انواع ديكورات واسمائها بالصور
موضوعنا اليوم دسم و ممتع جددا ..
راح اسرد جميع انواع الديكورات بمميزاتها ..
ان شالله توضح لكم الفروق بين الديكورات وتكون التدوينه مرجع للي حاب
يتعرف على الستايلات في الديكور .
الطراز الكلاسيك ( التقليدي ) :
الطراز التقليدي من اسمه ، فيه عبق الحضاره القديمه ، فيه لمحه من
القرن الثامن عشر البريطاني و الفرنسي و من جمال الحضاره العربيه القديمه .
– قطع اثاث تقليديه الشكل .( تصميمها في انحناءات وتكثر الاشكال الدائريه)
– ترتيبات متناظره من ناحيه توزيع الثاث و الابجورات واللوح وغيره .
– الوان تكون غالبا من درجات البرونز والبيج وتكون دافئه ،
وكثره الخشب الغامق
– الاقمشه فيه مزخرفه بورود ومتكلفه .
– الاكسسوارات لها وجود كبير ، الفازات و استاند الشموع
واللوح بالفريم الذهبي .
– يندرج تحته الطراز الفرنسي و الطراز الفكتوري .
+ الطراز الفرنسي :
ابهه ودلع ، كثره الزخرفه وتكرارها في اغلب قطع الغرفه من نقش على الخشب الى
الاقمشه ،
اللون موحد في كل الاثاث و الاكسسوارات ،
وفي لحف السرر تكثر الكسرات والنفخات زي ملابس ماري انطوانيت ههههه
+ الطراز الفكتوري :
الطراز الفكتوري اكثر جديه من الفرنسي ، يتشابهون في كثره الزخارف والنقوش ،
لكن الطراز الفكتوري يعتمد الالوان الغامقه اكثر
الطراز العصري ( الحديث ) :
الستايل العصري بدا من بعد الثوره الصناعيه ومع بدايه القرن العشرين عشان كذا
نلاحظ فيه كثير استخدام للحديد وقله الخشب فيه ، متنوع ، ساعات يجي باناقه ،
بين اللون الابيض و الاسود ، او الابيض و الفضي ،
و ساعات يجي بشقاوه ونشاط ، مليان الوان ودرجات متفاوته ،
الي يميز الستايل العصري انه يتميز بقطعمتميزه ،
طاوله شكلها غريب ، او لوحه برسمه غير مفهومه ، او ابجوره لها تصميم مبتكر
..
هذا الستايل يعبر عن جيله . جيل الاختراعات والابتكارات الحديثه ،
الشخص الي يحب الفن الحديث تلاقيه دائما يعيش
في مكان بستايل عصري .
– مكان واسع وغالبا فيه مساحات فارغه .
– قطع الاثاث تجي بزاويا قويه ، مثلا كنبه بشكل مربعي او مستطيله ،
( لا توجد انحناءات وتصاميم دائريه )
الطاولات بزوايا ساده بدون اي زخارف .
– قله الاكسسوارات ، يكتفي بفازه و ورده مثلا .
– الالوان مالها الوان معينه . لكن يتميز بقله تعدد الالوان في المكان الواحد .
– الاقمشه ساده
الطراز الحديث لو بحثتي عنه بالانجليزي راح تلاقيه يجي على اسمين
Contemporary – Modern
متشابهين كثير لكن في فروق بينهم .
الستايل الكونتمبروري ماله تاريخ معين هو يعتمد على الموضه الان ايش ..
ايش الالوان الدارجه ، ايش اللوح الجديده ايش التصاميم الحديثه ،
هو وليد لهذا العصر ، بعد ١٠ سنوات راح يكون شكله مختلف ، يعنيهو مجموعه
من
التصاميم الحديثه ،
هو اكثر مرونه من المودرن ممكن يجيكي ياخذ شويه من الستايل الكلاسيك
شويه من الستايل الريفي وهكذا .
الستايل المودرن ، مايتغير تجيه بعد ١٠ سنوات تختاري نفس الستايل تمشي تحت
نفس القوانين .
راح اوريكم الفرق بالصور .
هذه صور للطراز Modern
محاوله شديده في الابتعاد اقصى بعد عن الطراز الكلاسيك .. التضاد تماما ..
الطراز الكلاسيك مزدحم بصريا و فعليا ،
مزدحم بالاثاث والنقوش لكن المودرن جا بعده العكس ، بساطه جدا ..
وهذه صور للطراز Contemporary :
كل صوره لاحظو فيها قطعه مبتكره ،
الغرفه منعشه وفيها عناصر اكثر من غرف الطراز المودرن
ان شالله وضح الفرق بينهم ..
الطراز الانتقالي :
الطراز الانتقالي مختلط بين الطراز التقليدي و العصري ..
– قطع الاثاث مختلطه بين الخطوط المنحنيه والمستقيمه بزاويا .
– اللون الغالب فيه الابيض مع قليل من درجات لون فاتح .
– الاكسسوارات موجوده بدون تكلف .
-الاقمشه غالبا تكون ساده و تطعيمه صغيره ،
تكون هندسيه او مزخرفه كخداديه مثلا .
طراز الريترو:
( الحقبه من الخمسينات الى السبعينات )
ستايل الريترو ستايل ممتع جدا و منعش مليان الوان واشياء تونس
حلو لمحبين ( ايام الطيبين هههههه )
اذا بتسوي ديكور ريترو في بيتك امشي مع هذه النقاط
– الوان ساطعه ومتناقضه .
( كثره استخدام البني و البرتقالي و الازرق والاخضر )
– اثاث بتصاميم جريئه وغريبه .
– رسمات متكرره بنمط معين .
– تواجد واضح للاكسسوارات واللوح الفنيه .
الطراز الانتقائي :
هذا الستايل تقريبا هو الي ماشي عليه الاغلب بدون مايلاحظ .
هو الاسهل و الاقرب لقلب اغلب الناس لانه عباره عن :
اختار و نسق اللي يعجبك
ستايل الكنب والكراسي و الطاولات والابجورات مافي حدود
ماعندك مشاكل .. خبط لزق هههههه
لكن اذا تبغي المكان يطلع جميل وانيق نسقي الالوان
واذا ماعندك مانع يكون المكان خليط الوان توكلي على الله هههههه
عند الاجانب دايما محبين هذا الستايل يكونو ( بوهيميان )
لانه يكون عندهم قطع اثاث غريبه ماتمشي مع اي ستايل هههههه
وهم بطبيعتهم مايمشو تحت اي قواعد او قوانين
و كمان الي يكون عندهم قطع قديمه جدا برضو يطبقو هذا الستايل
طراز world flair :
هو التنسيق على ديكورات وحضاره بلد معين
ديكور اسيوي ، هندي ، مغربي ، افريقي ، اسكندنافي ،
بوهيميان توسكاني،،، الخ
الطراز الريفي ..
هذا الستايل يندرج تحت الكثير من الستايلات المعروفه :
الطراز الساحلي ، الطراز الكوخي ، الطراز الفرنسي الريفي ،
طراز الشابي شييك ، الطراز البريطاني الريفي
الطراز الريفي اهم شي فيه يكون مريح ويعطي شعور بالاريحيه وكان
الجلسه والكنبات تقولك تعال اتسدح هنا هههه ، كثره الخداديات والثرو .
تنوع اقمشه الكنب او السرير او الخداديات من مميزات الطراز الريفي .
واعاده استخدام الاشياء من ديكورات هذا الستايل ( DIY )
كل الستايلات تحت هذا الطراز فيها دفء وحميميه وراحه نفسيه .
و تشترك في وفره عناصر الطبيعه من خشب واستخدام للويكر ( الخيزران )
و تواجد الاكسسوارات بشكل كبير ، وكثره قطع الاثاث و الورود والنباتات .
راح اذكر النقاط الي مش متشابهه بينهم وكل ستايل يتميز فيها عن غيره .
+ الطراز الساحلي :
– تواجد اكسسوارات بحريه .
– اللون الابيض هو اللون الام ويضاف له الازرق غالبا او الاخضر او البرتقالي .
+ الطراز الكوخي :
– عدم الاعتماد ابدا على اللون الابيض ، بل على لون الخشب .
– وجود قطع اثاث عتيقه .
– بساطه جدا في الديكورات ( متواضع )
+ الطراز الفرنسي الريفي :
– الاثاث فيه اكثر فخامه من باقي الستايلات
– تواجد اطراف هدب للكراسي و الكنب .
– اعتماد اللون البيج ودرجاته اللون الاساسي .
– اقمشته غالبا ساده مع القليل من الزخارف الفرنسيه .
+ الطراز البريطاني الريفي :
– الوانه بين درجات الاحمر والازرق و الاخضر .
– تواجد الكتب بشكل ضروري ميزه من ميزاته .
– كثره اللوح و الفريمات .
– تواجد الاقمشه المورده بشكل قوي وكذلك ورق الجدران المورد .
( قله الاقمشه الساده ) .
– تعليق الصحون على الجدران ( الستايل هذا مافيه جدران فاضيه )
+ طراز الشابي شييك :
– خليط بين الطراز البريطاني و الفرنسي في بعض الملامح .
– اللون الرئيسي الابيض و الوردي واحيانا درجه فاتحه من
الازرق او الاخضر .
– يتميز بقطع الاثاث الفينتج ( الي تجي رايح لونها هههه )
– مبالغه جدا في الاكسسورارات و الورود .
وبكذا شطبنا عالديكورات واهلها ههههههه
ان شالله يارب استمعتو ، وعرفتو كل طراز واساليبه ..
وعرفتو اي ستايل تنتمون له ..
وان شالله اشوفكم في تدوينه جديدة
في امان الله
