**تشييييز كييييك بجيلي الفراولة**
طبعا ممكن بنفس الطريقه نحط التوبنج اي حاجه احنا عايزينها
هقولكم ازاي في الاخر
اهمممممم حاجه في التشيز كيك الصينيه تكون بقاعده متحركة
علشان تعرفي تغرفيها و تقدميها من غير ماتبوظ منك
المهم المقادير
لقاعده البسكوت:
1 و نص باكيت بسكويت
(انا جيبت داناش الاخضر علشان ريحته و طعمه حلوين)
نص كوب زبدة
نطحن البسكوت مع الزبدة
و نرصها طبقه في قعر الصينيه و نضغط عليها خالص و نساويها تماما بايدينا
و نحضر خلطه الجبنه اللي بتبقى في النص:
4 مثلثات جبن لافاشكيري
(و ممكن كيري او اي جبن مطبوخ تاني طري)
ملعقه كبيره دقيق
(اللي بناكل بيها مش الغرف)
2 كوب الا ربع لبن
(يعني كوب و ثلاث ارباع)
نصف كوب سكر
بيضة
كيس فانيليا
(طبعا المقادير ممكن تتضاعف زي مانتوا عايزين)
على حسب الحجم اللي انتوا عايزينه
و كلللل ده يتضرب مع بعضه في الخلاط و يتحط على طبقه البسكويت
و يتحط الكلام ده في فرن متوسط الحراره لمده نص ساعة
و بعد ما يخرج نسيبه يبرد
على ما الصينيه تخرج من الفرن نجهز الجيلي
مكتوب على باكيت الجيلي يذوب في 2 كوب ماء مغلي
**نصيحة**
علشان الجيلي يكون متماسك و لون اغمق واضح
تذوبي الجيلي في كوب و نصف ماء فقط
و تحليه ب3 ملاعق صغيرين سكر
و لما الجيلي يبرد و الصينيه كمان تبرد
نحط الجيلي على خليط الجبنة
و ندخلهم الفريزر علشان يمسك بسرعة
و قبل ما يتجمد نحطه في الثلاجه عادي بس تحت الفريزر مباشرة
في حركه خدعه بعملها علشان الفاكهه تكون جوه الجيلي و ماتذبلش او لونها يتغير
اشيل شويه جيلي على جنب ما احطهوش كله على الجبنه و احطه في الثلاجه علشان
يسقع بس مش يتجمد
و احط نصف مقدار الجيلي على خليط الجبنه و ادخله الفريز
و قرب ما يتجمد ارص عليه الفاكهة
(تكون جامده مش مستوية)
و اغرزها في الجيلي اللي بدا يتجمد
و احط عليه باقي الجيلي السائل الساقع و احطهم تاني في الفريزر
اول ما الطبقه التانيه تبدا تتجمد انزله في الثلاجه عادي
و يطلع شكلها زي الصوره ديه
انا عملت جيلي فراولة
فزينته بالفراوله و ممكن ازينه بالموز و ممكن اعمل تشكيله حلوه باللون الاحمر (الفراولة) و
الاصفر (الموز) و الاخضر (الكيوي)
اهم حاجه لو هتزينيه بفاكهه تمسحي وش الفاكهه بالفرشاه بجيلي من نفس لون الفاكهه و
ممكن جيلي شفاف
ممكن طبعا ماتحطيش فواكه و تعملي ورده صغننه بالكريم شانتيه على كل مثلث تقدميه
و ممكن بلااااش جيلي خالص و تحطي بداله مربى اي نوع بتحبيه
و ممكن تحطي التوبنج كراميل
ممكن شوكولاتة
زيييي مانتي عايزة
على حسب المتاح عندك
علشان تعملي كراميل زي اللي جوه شوكولاته مندولين و لا جلاكسي و الحاجات اللي تفتح
النفس ديه
في طريقه تخليه نفس الشكل و اللون و القوام
تجيبي علبه لبن مكثف
و تحطيها في حله فيها مايه بتغلي
و سيبيها لمده ساعه و نص
و بعد كده افتحيها و اتفرجي و دوقي و ذوووبي
ممكن طبعا تحطي مربي توت و لا فراوله و لا مشمش زي ماتحبوا
