قصيده لصديق غالي
ابيات شعريه في الصداقة
كتبت انا في تالي الليل بيتين
لعيون من يسوى جميع الخلايق
اللي معاهدني على الزين والشين
واللي بشوفه يصبح الفكر رايق
الصاحب اللي منزله داخل العين
هو الخوي وقت السعه والضوايق
يا سائلا عني من القلب لبيه
صوتك عزيز وغصب عنا نلبيك
مثلك من الاجواد لا شك نغليه
ونفتح لك ابواب الخفوق ونحييك
واشري رضى من يشتريني وارضيه
واقول له بالروح والعين نشريك.
سر يا قلم واكتب من المدح ما طاب
في الي جزيل المدح يستاهلونه
ناس مزايين والرجا فيهم ما خاب
الروح والقلب فدى لهم لو يطلبونه
واكتب لهم شيك محبه مفتوح الحساب
يسحبون من رصيد الغلى وابد ما ينقصونه
اكتبه شعري عسى شعري يجود
بالحروف اللي حلاها من حلاك
كل حرف ما بلغ وصفك حسود
لعنبو قاف عجز يلحق مداك
لو اكتب احساسي بالاشعار وابديه
فيك المشاعر كيف بس اختصرها
قدرك كبير ويعجز الشعر يوفيه
كل القصايد فيك ينضب بحرها
ارفع يديني واسال الله وارجيه
ينجيك من شر الحياه وكدرها
من رافقك والله حشا ما يخليك
لو عاشرك كل الدهر ما يملك
انا اشهد اني حرت مدري وش اسميك
كل الخصال النادره ينتمن لك
الطيب كنه شابك ايديه في ايديك
ان كان له صاحب فهو صاحب لك
