ما هي البوقالات الحب
البوقاله هي لعبه من التراث الجزائري القديم توراثنها عن اجدادنا حيث النساء يتفنن في ابتكار
امثال و حكم على الطريقه و اللهجه الجزائريه و كانت و لازالت تلعب خاصه في
مناسبات حيث تجتمع النسوه كالافراع والاعياد وبالخصوص السهرات الرمضانية
التي تنتظم في العاده داخل البيوت حيث تتكفل احداهن باستضافه جمع من النسوه اغلبهن عازبات
حول اطباق الحلوى والشاي، وتقوم بتحضير اناء فخاري (يسمى بوقالة) وتضع فيه قليلا من الماء،
ثم تطلب من كل واحده منهن نزع خاتمها ووضعه داخل الاناء، ثم يتم تغطيه الاناء
بقماش ناعم.
و تكمن متعه البوقالات حسب اسقاط معاني تلك الاشعار الشعبيه او الالغاز التي تلقيها في
العاده عجوز طاعنه في السن على النسوه الحاضرات، وتقضي قواعد اللعبه ان تنوي البنات عقد
النيه على شخص ثم تعقد اي شئ تملكه خمار او خيط المهم تعقد شئ وتنوي
في بالها شخص معين لتري فالها او حظها مع هذا الشخص ….
تقوم العجوز بقول بوقاله وكل البنات مصغيات فاذا كانت البوقاله جميله وفالها حلو تجد كل
الفتيات متشوقات حتى يعرفن من صاحبه البوقاله الجميله وكل وحده تتمنى تكون هي صاحبتها
واذا كانت البوقاله كلامها فال سىء او حزين فتجد كل واحده خائفه من ان تكون
هي صاحبه البوقاله ….
بعد الاستماع تخرج احداهن او احدا البنات الصغيرات خاتما من ااناء-البوقالة، و تقع البوقاله على
صاحبه الخاتم .
هذه اللعبه من تقاليد و التراث الجزائري و لا زالت متداوله حتى الان و في
بعض الاعراس اصبحوا يقدمون البوقلات في وريقات صغيره توضع في قفيفه صغيره و يوزعنها على
البنات و النساء الحاضرات كتسليه في الاعراس و كل واحده تقرا فالها
اليكم بعض من البوقالات و كل واحد ه و فالها الي يفتح اللعبه الاول يترك
رد حتى تكون اللعبه من نصيبوا بس اعقدوا بالاول و انويها على شخص سواء قريب
منك او بعيد (منقول)
بسم الله بديت وعلي النبي صليت وعلى الصحابه رضيت، عيطت يا خالقي يا مولاي يا
مغيث كل مغيث، كملي في البوقالات واش نويت ياربي اعطينا الفال ولاقينا بولاد الحلال.
فال يا فلفال يا فاتح سبع قفال اجبر لي سعدي مهما كان ما الشرق و
لا من الغرب ولا من الشمال
قولوا للضاق صبرو يشد في حبال الرجا وعلاش يتنكد… يتكل على الله ياك ربي العالي
ما يضيع
1 عينيك توت وحواجبك ياقوت بنتكم نديها واللي بغي يموت يموت.
2 ورده في الكاس يضاربوا عليها بالمواس.
3 يا مولات السعد لبيض ربي يكملك، حوست قاع البلدان مالقيت مثلك، ربي يجيب حيله
من السماء وتكون من قسمي.
4 خرجت يوم الجمعه في يدي شمعه خرجت ليا جنيه قالتلي مالكي يالوليه حكيتلها ما
بيا قاتلي روحي حاجتك راهي مقضية.
5 ياللي طالعين للجبل ادوني معاكم اذا بيكم علي الماكله راني شبعانه واذا بيكم علي
التحواس راني عيانه وذاك الشباب زرق العينين ما نديه غير انا.
6 بيني وبينك تويقه قد الكاس وبيني وبينك كلام واش وصلو للناس؟ مايكون الحيط حتى
يسبق الساس وما يرفدو الذل غير بنات الناس.
7 امك سماتك “علي” واسم “علي” عالي ويا واسطه في العقد يا نقش خلخالي الذل
ما نحملو والعز رباني .
8 العدو واللي طعن الله يخيب مكرو والتراب اللي يعطش الله يسقيه بمطرو الليل راه
مشى والنهار لاح بنورو.
9 درت الحنه في يديا وزدت في رجليا وراني ندعي في ربي وقتاش يفرج عليا.
10 ياللي قاعده في الرياض وادور بفوطتها الحسن والحسين قاعدين قبالتها شافها السلطان قال نديها
شافها الوزير قال نغنيها و انا قلت من العين نحميها.
11 غالي غالي والغالي ربي مهما تروح وتغيب معزتك دايما في قلبي.
12 حب الملوك يا حب الملوك وحب الملوك مصدر في وراقو, نموت على حبيبي ومانصبر
على فراقو.
13 رحت للسوق نشري الفلفل والكمون صبت راجل مذلول قالي: حبيبك راه عليك كي المهبول.
14 يا اللي زايده في عذابي في النهار انومك و في الليل نترجاك اعطيني كلمه
من فمك يرحم اللي رباك.
15 نسول عليك يالحبيب والسوال خير من الف هنيه ساعه على ساعه نفكر في الزمان
ونقول علاش الي تمنيتو ماهو ليا.
16 خرجت وحدي في الليل وخرجات الليل صعيبه انسيت المحنه والويل اتفكرتك انت يا الحبيبة
17 حب الملوك جاني مغلف في اوراقه انا وحبيبي في بلاد واحده والقلب مشتاقه
18 عديان الجبال خطبت بنت الرجال و الي يقول كلمه في البنيه عند الصبح تبان
19 حليت باب الجنان لقيت الملاح رقود تنهدت الداليه و تحرك العنقود قال القمر فالسماء
نكشف على السحاب يذوب خلي الحبيب لحبيبو واللي في قلبو حاجه الله يبلغ المقصود.
20 نزلت لقاع البحر خرجت لي جنيه قالت لي وشبيك يا لالا مهمومه تكلمي افتحي
قلبك ليا قلت لها يا مولاتي هذاك حبيبي اداوه عليا قلبي معاه و قلبو معاها
هيا.
21 يا لي جايا من العين و بيدك مليتي القله سبحان من اعطاك ازين و
زاد في بهاك ذيك الحلة.
22 النور يا النور و النور عينيا طبطبوا على الباب و جابو لي اللي عزيز
عليا راني نتمنى من ربي يجي يطلب يدي من ماليا.
23 جاز عليا شباب في يده منديل ازرق و ششيته معنقره و لبسته تبرق عليه
نسمح في الولد و عليه نطلق وعليه نخلي البلاد ونردها خندق.
24 الشمعه يا لشمعه يا لشمعه الضوايه لو كان نعرف وشبيك نمسح هذيك الدمعه من
خديك و نرد وجهك مرايا يا ربي يا معبود اقبل دعايه يا رجع لي زهو
الزمان ويعيا الحبيب قاعد معايا.
25 اطلعت للسطح و فرشت زربيه حرقت حر قوس الذهب و حرقست عينيا افرحي يا
يما سعدي ولا ليا نستشفي فالعدو كما استشفى فيا.
26 فاطمه يا فطوم وين ما تكوني نرسلك مرسول اذا سكنتي البحر نرسلك عوامه واذا
سكنتي السماء نرسلك حمامه و اذا سكنتي القبر يحاسبك مولانا.
27 علاش يا لالا التخمام رحمه الله واسعه و كبيره لو كان جات بالكلام نتحدثو
و نعطوك تدبيره بصح كل شي بالمكتوب ويعيا والخير يبان و تزول عليك الهموم و
تروح الحيرة.
28 اعلميني يا لالا نهار تروحي لحمامك نرفدلك السله و نمشي قدامك ندور على يمينك
و نزيد على شمالك و نبقى لك خديم و طايع على طول زمانك.
29 السفينه اللي جات باش نلاقيها باللوز و السكر نرش سواريها و الورد والياسمين نهديه
للركاب فيها و بالمسك و العنبر نعطر اماليها.
30 يا لشمس الضوايا يا العاليه في سماك لو كان صبتك مرايا و نشوف وجهي
بضواك يعود ربحي و غنايا و يقسم سعدي ذاك.
31 في الساقيه الماء يجري و الحشيش نابت متخالف بالشوك مليت حجري من هذاك الراي
التالف كي غبت و غاب زهري و لا اللي يجيني خايف.
32 اقعدت تحت النخله قالولي دقله نور جات ادور اطلعت فوق النخله و بالعسل رشيت
الصور معاه المعيشه تحلى حبيبي الساكن في القصور.
33 جيت ساميت البحر شفت الحوت يعوم عرفت ما عندي زهر في ذا الحظ المحموم
كي غاب ضي القمر ما ردت ضي النجوم.
