كلام جميل عن الاب , اشعار عن الاب الحنون
يابوي جعلك للبقا والمكاسيب
عمري بدونك يالذرا ويش ابي به
يابوي تسال عن شفاك المراقيب
طلعه سواتك للنوايف غريبه
ليه المرض مايعرف الزين والعيب
مايدري انك للمخاليق هيبه !!
ابسالك وش به غزا وجهك الشيب
والقلب لايع والنواظر شحيبه
وش بك تحاتي لانوى الموت تغريب
تخشى علينا بالليالي الكئيبه
خذ دلتك واركى على مسند الجيب
وعطني شماغك بلثمه واحتمي به
ونروح لارض بها العشب والطيب
وتسمع كلام يالغلا تحتفي به
يابوي بنتك لاانحكى بالتجاريب
كل يشق لهيبه الصيت جيبه
يابوي ماني من سوات المخاريب
اللي تجيب لعليه القوم خيبه
وماني من اللي لامشت حفها الريب
انا من اللي مايدنس حليبه
مرفوع شاني عن غرام المكاتيب
واكبر من انني ارتضي بالحبيبه
انا غرامي لاابتدوا بالتراحيب
نفوس الاوادم في وجودي رحيبه
وان كان زيني فتنه للمصاويب
احط وجهي بالحريق ولهيبه
زيني ابيعه واشتري سمعه الطيب
اسم ينومس بالصروح الذ هيبه
وان كان عندي ( بالحلا) شي اصعيب
عندي جدود مارضت بالغليبه
دموع القبايل في لقانا مساكيب
كن المقابر لاحضرنا قريبه
خضبت لك كفي من العز تخضيب
ورفعت راسي للنجوم الصعيبه
والله لاسدك بالفعول المصاليب
والله لاشيلك بالرخا والمصيبه
طلع المعالي ماانحكم للشواريب
بنت واناطح فارس القوم طيبه
وياشيخي ابشر لوتدور الدواليب
بنتك الا منه عوى الذيب ( ذيبه)
والله اني لو رخصت العمر كله في رضاك
مايوفي ربع حقك وانت حقك مايهون
يايبه ياتاج راسي يا عسى عمري فداك
ياغناتي والله انك لو تبي عيني تمون
خمسه وعشرين عام ماترددت بعطاك
ياشبيه الغيث لامن ساقته غر المزون
ترتجيني ياعسالله مايخيب لك رجاك
صاين عهدت الاهك باليدين وبالمتون
الحقيقه وانت تدري ما يعززني سواك
والسبب واضح على اللي يدركون و يفهمون
والشعر وان كنت بمدح بالشعر هذا وذاك
انت حقك فوق هامات القصايدواللحون
العفو واستغفر الله بس احس انك ملاك
ساع تجلس واتكلم يمتلي صدري سكون
واتطمن واملك الدنيا بجلساتي معاك
وان تنهض عز طرفك تنكسر كل العيون
والله اني لو كثر خيري فانا خيري ذراك
ويش اكون؟ شوفني رجال كامل بس دونك ..
ووش يكون العمر من دون اجتهادي في غلاك
ووش يكون العطف والرحمه بدونك وش تكون؟
يايبه تكفى لعاد تشيل هم في حشاك
يكفي انك قد تجرعت الليالي والغبون
يايبه يانور عيني شب عمري في هناك
والله انه ابرد امن الما على كبدالظعون
يايبه ياجعل روحي فدوه لموطى خطاك
حطني بينك وبين الوقت وكبار الطعون
يايبه ياجار كبدي انذبح ولا اعصاك
عقب اللي قولوا وقالوا وهم مايفعلون
العمر والنفس واللي املكه كله فداك
واعرف انه ربع حقك وانت حقك ما يهون
كلمه شكر يابوي ماتوفي الشعور..
واحساسي صوبك يابعدي اكبر كثير..
مهما شكرتك لازم اشعر ب القصور*
بنتك يابوي دايم تشوفك كبير …
غالي يابوي وقلتها بقلب فخور*
يا تاج احطه فوق راسي وين اسير ..
يا اللي غلاك ب قلبي باني له قصور*
قلبي بلادك و انت يابوي الامير
تتكحل عيوني و يغمرها السرور*
كل ما اشوفك مبتسم قلبي يطير
( يانور كل ماشفته زاد ب وجهي نور*
مدامك انت بخير هالدنيا بخير )
و ان جيت الف الكون ذا كله و ادور*
بلقاك شي ب هالزمن ماااله نظير ..
