القلوب ان ماوفت لاحبابها ماهي قلوب
واعيني اللي كل ما ذعذع من الغربي هبوب
يحلا لها لون الغروب اللي يذوب قبالها
وياويل حالي كل مايحلا لها لون الغروب
تطري لي الريم اللعوب وسالفه ترحالها
وياجر قلبي كل ماتطري لي الريم اللعوب
حرمت امد ايدي على حاجه وانا مااقوى لها
من سافرت ريم الغلا صديت عن كل الدروب
ماهو قصور بالعذارى ، بس ذيك لحالها
من فارقتني ماخطف قلبي من الحور محبوب
ولا لقيت الجادل اللي تستحق احيا لها
لان القلوب ان ماوفت لاحبابها ماهي قلوب
والعشره اللي ماترد الروح ما نسعى لها
اما الوفاء اللي يستر الرجال من كل العيوب
والا الجفاء اللي يستر عيوب العرب فرجالها
مااقسى من فراق الجنوب الا فراق اهل الجنوب
ويلي على اللي كل ماتزعل تشد رحالها
اللي مذيرها العتب .. لا شبت بصدري شبوب
عييت اراضيها وهي عيت تطول بالها
كانت معي مثل النصيب يحدني من كل صوب
كانت دروبي من متاهات الضلل .. لظلالها
كانت هروبي لاشعرت اني بحاجه للهروب
كانت سماي اللي ليا ضاقت علي الجا .. لها
ليه اتحداني وانا في كل الاحوال مغلوب؟
ليه احرمتني من قهر عذالي وعذالها
ليه اتجاهلني وانا ماني جبان ولا كذوب
ليه ارخصت دمعي وانا اللي ما بكيت الا لها
ماترحم اللي له سنه كنه على النار محطوب
ماهزها دمع الفقيد اللي بكته اطلالها
ماخافت تهدم السنين اللي بنتنا طوب طوب
مافكرت تشفق على حالي وترحم حالها
قولوا لها لو ماتذوب انا بخليها تذوب
قولوا لها لو ماعنت لي مستعد اعنالها
اليا ادمحت لي هالخطا بدمح لها كل الذنوب
وان جابت الحسنه معي تبشر بعشر امثالها
افرش لها صدري وطن واجمع من ضلوعي شعوب
وارقى لها مكانه محد قدر يرقى لها
ان كاني مخطي فانا ماني خلي من العيوب
الذنب يغفر والبشر تجزا بقدر اعمالها
البعد قاسي والفراق يضيق الصدر الرحوب
وانا تعبت ادور الحيله وارد احتالها
قولوا لها ترجع ترى ماني على البعد مغصوب
والا ترى نذر علي انه ماهوب اشوالها
اما تجنب هالهبال وتترك البعد وتتوب
والا بتبشر بالهبال اللي ماهوب اهبالها
كافي زعل ترى الظروف مقفله من كل صوب
وانا حملت من الهموم انواعها واشكالها
يكفيني اني كل ماهبت على صدري هبوب
تحن عيني للجنوب وتلتفت بلحالها
والمشكله اني كل ما حنت عيوني للجنوب
تطري لي الريم اللعوب وسالفه ترحالها
ماصعب من فراق الجنوب الا فراق اهل الجنوب
