قصيده جحا للفنان هشام الجخ
هشام الجخ هو شاعر مصري معاصر لديه العديد من الدواوين الشعريه المسجله صوتيا حيث لم
يقم الجخ بكتابه دواوينه الشعرية. من ابرز ما قدم هشام الجخ قصيده جحا دعونا نقرا
كلماتها سويه :
(جحا)
عن حال مصر
شعور سخيف
انك تحس بان وطنك شيء ضعيف
صوتك ضعيف
رايك ضعيف
انك تبيع قلبك وجسمك
وانك تبيع قلمك واسمك
ما يجيبوش حق الرغيف
سالوا جحا عن سر ضحكه
قالك اصل اتنين وشبكو
اللى كان من تحت ميت
واللى كان من فوق كفيف
دا شعور سخيف
وشعور سخيف
انك تكون رمز الشحاتة
تبنى مبنى للشحاتة
تعمل وزراه للشحاتة
يا ساقيه دورى … عدى فوقى ودوسى
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى انا اتغميت
انا اللى صاحب البيت
عايش بدون لازمة
ولما مره شكيت
ادونى بالجزمة
انا اللى زارعك دهب
بتاكلينى سباخ
ان كان ده تقل ودلع
بزياده دلعك باخ
لا شفت فيكى هنا
ولا شفت فيكى ترف
كل اللى فيكى قرف
كرامتنا متهانة
واللقمه باهانة
بتخلفينا ليه لما انتى كارهانا
يعنى ايه تبقى انتى هبه النيل يا مزة
وكل يوم الميه تقطع
يعنى ايه لما اشتكى غلو الفاتورة
يقولو تشكى بس تدفع
لما قش الرز ثروه بتتحرق
واما نفط الامه ثروه بتتسرق
واما جلادك على ولادك بيبطش
واما علمك ما يلاقيش ياكل فيطفش
يعنى ايه نرفع ايدينا بالسلام لجل الغزاة
ويعنى ايه لما ابقى ماشى فى حالى اتشد اشتباه
يعنى ايه لما اتحبس اربع سنين حبس احتياطى
يعنى ايه مش حاسه بالعمر وغلاوته
بتصبى مر العمر ليه
ده انا كنت ح اوهب لك حلاوته
انا عمرى ما اتامرت
ولا حطيت شروطى
ومكان ما ترسى مركبك بابنى شطوطى
انا كنت جيشك لما مماليلك باعوكى
وكنت يوسف لما عشتى سنين عجاف
وضلوعى دى اللى فى معركه قادش حموكى
وشفايفى دى اللى ما بطلتش فى يوم هتاف
ده انا كل شبر فى ارضك اتمرمغت فيه
وكل يوم عشتيه
انا اتغذبت بيه
بتكرهينى عيونك السودة
وايامى اللى فاتت
مانتيش حبيبيتى من النهاردة
حبيبنتى ماتت
علا صوت ادانك جرس
فى الشده صاحينلك
من امتى كانوا الحرس
هما اللى باقينلك
بعتينى علشانهم
وعنيكى معصوبة
ياهلترى خاينة
ولا زيى مغصوبة
كل الكلام اتقال
والشعر بقى ماسخ
والصبر علو جبال
والظلم شىء راسخ
وطن وغرقان فى النطاعة
كل شىء ريحته نطاعة
علمونا بالعصاية
ورضعونا الخوف رضاعة
علمونا فى المدارس
يعنى ايه كلمه قيام
علمونا نخاف من الناظر
فيتمنع الكلام
علمونا ازاى نخاف
وازاى نكش
بس نسيوا يعلمونا الاحترام
فمتزعلوش
لما ابقى مش باسمع كلامكم
وماتزعلوش لما ابقى خارج عن النظام
مستنى ايه من طفل ربوه بالزعاق
غير المشاكل والخناق
كل اللى بيقولك بحبك دول نفاق
انا لما قلت لك بحبك
كان نفاق
الحب يعنى اتين بيدوا
مش ايد بتبنى وستميت تيت تيت يهدو
الحب حالة
الحب مش شعر وقوالة
الحب يعنى براح فى قلب العاشقين للمعشوقين
يعنى الغلابه يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى اعيش علشان هدف
علشان رسالة
يعنى احس بقيمتى فيكى
انى مش عايش عوالة
يعنى لما اعرق تكافئيى بعدالة
الحب حالة
الحب مش شعر وقوالة
الحب حاجه ما تتوجدش فى وسط ناس
بتجيب غداها من صناديق الزبالة
بارت مراعينا والبئر قد جف
والجوع يكوينا والصبر ما كفى
والقلب لا يهدا والجرح لا يشفى
ولاننا طوع
زنا لهم خفا
جاءوا بموكبهم
واشتغلت الزفة
الدفه مظبوطة
واصلا مافيش دفة
والكفه مش مايلة
علشان مافيش كفة
و جحا اللى جاى بالليل لساه بيتخفى
شايف ديدان الغيط سارحه ومارحماشى
من جبنه شاف الدود سابه وراح ماشى
ولا اتكسف للناس
ولا حس على طوله
الناس عشمها كبير جريوا بيشكوله
ضحك جحا ضحكه مواشى
مادام بعيد عن طينى … ماشى
الدود قاعد لك يا جحا ولابد فى طينك
بعد ما يمص فى دمانا مش حيحلاله الا طينك
احنا اهلك
احنا رجالتك
امانك
احنا وقت الشده سندك
احنا زادك
يا جحا احمى ولادك
لو كنت عايز تحمى طينك
سوف ارحل
ربما يلقانى من ارجو لقاه
هامشى ويا الشحاتين
وابكى على حلمى اللى تاه
بس مش هاشحت رغيف
هاشحت وطن لله
