووغير مدبب، و الخدود واضحه ومميزه بعضلات كبيرة، وفي جزء زايد
من لحم الفك السفلي و العلوي (الشلاضيم) شكله مميز و غير مهدل اوي. وعامه حجم
الراس بيكون ضخم.
فراء البيت بول قصير ولامع ولا يحتاج عنايه كبيرة، واذان البيت بول جزء صغير منها
مستقيم و الباقي متدلي، والاذن بيتم قص الجزء المتدلي منها في قبل بلوغ الكلب شهرين،
علشان تدي للكلب منظر اكثر شراسه ولتحسين قدره الكلب على السمع، بس رايي الخاص ان
القص عمليه ملهاش اي لازمه وبلاش نلعب في خلقه ربنا.
الوان البيت بول عديده منها الفون و البرندل و البلو (الازرق) و البلاك (الاسود)و الهوايت
(الابيض) و البني، وممكن وجود اي تكوينات لونيه وغالبا بيكون فيها الابيض مع اي لون
تاني.
ذيل البيت بول عريض وقوي في منطقه اتصاله بالجسم و بيبدا يرفع ومميز بنهايته المدببه،
و الذيل مرتخي وبدون اي التواء او تقوس، و ساعه الاثاره ذيل الكلب بيرتفع لفوق
علشان يبعده عن اي هجوم، و في فترات السعاده الذيل بيكون مرفوع موازي للجسم.
كف البيت بول عريض والاصابع واضحه و كبيره، و غالبا بيكون لون الكف وجزء من
الذراع ابيض وده اللي بنسميه قفاز او شرابات على حسب طول اللون الابيض. وللبيت بول
خمس اصابع اماميه واربعه خلفية.
البيت بول مميز جدا بعرض صدره وتباعد الذراعين، وعامه مواصفات البيت بول بتقاس بناء على
عرض الصدر و تقوس الذراعين و حجم الراس و عرض الفك و ميل الجبهه و
قصر القامة. وعامه في حسبه بسيطه بنعملها كده وهي بنقيس عرض صدر الكلب و ارتفاعه
من الكتف ونقسم العرض على الارتفاع، وكل ما النسبه قربت لواحد كل ما كان الكلب
احسن.
ودلوقتي هنناقش مميزات البنيه الجسدية.
1- قصر القامة
قصر قامه البيت بول و عرضه بيديله ميزه خطيره مش موجوده في كلب تاني خارج
مجموعه ال Bullies وهي الثبات، فكل ما كان الكلب قصير وقريب من الارض وعريض كل
ما كان ثابت اكتر على الارض، وزي ما قلت في موضوعي بتاع المقارنه بين البيت
بول و الرودفايلر، القوه المطلوبه علشان نوقع كلب بيت بول بتكون كبير لان ذراع العزم
صغير، وممكن نتخيلها باننا عايزين نقلب صندوق قصير و صندوق عالي، طبعا الصندوق العالي بخبطه
بسيطه يقع انما القصير عايز قوه اكبر. والثبات ده بيخلي صعب جدا ان اي حاجه
تقلب البيت بول في اي قتال، وبتسمح له بعض خصم اكبر منه بدون الخوف من
محاولات الافلات. وكلنا عارفين ان الكلب اول ما بيمسك الخصم بيفضل يهزه براسه علشان يوقعه.
وقصر القامه كمان بيدي البيت بول ميزه مهمة، وهي ان الكلب بيكون قريب من نقاط
ضعف اي خصم و هي السيقان. وكمان بتديله فرصه للسيطره على الرقبه من اضعف مكان
فيها وهو الحنجرة. ده غير انها بتجبر المهاجم انه ينحني علشان يوصل للبيت بول وده
بيسمح له بالوصول لنقاط الضعف كلها
بسهولة.
2- حجم التكتل العضلي
كلب البيت بول بيتميز بتكوين عضلي ممتاز، فحجم العضلات كبير مقارنه بحجم الجسم العام، و
دي بتضمن للبيت بول الخفه و الرشاقة، يعني هنلاقي ان وزن البيت بول مش كبير
وفي المتوسط بيكون 25 كيلوجرام وكميه العضلات كبيره وده معناه ان جسمه خفيف جدا بالنسبه
للقوه اللي ممكن يبذلها، ودي بتدي البيت بول ميزه الرشاقه، فنلاقي البيت بول بيقفز مسافات
عاليه جدا وسرعته كبيره جدا، ده غير انها بتديله رشاقه اثناء الهجوم وقوه كبيره على
التعلق في الخصم بدون مشاكل. لكن عيب صغر الحجم هو ان الخصم بيتمكن من حجم
اكبر من جسم الكلب، يعني لو كلب تاني كبير زي الرودفايلر مثلا قدر يعض البيت
بول هنلاقيه عض مساحه كبيره من جسمه. وتاني حاجه صغر الحجم بيقلل من قصور البيت
بول، والقصور ممكن نشرحه بمثال صغير وهو لو طفل وراجل ناضج الاتين بيجروا وخبطوا فيك،
طبعا الطفل مش هياثر اوي لكن الراجل الكبير هتحس بخبطته جدا واكيد هتوقعك على الارض.
هو ده القصور، يعني كل ما زادت الكتله كل ما زاد القصور.
3- قوه الفك و عضلات الرقبة
نظرا لان جسم البيت بول خفيف مقارنه بحجم عضلاته، وكمان قوه فكه رهيبه، هنلاقي ان
البيت بول من السهل عليه التعلق لفترات طويله جدا بفكه، وكمان قوه عضلات الرقبه بديله
ميزه انه ممكن يتعلق بفكه وياثر بضغط شديد بفكه وفي نفس الوقت يحرك راسه بعنف
شديد لاضعاف الخصم عن طريق عضلات رقبته القويه جدا، والضغط مع التحريك العنيف بيخلي البيت
بول قادر على تحطيم عظام الخصم بسهولة، وكمان بيكون من الصعب جدا افلات الخصم منه
لقوه فكه الرهيبه حتى مع محاولات الخصم العنيفه لان زي ما قلت كتله البيت بول
صغيره، وضيف ليها قوه فك مهوله هتكون النتيجه ان البيت بول لو مسك خصم بفكه
صعب جدا انه يفلت منه. وده كان الغرض الاساسي من انتاج السلاله لان مصارعه الثيران
بتتطلب ان الكلب يتعلق بفك الثور، وطبعا الثور هيحاول يطوحه براسه والمفروض ان الكلب يفضل
قابض بفكه مهما كان القوه اللي الثور بيطوحه بيها.
