4:16 مساءً الجمعة 22 فبراير، 2019






رواية كوني ملاكي واياك من ناري

روايه كونى ملاكى واياك من ناري

بالصور رواية كوني ملاكي واياك من ناري 855c493036ed4cd3d43a29d296d691d9

كونى ملاكى …. و اياك من ناري

الجزء الاول

فى منزل السيد خالد …. ” ابو اياد” و الد دارين
وقفت دارين بعصبيه شديده ، و هى بتحاول تستوعب الكلام الى عم بحكيه ابوها ، و سالته و علامات الدهشه و عدم التصديق مرسومه بوضوح على و جهها
– انت عم تحكى عن ايهاب نفسه يلى اجي خطبنى قبل فتره !
الاب ” ابو اياد” – هو بذاته!!
– بس هادا يا بابا انا سبق و رفضته ، و قلتلك انى ما بدى اياه …. و انتهي الموضوع و تسكر … ليش عم ترجع تفتحه؟!
– لانه هادا شب ما بتعوض يادارين … ما في متله بين شباب الايام هاى واحد فهمان … و …
قاطعته دارين و هى بتحكى بهدوء
– قصدك تقول واحد تافه عديم الشخصيه … مو شايف بكل الدنيا حدا متله مغرور لابعد حد و انانى ما بهمه غير حاله …
ارتفعت حواجب ” ابو اياد” باستغراب كبيييير ، و سالها باستهجان كبير لكلامها

– ايهااب عديم الشخصية؟ بس ما يسمعوك بالبورصات العالميه و لا بالشركات الكبيره ، لانه عديم الشخصيه ما بتناسبه ابدا و العكس هو الصحيح … و تافه كمان ما بتوصفه ابدا ، لانه شب باول التلاتينات عنده شركات عالميه كبيره و الها فروع ببلاد مختلفه .. فاكيد اكيد ما حيكون تافه … و اذا على غروره في بشو مدايقك … و مين بيطلعله يكون مغرور غيره … عالاقل هو بيستاهل يكون مغرور … اعطينى شب بعمره حقق طموحات و انجازات و اعمال اد نص يلى حققها ايهاب !

– يعنى بابا مع احترامى لكل الى بتحكيه ، بس هادا مو من عرق جبينه و لا من مجهوده و تعبه ، هاى كلها مصارى اهله و عيلته … ما حدا بخفي عليه انو عيله ال——– من اكبر و اغني عائلات عمان ..
ابتسم ابو اياد بهدوء و هو حاسس انو عصبيه بنته كل سببها هو اعجابها الكبير في ايهاب و هو الشب الوحيد الى رغم انها عجبته بس ما ذاب من حبه الها زى ما دارين متعوده … ، حكالها بكل ثقه

– بما انك عارفه انو ابن عيله كبيره بعمان فاظن هاى ميزه جديده بقدر احكيلك انها بتخليه شب و لا كل شباب الاردن كلها واحد متله ابن ناس اكابر معاه كل هالمصارى و هو حاليا عم بدير كل شركات ابوه و اعماله بشكل كامل شو بده بكل بنات عمان من شوفه حاله ! او اي شب تانى مكانه رح يستفيد من ثروه اهله و مركزهم عشان يروح يصيع و يضيع و يعمل شو ما بده ، مش بيحمل مسؤوليه هالشركات لا و بكبرها كمان ..

كتفت دارين ايديها ، و لفت و جهها مش عاجبها مدح ابوها لها الشب ، و بلشت تهز رجلها بعصبيه متل عادتها لما تتوتر او تعصب .. و قالت بصوت مهزوز

– بس يا بابا انا ما طقته و لا حبيته … خلص … ما بدى اياه … شو هى الشغله بالغصب ؟!
تاملها ابوها بحنان كبير ، هاى بنته و بكره و حبيبه قلبه ، مشى باتجاهها و مسكها من اكتافها و حكالها بقمه الهدوء و الحنان
– و لو؟؟ ما عاش الى يغصبك على شى و انا عايش يا بابا بس انا ابوك و لما احس في شغله فيها مصلحتك ما بقدر ما احكيلك اياها و احاول اقنعك فيها .. ما بقدر اتجاهل الموضوع بس لانه مدايقك .. سميها غريزه حمايه … حنان اب شو ما بدك بس مصلحتك عندى اهم شى بالدنيا ، و انا لو ما شفت مصلحتك مع ايهاب كان اصلا ما فتحت الموضوع معك … هالشب و الله يا بابا عجبنى و عبي راسى .. زلمه اد حاله و فهمان … و اذا على العلم فمعه بدل الشهاده تنتين لا و الماستر تبعه من بريطانيا شو بدك احسن من هيك يا حبيبتى !
اطلعت دارين بابوها بحب كبير ، و لا شعوريا لقيت حالها عم تتمسخر على ايهاب من جديد و هى بتقول

– بريطانياااا؟ الله اعلم اصلا شو عمل ببريطانيا ، واحد معه كل هالمصارى ابصر شو خبص هناك ، او يمكن يكون اشتري شهادته كماان!!
ابتسم ابو اياد على عصبيه بنته و قالها برواء
– يا بابا … عيب هيك تحكى .. الشب محترم و سمعته متل الفل ما بصير تقعدى تشوهى صورته بهالطريقه ، و الله يا دارين ما في سبب لكل الى بتعمليه …

فكرت دارين للحظه … و بتردد رجعت سالت ابوها

– طيب … يعنى .. هو حكالك بده .. ايانى ؟؟؟!! …. قصدى طبعا … انه……مثلا …. رجع طلبنى منك كمان مره ؟! رغم انو سبق و رفضته؟!
بعد ابو اياد عيونه عن عيون دارين … و رجع بخطواته ليقعد على الكنبايه الى بغرفه القعده في بيتهم الكبير … و جاوبها بعد صمت
– بتقدرى تقولى هيك شى …
دارين و لعت … و على شو من الصبح قاعد بيقنع فيها ؟…. ضمت حواجبها بعصبيه و قهر و سالت
– شو يعنى بقدر اقول هيك شى ؟!! الجواب لازم يكون يا اه … يا لا … هو بده ايانى و لا لا؟؟؟
– مش بس بده اياك … و اصر عليك بشده كماان!

بالصور رواية كوني ملاكي واياك من ناري 0db96b7b777c25f39ab7bf7915e7e20c
رجعت دارين شعرها الاشقر الطويل لورا ضهرها بحركه غرور و تعجرف من كتفها ، و ظهرت ابتسامه انتصار ” غبية” على شفايفها و هى بتفكر انو ايهاب ال—— هى رفضته و هو رجع طلبها و اصر عليها … و بشده كمان ما انتبهت طبعا لعيون ابوها الى كانت عم تتاملها بحب و ابتسم و هو بسالها بمحبه

– شو سر هالابتسامه طالما انك ما بدك اياه؟ … ليش فرحت لما عرفت انو بده اياك ؟!
دارين خدودها و لعوا من الخجل و تمنت لو الارض تنشق و تبلعها ، و صارت بدها تحكى اي شى ينكر اهتمامها به .. الايهاب و كالعاده ، شنت هجومها عليه و هى بتحكى بنرفزه
– هادا انسان ما عندو قلب ، و لا بيعرف الرحمه ، كم شركه استغل انهيارها و حطم ما لكينها ليحصل عليها .. كم زلمه باع شركته لهالمحتال حتى يتخلص من ديونه اله ؟؟
– لا دارين … انت فاهمه الامور غلط .. الشركات الى عم تحكى عنها ، انقذها ايهاب من الانهيار .. يمكن يكون اشتراها من ما لكيها و صار هو المالك الرسمى الها ، بس انقذ كل العاملين فيها ، بدل ما يصيروا عاطلين عن العمل ، خلاهم على رؤوس عملهم و من حقه يصير المالك بعد ما دفع كل هالمبالغ الطائله .. اما بالنسبه للبيع ..فتاكدى انو ايهاب عمره ما غبن او ظلم صاحب شركه ، بالعكس يمكن بيعطيه تعويض احسن من اي رجل اعمال غيره

تلوت ملامح دارين و هى بتعبر عن غيظها
– انا بقول تعمله تمثال و تعلقله اياه على واحد من دواوير البلد ، و لا تنسي الجناحات بالله ، و الحلقه كمان فوق راسه … اسم انه ملاك على حد وصفك …. !
– دارين هالكلام ما منه فايده
– و انا ما بدى اياه …
– ما الك حجه تقولى ما بدك اياه .. مين بده يجيكى احسن منه .. المفروض تكونى مكيفه انه هو بده اياكى اصلا …
– نعم ..نعم .. خير ليش شو ناقصنى ؟؟
– دارين … انا طولت بالى عليكى كتير لانى بدى مصلحتك ..هالشب ازا ما اخدتيه برضاكى فرح تاخديه غصب عنك
تفاجات دارين بالصوت الى حكا من و راها
– يا عينى عليك يا ابو اياد .. هيك بدى اياك ، اصلا بنات هاليومين ما بيجو الا بالعين الحمره ، المفروض تخبرها عن موعد كتب الكتاب .. بس .. !
لفت دارين على اخوها اياد الى اصغر منها بسنه واحده بس .. و جاوبته و هى مولعه من العصبيه
– بحياه ربك انك تطلع منها …. شاطر تتفلسف بس … هادا الى كان ناقص … ال العين الحمره ال …
طنشها اياد و كمل كلامه مع ابوه
– شفت يا ابوى …. هاى البنت ما بلبقلها الا ايهاب …اصلا مين راح يقدرلها غيره ، خليه يربيها ..
– اسكت انت و تحكيش عن اختك هيك .
اطلع اياد باخته و تعمد يستفزها و هو بيقول
– اصلا يصحلك شاب متله ، اي بنات البلد كلها مستعدات يرتمو عند رجليه ، بس مشان الله اطلع فينا ….
وبنرفزه و عصبيه جاوبت
– صحتين و عافيه عليه و عليهم …
و عطول جاوبها
– عن جد ناس ما بتقدر النعمه ، لا و بترفسها كمان .. عالحساب عامله حالك ست متدينه و بتخاف الله ، ما بتخافى الله يحاسبك على هالشب الكامل الاوصاف الى بعتلك اياه ، و انت بكل تكبر و عناد رفضتيه و لااا بس شاطره تعملى زفه لا اهلك بدى اتحجب ، بدى اطلع عمره ، بدى ازور الكعبه …. كان بيقلد طريقتها بالكلام باستهزاء.. و كمل بعصبيه و هيك تحجبت و اهلك ما حد منهم متحجب …ما بكفى انو ساب متله مصر على بنت محجبه ، هاااى لحالها ميزه عظيمه بالنسبه لواحد بمركزه ، واحد غيره بكون بدو اياها فايعه و تاعت كوفى شوبات و موضه و ستايل و حكى فاضى .. سكت شوى و كمل .. بس مشكلتك ما بتشوفى ابعد من انفك .. بتعرفيش تفكرى بموضوعيه ، بس بدك تتكبرى على صاحباتك انك رفضتى واحد من اغنياء عمان ! …

كلام اياد لمس جواه قلبها ، يمكن لانه اول مره بحكى بهالجديه و العصبيه بنفس الوقت ، و خلاها تفتح عيونها على جوانب كتيره بالموضوع هى ما كانت منتبهه الها ، حست بالدموع عم تتجمع في عيونها لما فكرت انها ممكن تكون تافهه بنظر اخوها و ابوها لدرجه انهم يفكروا انها عم ترفضه لمجرد التكبر ، و بصوت مخنوق جاوبت

– لا يا اياد … انا مش هيك … و انت اكتر واحد بتعرف انى مش بنت تافهه عشان ارفض شب ممتاز لسبب غبى زى الى حكيته ..
– اثبتى كلامك .. و وافقى عليه .. هيك اعترفتى بنفسك انو شاب ممتاز …

عضت دارين على شفايفها ، بعد ما انتبهت انها فعلا مدحت ايهاب بنفسها ، و التفتت على ابوها الى كان يتابع الموضوع بلهفه و صمت ، و حست اديش نفسو انها توافق ….. ، و بخجل شديد ، خلت نظراتها عالارض و قالت
– بابا …….. بلغ ايهاب انى موافقه عليه ..

حكت كلماتها ، و طلعت ركض من الغرفه و هى مستغربه اديش كانوا ابوها و اخوها مبسوطين على هالقرار !!

بالصور رواية كوني ملاكي واياك من ناري 20160716 2569
_________________________________________________ _______________________________
بعد يومين
سيتى مول وقت الظهر

هلا خلص رولا جد هلكت ، مو قادره الفلف كمان ، بدى اقعد مشان الله ،، رجلى راحو …
رولا: هلا بنروح على ركن المطاعم بنتغدا ، و بنرتاح شوى
هلا: شو رايك نحكى مع دارين ، بركى اجت تغدت معنا
رولا بفرح يا ريت و الله ، اشتقتلها كتير ، حاسه حالى زمان ما شفتها ..
هلا يا عمى ما انت عروس ، و عجقه التجهيز اخدت عقلك !
رولا: انو انت مو عروس و عم تجهزى متلى و معجوقه و حالتك حاله ، اصلا انت عرسك قبلى ..
هلا: كله اسبوع حبيبتى و بتلحقيني
رولا: يا الله شو نفسى دارين تخطب و تتزوج متلنا .. !
هلا: الله يسامحها شو مغيوظه منها ، لانها رفضت اخر شب تقدملها ، و الله مواصفاته روعه ، نفسى افهم و جهه نظرها ..

رولا و هى بتحط مشترياتها على الطاوله الى اختاروها
– يا ستى هادا كلو نصيب و انا متاكده انو الله راح يوقف معها و يبعتلها عريس لقطه … دارين بتخاف الله و تحدت كل العالم حواليها عشان تتحجب ..
قعدت هلا عالكرسى و هى بتتنهد راحه بعد كل التعب و وافقت رولا على كلامها
– معك حق و الله ، يا الله عن جد انى اشتقتلها .. بدى احكى معها ..
فتحت هلا شنتتها تدور على موبايلها ، و تفاجات انو عم برن .. و حكت و هى متفاجاه ..:
– فظيعه شو بنت حلال هالدارين .. هايها عم بترن على و فتحت هلا الخط .. هلا و الله بالموادموزيل دارين ..
دارين اهلين حياتى كيفك ..؟؟
هلا انا تمام و الله ، بس غرقانه بجهازى و مع هيك مشتاقتلك مووت .. لسه عم بفتح الشنته بدى ارن عليكى …
دارين و الله … شو عدا ما بدا اتزكرتينا يا عرووووس ؟
هلا انا و رولا بالسيتى مول .. و ما هنلنا نتغدي بدونك ..
دارين مع صرخه استهجان و زعل ما الامكم ، كيف بتطلعوا من دونى ؟جد انكم … مش راح احكى ..
هلا ضحكت من قلبها و حكت لرولا بهمس حقدت علينا ليش طالعين من غيرها ..

بالصور رواية كوني ملاكي واياك من ناري 20160716 2570

سحبت رولا التلفون من هلا و حكت لا دارين
– يلا يا دارين عم نستاكى … معك ربع ساعه تكونى عنا .. ما راح ناكل من غيرك .

دارين يا الله شو مقهوره منكم ، مش متخيله كيف بتطلعو من غيرى ..
رولا و الله و الله و الله صدفه يا دارين ، اصلا انا كنت رايحه عالمل لحالى ،ن و هلا اتصلت فينى ، و لما عرفت انو في sale لحقتنى لحالها ، صدقينى ما كنا متفقين ..
دارين خلص ازا هيك سامحتكم ، شو بدنا نعمل ، عرايس و صايرات تنسو
رولا عقبالك يارب يا دارين ، تلحقينا عن قريب و تصيرى تنسى متلنا .. !

بعد ساعه عند صاحباتنا من جديد

دارين مممم ما اطيب الاكل زمااان ما اا اكلت براا !!
هلا انا صارلى دهوووووور ما اكلت براا لانوا بعد ما خطبت على طول الدايت شغااال !
رولا احم احم …. الله يعينك شو خطيبك نيئه ” دقر و صعب ” ، انا محمود حكالى ما اغير بحالى شى .
هلا بمزح و ضحك ياالله شو بتغارى منى و من حمزه ، بس بدك تتخوتى علينا ..

فقعت رولا من الضحك على طريقه هلا المعتاده في المسخره على تعليقاتها و حكت
– كيف عرفتى انى بغار ؟
هلا حبيبتى مبين عليكى ، صار لونك اصفر من الغيره
فقعوا التلاته ضحك على بعض ، و فجاه شهقت دارين و هى بتسالهم
– ييييييييى انا ما قلتلكم ؟؟؟؟؟؟؟؟؟؟؟؟
هلا و رولا بخوف و فزع
– شو خير ،،،،،، ايش في ؟؟؟؟؟
دارين ايها ب رجع طلبنى من بابا ، واياد و بابا كتير اصروا على انى اوافق عليه ، و حكولى كتير شغلات عنو ، و بصراحه اكلت بهدله مرتبه من اياد فاحترمت حالى و وافقت عليه ..
هلا و رولا … فتحو عيونهم على و سعتها مش مصدقين من الفرحه ، و بلشو يحكو مع بعض … طبعا ما حدا فهم على التانى … و لما الكل سكت ، حكت هلا بسرعه
– كيييييييييييييييف نسيت تحكيلنا هيك موضوع ؟؟؟؟؟؟؟؟؟؟؟؟؟؟
رولا ياربى شو فرحتلك يا دارين … !

طبعا دارين كانت مهيصه رغم الخووف الى كان معبى قلبها …. هجموا التنتين عليها يحضنوها و همى طيرانين فرح انها لحقتهم و حتصير مدام متلهم ……

هلا لسه هلا بقول لرولا قديشنى مقهوره لانك رفضتيه
دارين مع طيف ابتسامه سبحان الله النصيب نصيب …
رولا: متى هالكلام صار ، ما قلتيلنا !!!
دارين اول مبارح … و من كتر ما كنت مرعوبه و عم بفكر ، حسيت حالى مش قادره اخبر اي حدا عن الموضوع

خبطتها هلا على ايدها بحب و و بختها
– احنا اي حدا يا هبووله ؟
دارين خلص ما بعرف ايش ما لى !
رولا بضحك ، غمزتهم و قالت عادى حبيبتى ، عروس و بلشت

 

  • رواية كوني ملاكي واياك من ناري
  • رواية كوني ملاكي واياك من ناري pdf
  • روايات فيها زواج اجباري وعناد
  • رواية كوني ملاكي واياك من ناري الارشيف
  • كوني ملاكي واياكي من ناري
  • تحميل رواية كوني ملاكي واياك من ناري
  • رواية أنتي ملاكي وأياكي من ناري كامله منتدى روايتي
  • كوني ملاكي ومن ناري pdf
  • رواية كوني ملاكي واياك من ناري منتدى روايتي
  • كوني ملاكي اياك من ناري pdf
2٬898 views

رواية كوني ملاكي واياك من ناري