قصتي مع الرجيم الاسبوعى
طبعا الي متعود يدش كل يوم هني راح يعرف اني يديده و بصراحه انشديت لمواضيعكم
لاني صج اشاركم بهدف الرجيم و الاستمراريه طبعا لانه اغلبنا و اولكم انا كنت اسوي
رجيم محدده تاريخه لييش؟ لانه عندي مناسبه و استقبال و عرس و يمعه و عيد
و و و و الخ و هذي مشكلتي اني ما استمر الي ان وصلت مرحله
بفضل الله استمريت 6 شهور فيها و نزلت بحمد الله و فضله 33 الى 35
كيلو و بدون حرمان ولا تعب لانه نزولي كان على بطء و بدون ترهلات لله
الحمد لانه تمسكت بسلاحين ( الرياضه + نظام غذائي)
اول خطواتي كانت مع الدكتور طالب الشمري .. استمريت مع رجيمه شهرين و كملت بروحي
بدون لا اروح بس طبعا غيرت اشياء و ظفت اشياء من عندي على حسب حاجتي
..
كنت 135 و الحين انا 100 طولى 169 الحمد الله على كل شي صحيح اعتبر
ليلحين متينه ووايد بعد بس هال 30 كيلو خلوني انسانه ثانيه ما تتوقعون شكثر تغيرت
بالاكل و بالحركه و بالسفر صرت صج احب الحياه و ابي اتسوق و ابي اتشرى
عكس قبل
اكثر شي ضعف فيني ويهي و بطني و بديت اتخصر شوي طبعا كل شي بحسابه
اذا شديت حيلي بنادي بين اسرع .. انا الحين اروح 3 الي 4 مرات النادي
امشي نص ساعه و اسوي تمارين بين فتره و فتره على حسب وقتي
و ما اقص عليكم خلال هال 6 شهور كنت اخربط 4 مرات بالشهر الى 6
مرات بس كان تخربطي بالاكل مسيطره عليه سواء اعوضه الاسبوع الياي التزام 100% اكل و
رياضه او اني اشرب 3 اكواب باليوم جاي اخضر
الككاو ليلحين اكله برجيمي بس مو اى نوع اذا كان العادي لازم حجم صغير و
اذا كنت ابي اخذ راحتي بالككاو اخذلي دارك بحيث يفيدني مايضرني
بالنسبه لبطني طبعا الكرشه راحت الحمد الله لييييييش مو بس لاني اسوي رياضه و رجيم
لاء .. لاني ما اشرب سوائل اثناء الاكل كنت اتصبر العطش لمده ساعه الي ساعه
و نص والحمد الله الكرشه اختفت بالنسبه حق جسمي
وبالنهايه ابي اكمل الي بديته و محتاجه تشجيعكم و مشاركاتكم والي تبي تشترك حياها الله
نظامي الي نزلني هال 35 كيلو
عالريج ماي دافي قطره ليمونه و نص قفشه عسل ( تنظف الجبد و المعده )
الريوق بعد نص ساعه من الماي
لاتيه او كافيه امريكانو بدون سكر او سكر نباتي او رجيم انا ساعات احط سكر
اسمر
بعد ساعه او ساعتين اكل 2 توست مع تيركي و جبنه لايت او لبنه لايت
مع خيار و طماط او مرتيدلا مع جبنه لايت
ساعات استبدل التوست بكتكات او بسكوت مالح 3
الماي ما يطيح من ايدي طبعا بس بشرط انه مو مع الاكل يا قبله او
بعده بمده + جاي اخضر حزه الضحى
عالغدا :
اي شي مشوي .. مثلا 2 صدر دياي او فيليه سمج 2 او همبرجر مشوي
2 الى 3+ سلطة
ساعات اشتهي سلطه ثقيله صلصتها شوي فا استبدل المشوي بسلطه حجمها كبيرحتى لو فيها مايونيز
لايت
العصارى
جاى اخضر او جاي حليب او لاتيه
العشا
شوربه مرات او سلطه او روب او قهوه مع شابوره على حسب يوعي
طبعا … العشا ما يتعدا الساعه 7 او 8 حد اقصى اكثر شي يحرق تقليل
العشا
موفقييييين جميعا و يارب تجربتي تكون مفيده و انا من باجر مبلشه مره ثانيه وياكم
و الحين انا وزني 100 و من الحين لي اخر 7 يعنى تقريبا على 26
-7 اتمنى انزل 6 كيلوالى 8 بصحه و عافيه و يارب التوفيق للجميع ان شاء
الله
