اغنية ابريق الشاي للاطفال

اغنيه ابريق الشاي للاطفال

ابريق الشاى /سيد الملاح

انا انا انا ابريق الشاي..
ايدي كده..
بوزي كده..
اصب الشاي وارجع كده..
واعرف باردو ياكتاكيت احكي حواديت..

كان في واحد اتنين تلاته..
ويا اربعه خمسه تاتا تاتا..
راحوا لعم علي الحلواني..
عايزين بسكوت بالشيكولاتة..
الحلواني يا اطفال..
فكر حبه وبعدين قال..
بسكوت بالشيكولاته مفيش..
يمكن فيه عند البقال..
البقال قال اشتروا سكر..
خدوا بفلوسكم كلها سكر..
احلى شئ في الدنيا السكر..
حتى اسالوا ابريق الشاي..

ابريق الشاي..
انا انا انا ابريق الشاي..
ايدي كده..
بوزي كده..
اصب الشاي وارجع كده..
واعرف باردو ياكتاكيت احكي حواديت..

كان ياماكان قفطان لونه احمر..
لابساه اموره اسمها مرمر..
وقطط رومي وديك فيومي..
وانا وانتم قاعدين نتنقور..
حاجه ظريفه وعال العال..
لكن فجاه حصل زلزال..
اتاريه الفيل ابو زلومة..
عمال يرقص في الادغال..

جوه الادغال الهندية..
الفيل بيغني اغنية..
ويقول انا وانتي يازلومتي..
نشبه سوا ابريق الشاي..
ابريق الشاي..
انا انا انا ابريق الشاي..
ايدي كده..
بوزي كده..
اصب الشاي وارجع كده..
واعرف باردو ياكتاكيت احكي حواديت..

كان فيه في بلاد العجايب..
حفله شاي لتلاته حبايب..
الدبه والبوبي والنملة..
والتعلب بره مالوش نايب..
التعلب قدامهم فات..
وفي ديله سبع لفات..
كل الحفله قالوله ياتعلب..
ابعد عنا عشر ياردات..
تعلوبه قال.. فيها يااخفيها..

واقلب فناجيلها وكراسيها..
وعشان اغيظكو واجننكوا..
راح اخبي ابريق الشاي..
انا انا انا ابريق الشاي..
ايدي كده..
بوزي كده..
اصب الشاي وارجع كده..
واعرف باردو ياكتاكيت احكي حواديت..

كان في واحد مزيكاتي..
ومعاه صاحبه مالفاتي..
غرقت بيهم المركب..
عاموا.. عاموا..
لجزيره القرصان زناتي..
الاتنين كانوا طوال وعراض..
انكمشوا بفعل الامراض..
بقوا كده من الامواج الساقعة..
والسمك البلطي العضاض..
القرصان قال.. اقفوا كويس..
اي اي اي ..احنا كده كويس..
يلا نخش عليه ونميس..
ونغني ابريق الشاي..
الغنوه دي مش عارفها..
طب يلا بينا نالفها..
انا انا انا ابريق الشاي..
ايدي كده..
بوزي كده..
اصب الشاي وارجع كده..
واعرف باردو ياكتاكيت احكي حواديت..
ودي يا اولادي قصه تاليف وكمان تلحين الغنوه دي..
انا انا انا ابريق الشاي..
ايدي كده..
بوزي كده..
اصب الشاي وارجع كده..
واعرف باردو ياكتاكيت احكي حواديت..