افكار هدايا لخطيبك او جوزك
المناسبات اللي بنحتاج نقدم فيها الهدايا للخطيب او الزوج كتيره ومختلفه زي عيد الميلاد عيد
الحب او عيد الجواز او حتى عشان نحسسه بالشكر والامتنان لوجوده معانا، لكن كل مره
بنقع في نفس الحيره حنجيب ايه؟ ويمكن ده لان الاختيار محدود في الهدايا المخصصه للشباب
او الرجال، بس حتى لو الافكار مكرره انتي تقدري تضيفله لمسه من عندك تخليها مميزه
جدا واحنا هنا جمعنالك شويه افكار هدايا لخطيبك او جوزك حتساعدك تخلي المناسبه ماتتنسيش.
قبل ما نتكلم عن الهدايا نفسها، حنتكلم في شويه نقط سريعه حتفيدك جدا عند اختيار
الهدية، وهي طريقةاختيار الهديه اللي حتخلي هديتك مميزه وحتخليه يفرح بيها ويقدرها.
طريقه اختيار الهدية
لازم تعرفي كويس اهتماماته يعني مثلا بيحب الكورة، بيحب الخروج، بيهتم بمظهره، بيهتم بعربيته، وطبعا
اكيد انتي عارفه هو رومانسي ولا عملي، بيحب المفاجات ولا لا .. يعني باختصار فكري
شويه في طبيعته وحتلاقي نفسك بداتي توصلي للحاجه اللي انتي عايزاه. ولو محتاجه مساعده في
موضوع شخصيته شوفي من هنا افكار هدايا لكل رجل علي حسب برجه
الحاجه التانيه المهمه هي ميزانيتك يعني لازم تحددي السعر اللي انتي بتتحركي فيه او المبلغ
اللي تقدري تصرفيه في مناسبه زي دي عشان تعرفي اختيارك مناسب ولا لا.
طبيعه المنابه اللي حتقدمي فيها الهديه كمان عليها عامل كبير، يعني عيد الميلاد بتبقى الهديه
شخصيه له هو غير عيد الحب اللي بتبقى الهديه فيه رومانسيه اكتر وفيها تقدير لعلاقتكم
سوا.
افكار الهدايا
اما بقى الهديه اللي حتتقدم نفسها فده حيتحكم فيها النقطه الاولى اللي اتكلمنا عنها في
البدايه اللي هي اهتماماته وطبيعته وحنبدا الاول بالهدايا اللي مش مكلفة
لو بيحب البلايستاشين ممكن تجيبي جويستيك وتقوليله ان ده عشان لما يكون بيلعب مع صحابه
ومبسوط يفتكرك ومينساكيش.
لعبه كمبيوتر او بلايستيشن لو كانت دي من اهتماماته.
جمعي صوركم سوا في البوم صور وحطي في اول صفحه من الالبوم ميموري كارد من
بتاعه الموبايل حطي عليها اغانيكم المفضلة.
هاتيله محفظه جلد وحطي فيها صورتك وورق صغير مكتوب فيه كلام رومانسي تعبري فيه عن
مشاعرك.
اطبعي صوركم على مج و خداديه وهاتي معاهم منبه عشان تبقى كل حاجه في اوضته
بتفكره بيكي.
كتاب او روايه جديده للكاتب اللي هو بيحبه.
اما بالنسبه للهدايا الاغلى شويه وطبعا الهديه قيمتها في معناها مش في تكلفتها، لكن لو
كانت ميزانيتك تسمح تقدري تجيبي حاجات تانيه زي مثلا:
ماكينه حلاقه كهربائية.
تي شيرت او بلوفر من الماركه اللي هو بيحبها او كرافته على ذوقك.
ساعه حلوه تليق مع ستايل اللي بس بتاعه كاجوال او كلاسيك.
جهاز بلايستيشن لو كان ده اهتمامه.
اكسسوارات للعربيه زي مثلا فرش كامل للعربيه من جوه وفي افكار كتير عند محلات كماليات
السيارات ممكن تتفرجي وتشوفي ايه اللي حيعجبه منه.
اشتري مشغل اغاني وفيديوهات وحطيله عليه اغانيكم وصوركم سوا.
جهاز رياضي لو هو مهتم بجسمه ووزنه واختاريه على حسب ميزانيتك.
طبعا كل الافكار دي محتاجه طريقه حلوه لتقديمها، ويمكن طريقه التقديم اهم من الهديه نفسها
وحتلاقي هنا برضه شويه افكار على حسب ميزانيتك وطبيعه علاقتكم سوا زي مثلا بتحبو الهدوء
والاماكن الهاديه او بتحبو الخروج والدوشه او مثلا لو بتفضلو الاحتفال في البيت.
طريقه تقديم الهدية
احجزي عشاء في مطعمكم المفضل او في مطعم هادي بيقدم اكلاته المفضله وبعد العشاء ممكن
تقدمي الهدية.
اتقابلو في المكان اللي اتعودتو تتقابلو فيه وممكن تاكلوا اكل انتي طبختيه بنفسك وبعدها قدميله
الهدية.
اعمليله سلسله مفاجات وقسمي الهديه تلاته ابعتي حاجه على الشغل وحاجه على البيت والتاله لما
تقابليه تديهاله بس خلي بالك من اسلوب تفكيره وفكري لو كان ده حيبسطه ولا حيحرجه.
لو هو متوقع الهديه في يوم معين زي عيد ميلاده استني يومين كانك ناسيه واعمليله
مفاجاة.
قبل معاد المناسبه بيومين او تلاته اطلبي منه تروحي مطعم معين وتكوني متفقه مع المطعم
لما تخلصو العشاء يطفو الانوار ويقدمو التورتة.
لو هو رومانسي، هاتي صندوق هدايا شكله حلو وحطي فيه ورق ملون صغير مكتوب فيه
كلام رومانسي وحطي معاه الهديه اما لو هو مش حيهت بحاجه زي دي ممكن تخبزي
بسكويت في البيت او كب كبيك وتحطيه في صندوق حلو وتقوليله انك عملاه عشانه.
في النهايه افتكري انك ممكن تقدمي هديه تذكاريه او بسيطه لكن طريقه تقديمها وتوقيت التقديم
ده حيخليها ذكرى ماتتنسيش.
