اجمل قصائد للامير خالد الفيصل
قول من عدى على راس عالي
رجم طويل يدهله كل قرناس
في راس مرجوم عسير المنالي
تلعب به الارياح مع كل نسناس
في مهمه قفر من الناس خالي
يشتاق له من حس بالقلب هوجاس
قعدت في راسه وحيد لحالي
كني براس الرجم مذهب وحراس
متذكر في مرقبي وش جرى لي
وصفقت بالكفين ياس على ياس
قعدت اعد ايامها والليالي
دنيا تقلب ما عرفنا لها قياس
كم فرقت ما بين غالي وغالي
لو شفت منها ربح ترجع للافلاس
يا ما هفا به من رجال مدالي
ما كنهم ركبوا على قب الافراس
ولا قلطوهن للكمين الموالي
ولا صار فوق ظهورهن شلع الانفاس
ولا رددوا صم الرمك للتوالي
ولا ثار عج الخيل في كل مرواس
في حومه الهيجا لهن اجتوالي
كل يبي من زايد الفعل نوماس
من بينهم عود القنا والسلالي
مثل البروق برايح ليله دماس
يقطعك دنيا ما لها اول وتالي
لو اضحكت للغبن تقرع بالاجراس
المستريح اللي من العقل خالي
ماهو بلجات الهواجيس غطاس
ماهوب مثلي مشكلاته جلالي
ازريت اسجلهن بحبر وقرطاس
حملي ثقيل وشايله باحتمالي
واصبر على مر الليالي والاتعاس
وارسي كما ترسي رواسي الجبالي
ولا يشتكي ضلع عليه القدم داس
يا ابجاد شب النار وادن الدلالي
واحمس لنا يا ابجاد ما يقعد الراس
ودقه بنجر ياظريف العيالي
يجذب لنا ربع على اكوار جلاس
وزله الى منه رقد كل سالي
وخله يفوح وقنن الهيل بقياس
وصبه ومده ياكريم السبالي
يبعد همومي يوم اشمه بالانفاس
فنجال يغدي ما تصور ببالي
وروابع تضرب بها اخماس واسداس
لا خاب ظني بالرفيق الموالي
مالي مشاريه على نايد الناس
لعل قصر مايجي له ظلالي
ينهد من عالي مبانيه للساس
لا صار ماهو مدهل للرجالي
ومشكى لمن هو يشكي الضيم والباس
والبوم في تالي هدامه يلالي
جزاك يا قصر الخنا وكر الادناس
بحسناك يامنشي حقوق الخيالي
ياخالق اجناس ويا مفني اجناس
تجعل مقره دارس العهد بالي
صحصاح دو خالي ما به او ناس
وان ناشني من بعض الادنين صالي
ماني عن الزلات مخبر وبلاس
كالعنبر الغالى بالاسواق غالي
ولا درهم الفضه على صفر ونحاس
اجزيه بالصده جنوب وشمالي
واتلى هوى قلبي الى هب نسناس
متى تربع دارنا والمفالي
وتخضر فياض عقب ماهيب يباس
نشوف فيه الديدحان متوالي
مثل الرعاف بخصر مدقوق الالعاس
ينثر على البيداء سواه الزوالي
يشرق حماره شرقه الصبغ بالكاس
وتكبر دفوف معبسات الشمالي
ويبني عليهن الشحم مثل الاطعاس
