كلمات اغنيه الثوره للجدعان
سادد عليا النفس .. فاتح عليك النار
مش بالسلاح بهزمك .. لكن بسيل احرار
مابين ميدان وميدان .. هتلاقى برضه ميدان
مليان بثوره غضب .. والثوره للجدعان
قول ياخسيس بسمعك .. ردى صمود وثبات
وجعتنى وهاوجعك .. والعبره بالنهايات
اللى قتلنى جبان .. واللى خذلنى جبان
واللى نصرنى جدع .. والثوره للجدعان
مش هحلف بس اقسم بالله .. نخضع مستحيل
الثوره مستمره .. لو كان المشوار طويل
الثوره فى المدارس .. والشوارع .. والحيطان .. الثوره للجدعان
اول حروف الامل .. طلقه تساوى حياة
شايل عزيمه جبل .. صابه الرصاص نجاه
ياصبرك الفتان .. ياقلبك الانسان
واقفها وقفه جدع .. والثوره للجدعان
ياحضره العسكرى .. انا حضره الثاير
انا اللى حلمي ابتدا .. لبلادى فى يناير
ماكانش بالمجان .. حلم انى اعيش انسان
مايشيله الا الجدع .. والثوره للجدعان
