اشعار سودانيه رائعه 2020
الجنيات الحزمو الجبه وعرق الشتوي عليهم نايا و صبا
قول ما دله .. رجالا حصدوا الحبه
عيشون هادو انكال واتعبا ومنو كتير في الواطا انكبا وباقي مصوبر واقف قبه
الحمد الاف ..
الشكر الاف
العيش الرقد اصناف اصناف
الولد الكان عزام
.. حلاف..
.ضياف
الرزق الجانا مدلا
.. الحلق الجاف اتبلا
بالحيل ا جني ايي والله
********
الوادي الجانا مترقن
مدد جناحو الطايل شرقا وغربا
القبلي بروقو على القلعات اضربن
الدكن البعدن قربن
فوق صنقور المحله الطالت كبن
قول للمحله بيوتك خربن
قول ما دله.. الحلق الجاف اتبلا
بالحيل ا جني ايي والله
**********
مرحاتنا شرابهن يوت ماغبن
شبعانات في الشقل اب شوك ما شبن
الحمل ولدن وربن
حلماتن تقلن.. جرن.. فوق سيقانن كبن
اللبن العاتم في ضرعاتن جبن
المغصه ان كان ضرعاتن خربن
القرعه ا وليد .. السعن ا بنيه
القربه كمان… كبوها المية
المغصه ان كان ضرعاتن خربن
شوفو النعمه السالت فوق قيزان الرمله
ناس البندر لبن الشاي بالعمله
سمح الخمج الفوق اسيادو
سمح العز المن اجدادو
الجنيات المشو ما عادو
كان بالرد اكان اتنادو
غرب حامد وشرق بلة
كانوا بحلبو الضرع الدلا
كانوا بحضرو الخير القدحو معلا
الجنيات ما كفرت بنعمه الله
بالحيل ا جني اي والله
*****
جات في يوم والغيمه تهتف مطرا نقع
فوق نوار الطلح الفقع
ريحه البرد ان جاتك
عطرا فايت خمر الفوق اردافا مجدع
شفنا الوادي يقشقش في دمعات الليل
والتعل الشايل بدا يتفقع
تلب حامد فوق مخلوفه اب زور واتربع
طلق الرسن اب زمه وسوا خبيبا بدع
هود في رقاب الصي
لا قوه ثلاثه زبيدية
خالفين سيقانن فوق السنكيت
ورقاب البل بيناتن مرخيه
محجوبات بالخرز الفصلو السوميت
كل واحد درقه وسيف وطبنجيه وباقي جرابن مليان دلميت
الجنيات اتقبلو وضاقو الحاره وضاقو المره وكان حجازن صقر الجو
حامد كان عارفين ضاقوه رجال قبالكن
شوفو ارزاقكم اخير من ضو
حامد عوج الطندب
ا وليدات
عوج الطندب نار القصب الهبلت ما بتعدلو
شوفو شلوخو مطارق رقدن
وكل تلاته يمين سياف اتقبلو
حبوب القارح … ما دله
ولدا ما ختالن زلة
شن قولك فيهو عليك الله
بالحيل ا جني اي والله
***********
وين مراتع الدرت الباسط دايما ببكي عليهن
وين بنوت الحله البكر عصرا بدري يسون في شاهيهن
بعد الليل ما يهود ونحن نهود.. عاد اماتن ينادن ليهن
نمشي على القيزان نتقادم.. اقيس الخطوه مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم اب غنه اللهج السكر وين بلقاهو
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعينا بتدنقر من واليهن
الوجنات الشعن بقن
ود العين النايم زرقن
مو زايغ رسيان وميقن
زولن كان خدران ومحقن
من الشوفه عروقو يطقن
كان الدنيا ب صح تتخلا
كان بركنا معاهن في رملاه الحله
الا كمان بنشوفا مذلة
الجنيات الغابت جابت
انت الجيب ؟ بس قايلو قميص افرنجي ؟ وكرتونات كرمله ؟!
لا لا وحاتك حاشا وكلا
ديل يوم عادوا اتلافو الجاهل بحقوق الله
ديل كم لحقو البشهق ضايق وداوو العله
الولد الجاي حقايب سفرو تقال
.تقال من جنس كتاب ومجله
الحكمه النضم اياهو الكان.. الحكمه الولد اتوضا وصلى
عاده البلد الدخلت فيهم سكنت . سكنت ما ب تتخلا
نحن كمان طارين الحله ودرنا الطله
نشيلا معاهم فرح وميته
حلاه الموت كان في عبدله
حلاه الموت كان في عبدله
- حنة سودانية ميه الميه
- اشعار سودانيه جميله جدا
- اشعار سودانيه فى الشوق
- اشعار سودانية
- اشعار سودانيه
- صور اشعار سودانيه
- اشعار سودانيه مكتوبه
- كلام سوداني
- شعر حب سوداني دارجي
- أشعار رومانسيه سودانيه ٢٠٢٣
