رباعيات صلاح جاهين مكتوبه كامله
اشعار صلاح جاهين مكتوبة
خرج ابن ادم من العدم قلت : ياه
رجع ابن ادم للعدم قلت : ياه
تراب بيحيا … وحي بيصير تراب
الاصل هو الموت و الا الحياه ؟
عجبي !!!
===============
ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!
===============
ياما صادفت صحاب و ما صاحبتهمش
و كاسات خمور و شراب و ما شربتهمش
اندم علي الفرص اللي انا سبتهم
و الا علي الفرص اللي ما سبتهمش
عجبي !!
===============
و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
عجبي !!!
===============
انا شاب لكن عمري الف عام
وحيد لكن بين ضلوعي زحام
خايف و لكن خوفي مني انا
اخرس و لكن قلبي مليان كلام
عجبي !!!!
===============
يا باب يا مقفول … امتي الدخول
صبرت ياما و اللي يصبر ينول
دقيت سنين … و الرد يرجع لي : مين ؟
لو كنت عارف مين انا كنت اقول
عجبي !!!
===============
احب اعيش ولو في الغابات
اصحي كما ولدتني امي و ابات
طائر .. حوان.. حشره .. بشر ..بس اعيش
محلا الحياة.. حتي في هيئه نبات
عجبي !!
===============
سهير ليالي و ياما لفيت و طفت
و ف ليله راجع في الضلام قمت شفت
الخوف … كانه كلب سد الطريق
و كنت عاوز اقتله .. بس خفت
عجبي !!
===============
كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع انه فات بدل التاريخ تاريخين
عجبي !!
===============
عجبتني كلمه من كلام الورق
النور شرق من بين حروفها و برق
حبيت اشيلها ف قلبي .. قالت حرام
ده انا كل قلب دخلت فيه اتحرق
عجبي !!!
===============
رقبه قزازه و قلبي فيها انحشر
شربت كاس و اتنين و خامس عشر
صاحبت ناس م الخمره ترجع وحوش
و صاحبت ناس م الخمره ترجع بشر
عجبي !!!!
===============
ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
اعدي بحر الاقي غيره اتحفر
عجبي !!!
===============
ورا كل شباك الف عين مفتوحين
و انا وانتي ماشيين يا غرامي الحزين
لو التصقنا نموت بضربه حجر
و لو افترقنا نموت متحسرين
عجبي !!!
===============
نوح راح لحاله و الطوفان استمر
مركبنا تايهه لسه مش لاقيه بر
اه م الطوفان واهين يا بر الامان
ازاي تبان و الدنيا غرقانه شر
عجبي !!
===============
علي رجلي دم .. نظرت له ما احتملت
علي ايدي دم.. سالت ليه ؟ لم وصلت
علي كتفي دم.. و حتي علي راسي دم
انا كلي دم .. قتلت ؟ ….. والا اتقتلت
عجبي !!
===============
انا كل يوم اسمع …….. فلان عذبوه
اسرح في بغداد و الجزاير واتوه
ما اعجبش م اللي يطيق بجسمه العذاب
و اعجب من اللي يطيق يعذب اخوه
عجبي !!!
===============
ينبوع و في الحواديت انا سمعت عنه
انه عجيب .. و ف وسط لهاليب لكنه
شقيت كما الفرسان طريقي .. لقيت
حتي الخنازير و الكلاب شربوا منه
عجبي !!!!
===============
يا قرص شمس ما لهش قبه سما
يا ورد من غير ارض شب و نما
يا اي معني جميل سمعنا عليه
الخلق ليه عايشين حياه مؤلمة
عجبي !!!
===============
شاف الطبيب جرحي وصف له الامل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني …. و ايه العمل
عجبي !!!
===============
اعرف عيون هي الجمال و الحسن
و اعرف عيون تاخد القلوب بالحضن
و عيون مخيفه و قاسيه وعيون كتير
وباحس فيهم كلهم بالحزن
عجبي !!
===============
ايش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينه كده
عجبي !!
===============
اقلع غماك يا تور وارفض تلف
اكسر تروس الساقيه و اشتم وتف
قال : بس خطوه كمان .. وخطوه كمان
يا اوصل نهايه السكه يا البير تجف
عجبي !!!
===============
يا حزين يا قمقم تحت بحر الضياع
حزين انا زيك و ايه مستطاع
الحزن ما بقالهوش جلال يا جدع
الحزن زي البرد … زى الصداع
عجبي !!!!
===============
في يوم صحيت شاعر براحه و صفا
الهم زال و الحزن راح و اختفي
خدني العجب و سالت روحي سؤال
انا مت ؟ و لا وصلت للفلسفة
عجبي !!!
===============
الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش ان الفلاسفه يا هوه
اللي يقولوه بيرجعوا يكدبوه
عجبي !!!
===============
علي بعد مليون ميل من ارضنا
من الفراغ الكوني بصيت انا
لا شفت فرق بين جبال و بحور
و لا شفت فرق ما بين عذاب او هنا
عجبي !!
===============
انسان ايا انسان ما اجهلك
ما اتفهك في الكون و ما اضالك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!
===============
نظرت فوق للنجوم و انا ساير
رجليا عترت في الحفر و الحجاير
بقيت اقول و انا ع التراب: يا سلام
مش بس عبره اخذت لكن عباير
عجبي !!!
===============
– يا نجم .. نورك ليه كده بيرتجف ؟
هو انت قنديل زيت ؟ او تختلف
– انا نجم عالي .. بس عالي قوي
و كل ما انظر تحت اخاف انحدف
عجبي !!!!
===============
السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
.. و العبد للشهوات .. منين هو حر؟
عجبي !!!
===============
وقفت بين شطين علي قنطرة
الكدب فين و الصدق فين يا تري
محتار ح اموت .. الحوت خرج لي وقالي
هو الكلام يتقاس بالمسطرة
عجبي !!!
===============
سرداب في مستشفي الولاده طويل
صرخات عذاب ورا كل باب وعويل
.. وفي الطريق متزوقين البنات
متزوقين للحب و المواويل
عجبي !!
===============
الدنيا اوده كبيره للانتظار
فيها ابن ادم زيه زي الحمار
الهم واحد .. و الملل مشترك
و مفيش حمار بيحاول الانتحار
عجبي !!
===============
ايوب رماه البين بكل العلل
سبع سنين مرضان وعنده شلل
الصبر طيب .. صبر ايوب شفاه
بس الاكاده مات بفعل الملل
عجبي !!!
===============
نسمه ربيع لكن بتكوي الوشوش
طيور جميله بس من غير عشوش
قلوب بتخفق انما وحدها
هي الحياه كده .. كلها في الفاشوش
عجبي !!!!
===============
يا طير يا عالي في السما طظ فيك
ما تفتكرشي ربنا مصطفيك
برضك بتاكل دود و للطين تعود
تمص فيه يا حلو .. و يمص فيك
عجبي !!!
===============
كروان جريح مضروب شعاع م القمر
سقط من السموات فؤاده انكسر
جريت عليه قطه علشان تبلعه
اتاريه خيال شعراء و مالهوش اثر
عجبي !!!
===============
ياللي نصحت الناس بشرب النبيت
مع بنت حلوه .. وعود , وضحك , وحديت
مش كنت تنصحهم منين يكسبوا
تمن ده كله ؟ … و الا يمكن نسيت
عجبي !!
===============
ما حد في الدنيا واخد جزاته
و لا حد بيفكر في غير لذاذاته
ما تعرفيش يا حبيبتي .. انا و انتي مين؟
انتي عروس النيل … و انا النيل بذاته
عجبي !!
===============
رقاصه خرسا و رقصه من غير نغم
دنيا . . يا مين يصالحها قبل الندم
ساعتين تهز بوجهها يعني
يترجرجوا نهديها يعني نعم
عجبي !!!
===============
اخطفني ياللي تحبني ع الحصان
الدنيا قالت يوم في ماضي الزمان
اخطفني ياللي تحبني ع الفرس
الدنيا قالت .. قام خطفها الشيطان
عجبي !!!!
===============
من بين شقوق الشيش و شقشقت لك
مع شهقه العصافير و زقزقت لك
نهار جديد انا . . قوم نشوف نعمليه
انا قلت يا ح تقتلني .. يا ح اقتلك
عجبي !!!
===============
جالك اوان ووقفت موقف وجود
يا تجود بده يا قلبي يا بده تجود
ما حد يقدر يبقي علي كل شئ
مع ان – عجبي – كل شئ موجود
عجبي !!!
===============
جالك اوان وعرفت مشي الجنايز
كيف شفتها يا عبد رب اللذايذ
قال : شفت شيل بالحيل فقير او امير
كما شالوا في الخمامير فواضي القزايز
عجبي !!
===============
انا كنت شئ و صبحت شئ ثم شئ
شوف ربنا .. قادرعلي كل شئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي !!
===============
يا مشرط الجراح امانه عليك
و انت ف حشايا تبص من حواليك
فيه نقطه سوده في قلبي بدات تبان
شيلها كمان .. و الفضل يرجع اليك
عجبي !!!
===============
كيف شفت قلبي و النبي يا طبيب
همد و مات و الا سامع له دبيب
قاللي لقيته مختنق بالدموع
و ما لوش دوا غير لمسه من ايد حبيب
عجبي !!!!
===============
تسلم يا غصن الخوخ يا عود الحطب
بييجي الربيع .. تطلع زهورك عجب
و انا ليه بيمضي ربيع وييجي ربيع
و لسه برضك قلبي حته خشب
عجبي !!!
===============
قلبي عليل يا ناس و في الكاس دواه
مديت له ايدي شربت م اللي حواه
جنبي الشمال خف .. اليمين اتوجع
و ايه يداوي الكبد م اللي كواه
عجبي!!
===============
.. دي مزكرات و كتبتها من سنين
في نوته زرقا لون بحور الحنين
عترت فيها .. رميتها في المهملات
وقلت صحيح اما صحيح كلام مخبولين
عجبي !!
===============
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات اكتر بترفض تموت
عجبي !!
===============
الدنيا من غير الربيع ميته
ورقه شجر ضعفانه و مفتته
لا يا جدع غلطان تامل وشوف
زهر الشتا طالع في عز الشتا
عجبي !!!
===============
ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كبار
و ما لكش غير منقار و قادر تعيش
عجبي !!!!
===============
سمعت نقطه ميه جوه المحيط
بتقول لنقطه ما تنزليش في الغويط
اخاف عليكي م الغرق .. قلت انا
ده اللي يخاف م الوعد يبقي عبيط
عجبي !!!
===============
بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!!
===============
فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين يا جدع
قال من بعيد و لسه رايح بعيد
عجبي !!
===============
كان فيه قمر كانه فرخ الحمام
علي صغره دق شعاع شق الغمام
انا كنت حاضر قلت له ينصرك
اشحال لما حتبقي بدر التمام
عجبي !!
===============
النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعه كمان تبطل دلع
عجبي !!!
===============
صوتك يا بنت الايه كانه بدن
يرقص يزيح الهم يمحي الشجن
يا حلوتي و بدنك كانه كلام
كلام فلاسفه سكروا نسيوا الزمن
عجبي !!!!
===============
كرباج سعاده وقلبي منه اجلد
رمح كانه حصان و لف البلد
و رجع لي نصل الليل و سالني .. ليه
خجلان تقول انك سعيد يا ولد
عجبي !!!
===============
مزيكه هاديه الكون فيها انغمر
وصيف و ليل و عقد فل و سمر
يا هلتري الناس كلهم مبسوطين
و يا هلتري شايفين جمال القمر ؟
عجبي!!
===============
انشد يا قلبي غنوتك للجمال
و ارقص في صدري من اليمين للشمال
ما هوش بعيد تفضل لبكره سعيد
ده كل يوم فيه الف الف احتمال
عجبي !!
===============
اه لو انا و محبوب جزنا الفضا
في سفينه وحدينا .. واشيا رضا
ساعه صفا تعجبنا نرجع لها
و الهم قبل ما ييجي .. يبقي مضى
عجبي !!
===============
انا اله الوجد رب الهيام
اضرب بسهم الوهم وهم الغرام
و هم الغرام من كتر ما هو لذيذ
رشقت انا ف صدري جميع السهام
عجبي !!!
__________________
حدوته عن جعران و عن خنفسه
اتقابلوا حوا بعض ساعه مسا
و لا قال لهم حد اختشوا عيب حرام
و لا حد قال دي علاقه متدنسة
عجبي !!!!
===============
ياللي عرفت الحب يوم و انطوي
حسك تقال مشتاق لنبع الهوي
حسك تقول مشتاق لنبع الغرام
ده الحب .. مين داق منه قطره…ارتوي
عجبي !!!
===============
زحام و ابواق سيارات مزعجة
للي يطول له رصيف.. يبقي نجا
لو كنت جنبي يا حبيبي انا
مش كنت اشوف ان الحياه مبهجة
عجبي!!
===============
ايديا في جيوبي وقلبي طرب
سارح في غربه بس مش مغترب
و حدي لكين ونسان و ماشي كده
وبابتعد ما اعرف .. او باقترب
عجبي !!
===============
يا ميت ندامه ع القلوب الخلا
لا محبه فيها و لا كراهه ولا
حتي يا قلبي الحزن ما عادش فيك
معلهش .. لك يوم برضه راح تتملا
عجبي !!
===============
مرحب ربيع مرحب ربيع مرحبه
يا طفل يا للي ف دمي ناغا وحبا
علشان عيونك يا صغنن هويت
حتي ديدان الارض و الاغربة
عجبي !!!
===============
فتحت شباكي لشمس الصباح
ما دخلش منه غير عويل الرياح
و فتحت قلبي عشان ابوح بالالم
ما خرجش منه غير محبه و سماح
عجبي !!!!
===============
غمست سنك في السواد يا قلم
عشان ما تكتب شعر يقطر الم
مالك جرالك ايه يا مجنون … و ليه
رسمت ورده وبيت و قلب و علم
عجبي !!!
===============
انا الذي عمري اشتياق في اشتياق
و قطر داخل في محطه الفراق
قصدت نبع السم وشربت سم
من كتر شوقي وعشمي في الترياق
عجبي !!!
===============
انا الذي عشت الزمن مضيعه
بروح حزينه معفنه مضعضعه
زرعت شجره سنط لجل انجرح
لقتها شعر البنت و مفرعه
عجبي !!
===============
لو فيه سلام في الارض وطمان و امن
لو كان مفيش و لا فقر و لا خوف جبن
لو يملك الانسان مصير كل شئ
انا كنت اجيب للدنيا ميت الف ابن
عجبي !!
===============
العشب طاطا للنسايم و نخ
اخضر طري مالهش في الحسن اخ
عصفور عبيط انا .. غاوي بهجه و غنا
ح انزلهنا.. و انشا لله يهبرني فخ
عجبي !!!
===============
اوصيك يابني بالقمر و الزهور
اوصيك بليل القاهره المسحور
و ان جيت في بالك .. اشتري عقد فل
لاي سمرا.. وقبري اوعك تزور
عجبي !!!!
===============
غمض عينيك و ارقص بخفه و دلع
الدنيا هي الشابه و انت الجدع
تشوف رشاقه خطوتك تعبدك
لكن انت لو بصيت لرجليك ….تقع
عجبي !!!
===============
حاسب من الاحزان و حاسب لها
حاسب علي رقابيك من حبلها
راح تنتهي و لابد راح تنتهي
مش انتهت احزان من قبلها؟
عجبي !!!
===============
ياسك و صبرك بين ايديك و انت حر
تياس ما تياس الحياه راح تمر
انا دقت مندا ومندا عجبي لقيت
الصبر مر و برضك الياس مر
عجبي !!
===============
ولدي نصحتك لما صوتي اتنبح
ما تخفش من جني و لا من شبح
و ان هب فيك عفريت قتيل اساله
ما دافعش ليه عن نفسه يوم ما اندبح
عجبي !!
===============
ولدي اليك بدل البالون ميت بالون
انفخ وطرقع فيه علي كل لون
عساك تشوف بعينك مصيرالرجال
المنفوخين في الستره و البنطلون
عجبي !!!
===============
خوض معركتها زي جدك ما خاض
صالب و قالب شفتك بامتعاض
هي كده…ما تنولش منها الامل
غير بعض صد ورد ووجاع مخاض
عجبي !!!!
===============
كام اشتغلت يا نيل في نحت الصخور
مليون بئونه و الف مليون هاتور
يا نيل انا ابن حلال و من خلفتك
و ليه صعيبه علي بس الامور
عجبي !!!
===============
منين اجيبها كلمه متالمة
لعيبه فايره حايره و مصممه
منين اجيبها كلمه تكون بنت ارض
تشفي اللي ما شافهوش كلام السما
عجبي !!!
===============
انا قلت كلمه و كان لها معنيين
كما بطن واحده و توامين زي وشين
لو دنيا شر.. التوام الخير يموت
لو دنيا خير .. الشر ح يعيش منين
عجبي !!
===============
انا اللي بالامر المحال اغتوي
شفت القمر نطيت لفوق في الهوا
طلته ما طلتوش ايه انا يهمني
و ليه .. ما دام بالنشوه قلبي ارتوي
عجبي !!
===============
بره القزاز كان غيم و امطار و برق
ما يهمنيش – انا قلت – و لا عندي فرق
غيرت رايي بعد ساعه زمان
و كنت في الشارع .. و في الجزمه خرق
عجبي !!!
===============
عيني رات مولود علي كتف امه
يصرخ تهنن فيه يصرخ تضمه
يصرخ تقول يا بني ما تنطق كلام
ده اللي ما يتكلمش يكتر همه
عجبي !!!!
===============
يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك انما
كتم الغنا هو اللي ح يموتك
عجبي !!!
===============
ياللي بتبحث عن اله تعبده
بحث الغريق عن اي شئ ينجده
الله جميل و عليم و رحمن رحيم
اجمل صفاته .. وانت راح توجده
عجبي !!!
===============
حقرا و فوق كوكب حقير محتقر
في الكون تكون دنياكو ايه يا بقر
رملايه من صحرا ؟ لكين ايش تقول
و الكون بحاله جوه عقل البشر
عجبي !!
===============
لا تجبر الانسان و لا تخيره
يكفيه ما فيه من عقل بيحيره
اللي النهارده بيطلبه و يشتهيه
هو اللي بكره ح يشتهي يغيره
عجبي !!
===============
ياللي في حماه الشمس تلقي الملاذ
و الف بكره و بكره .. في ضلوعه لاذ
مين انت ؟ مارد ؟ رب ؟ قال لا ده بس
انا اللي باروي القمح و اسقي الفولاذ
عجبي !!!
===============
غسل المسيح قدمك يا حافي القدم
طوبي لمن كانوا عشانك خدم
صنعت لك نعليك انا يا اخي
مستني ايه .. ما تقوم تدوس العدم
عجبي !!!!
===============
البط شال عدي الجبال و البحور
ياما نفسي اهج .. احج ويا الطيور
اوصيك يا ربي لما اموت .. و النبي
ما تودنيش الجنه .. للجنه سور
عجبي !!!
===============
طال انتظاري للربيع يرجع
و الجو يدفا و الزهور تطلع
عاد الربيع عرمرم شباب
ايه اللي خلاني ابتديت افزع ؟
عجبي !!!
===============
و لو اتضنيت و فنيت وعمري انفرط
مش عاوز الجا للحلول الوسط
و كمان شطط و جنون مانيش عاوز
يا مين يقول لي الصح فين والغلط
عجبي !!
===============
عاد الربيع كانه طعم الحب
و الحب نار جوه العروق بتصب
اتمتع ازاي بيه وانا متقطع
من كتر خوفي لا في الخطيئه يطب ؟
عجبي !!
===============
ازاي شبابنا يقوم و ياخد دوره
من غير صراخ يئذيه و يجرح زوره
يا هلتري احسن له يقعد ساكت
او ينترك و لو خرج عن طوره ؟
عجبي !!!
===============
عيني رات عصفور ووياه ابنه
بيحدفه في الريح و ياخده ف حضنه
نوبتين و تالت نوبه – عجبي عليهم –
كانوا سوا بيرفرفرا و يغنوا
عجبي !!!!
===============
احسن ما فيها العشق و المعشقة
و شويتين الضحك والتريقة
شفت الحيه . لفيت . لقيت الالذ
تغييرها . و ده يعني التعب و الشقا
عجبي !!!
===============
عجبي علي العجب العجيب العجاب
لما الحقيقه تطل بعد احتجاب
و تروح و تحلا وفجاه تصبح مفيش
كمثل طراطيش بحر ياما خد و جاب
عجبي !!!
===============
في الهو ماشي يا بهلوان اش اش
يا فراشه منقوشه علي كل وش
شقلبت عقلي و عقلي شقلبني
و كنت باحسبني بقيت ما اندهش
عجبي !!
===============
وقفت ساعه الصبح باغسل سناني
قالت لي شايف قوتي و لمعاني ؟
ايش تطلب اليوم مني ضحكه اسد ؟
والا ابتسامه اعلانات امريكاني ؟
عجبي !!
===============
الحلو يم اليم صابح رايح
سارح في حضن الميه سابح سايح
الحلو داب في البحر , قلت ادوقه
وجدت لسه البحر برضك مالح
عجبي !!!
===============
يا كل كلمه للعجب في قاموس
انسكلوبيديا لسان العرب او لا لاروس
تعالوا نجده . ده لسه في عصرنا
الشمس و البحر العريض بالفلوس
عجبي !!!!
===============
الموج تلول تهبط وتطلع تلول
يا بحر خدني الشط صاحبك ملول
و الا بلاش الشط ح اعمل به ايه
ده ريحته طحلب مهري و ام الخلول
عجبي !!!
===============
ما انتاش بتلعب ليه يا روح بابا ؟
و لا عسكري و لا لص في عصابه ؟
العب اسد او ديب رهيب او غزال
دي الدنيا في نهايه المطاف غابة
عجبي !!!
===============
ورد في ورق سلوفان يا حلوه اهديلك ؟
و الا انقله بالطين في الشتله و اجيلك
الاولاني لو وحا بحناني
عجبي علي التاني بايه يوحيلك
عجبي !!
===============
انا قلبي كوكب و انطلق في المدار
حواليكي يا محبوبتي يا نور ونار
يلف مهما يلف ما بيكتففيش
وتمللي نصه ليل و نصه نهار
عجبي !!
===============
الارض شوك ايوه لكين هايش
و الحمره مش يعني الطريق حايش
دي دمنا السيال .. وبشره خير
ان انتي عايشه و ان كنت انا عايش
عجبي !!!
===============
ايه اللي خدته من مرور السنين
يا قلبي الا دمعتك و النيين
بتئن و ترجع و بتفرح و ترجع تحن
مع ان مش كل البشر فرحانين
عجبي !!!!
===============
اوقات افوق و يحل عني غبايا
واشعر كاني فهمت كل الخبايا
و افتح شفايفي علشان اقول الدرر
ما اقولش غير حبه غزل في الصبايا
عجبي !!!
===============
عيني رات مخلوق في غايه البشاعة
انا قلت له لما تاملته ساعة
اللذه و الموت علموك اللزج
و انا علموني الفلسفه و الشجاعة
عجبي!!
===============
غطس وقب الموج نهود بمبي
من الف جيل جمالات ما تعلم بي
يا قلبي عيب دول امهاتنا القدام
استغفر الله العظيم ربي
عجبي !!
===============
علقت في المسمار قناع مهزلة
ومعاه قناع ماساه بحزنه ابتلا
بصيت لقيتهم يشبهوا بعضهم
واهو ده العجب يا ولاد و الا فلا
عجبي !!
===============
ظهر المسيح الحي علي سفح ربوة
و نزل بهاله الضي و قعد في قهوة
بصوا .. تعالوا .. قالوا خليه في حاله
الناس في حالهم يا بني .. مالهمش دعوة
عجبي !!!
===============
لولا اختلاف الراي يا محترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي !!!!
===============
يا ورده قلبي معاكي في الريح لعب
لا تعبتي م الريح و لا قلبي تعب
احنا كده : نرتاح في صخب الجنون
و في السكون بنخاف قوي و نترعب
عجبي !!!
===============
مركب ورق من نفخه تتطوح
ركبتها و الكل بيلوح
سوحت فيها اتنين و خمسين سنه
للان ….. و لا بتغرق و لا تروح
عجبي!!
===============
عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديد
قد اللي ماشي .. وتحت باطه كتاب
عجبي !!
===============
يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزميه امل
وازاي تكفيني لباب القبر؟
عجبي !!
===============
قاعده قناني الخمر ساكته و ساهية
مع ابن ادم في الشبه متناهية
مفيش كده روقان في لحظه تشوفهم
و بعدها بلحظه يودوا في داهيه
عجبي !!!
===============
حته محاره وجدتها في يوم لقية
قالت لي شوف كيف الطبيعه شقية
نظرت للكهف اللي فيها و لقيت
ان الطبيعه كمان لا اخلاقية
عجبي !!!!
===============
بلياتشو قال ايه بس فايده فنوني ؟
و تلات وقق مساحيق بيلونوني
و الطبل و المزامير و كتر الجعير
اذا كان جنون زبوني زاد عن جنوني
عجبي !!!
===============
نقطه مراره كمان علي مشروبي
دوبها يا ساقي حسب مطلوبي
طعب الحياه .. مش برضه فيها و فيها ؟
ليالي وردي و نهارات خروبي ؟
عجبي!!
===============
وسط الحطام اتفرجوا يا انام
تمثال ملك . و مبوله م الرخام
لتنين نحتهم نفس اسطي الحجر
و كانوا ذات يوم كتلتين لسه خام
عجبي !
===============
عيد و العيال اتنططوا ع القبور
لعبوا استغمايه .. و لعبوا بابور
و باللونات و نايلونات شفتشي
و الحزن ح يروح فين جنب السرور
عجبي !!
===============
انا قلبي كوره و الفراوده اكم
ياما اتنطح و انشاط و ياما اتعكم
و اقول له كله ح ينتهي في المعاد
يقول بساعتك ؟ و الا بساعه الحكم ؟
عجبي !!!
===============
الضحك قال يا سم ع التكشير
امشير و طوبه وانا ربيعي بشير
مطرح ما باظهر بانتصر ع العدم
انشالله اكون رسمايه بالطباشير
عجبي !!!!
===============
اهوي الهوي و همس الهوي في العيون
وبسمه المغرم ودمعه الحنون
و زلزلات الحب نهد الصبا
اكون انا المحبوب او لا اكون
عجبي !!!
===============
يا ملونين البيض في شم النسيم
لون الحنين و الشوق و خمر النديم
ما تعرفوش سايق عليكو النبي
تلونوا الايام بلون النعيم ؟
عجبي!!
===============
الدنيا صندوق دنيا .. دور بعد دور
الدكه هي .. و هي كل الديكور
يمشي اللي شاف ويسيب لغيره مكان
كان عربجي او كان امبراطور
عجبي !
===============
قطي العزيز راقد علي الكنبات
في نوم لذيذ .. و بيلحس الشنبات
و انا كل عين فنجان مدلدق قلق
صدق اللي قال ان الحياه منابات
عجبي !!
===============
قالوا السياسه مهلكه بشكل عام
و بحورها يا بني خشنه مش ريش نعام
غوص فيها تلقي الغرقانين كلهم
شايلين غنايم .. و الخفيف اللي عام
عجبي !!!
===============
سلام سلام سلام سلام … سلام
كلام كلام كلام كلام … كلام
هز الورق يا صاحبي كدهوه
يطلع كلام سلام .. و سلام كلام
عجبي !!!!
===============
فوق تحت . ورا قدام . يمين شمال
في الجو . تحت الميه . او في الرمال
طلب الكمال يحرم علي الممكن
و الممكنات دول محرومين م الكمال
عجبي !!!
===============
هات يا زمان و هات كمان يا زمان
غير بسمه الشجعان مامني يبان
هو اللي داق الفرحه يوم ثورته
يقدر يعود و لا ثانيه للاحزان ؟
عجبي!!
===============
عبثا باقول واقرا في سوره عبس
ماتلومش حد ان ابتسم او عبس
فيه ناس تقول الهزل يطلع جد
و ناس تقول الجد يطلع عبث
عجبي !
===============
يومي علي الله تنتهي و تغيب
الشمس و تعود تاني يوم لهاليب
زي الحياه ماساه و من كترها
بقي لا انتهاءها و ابتداءها عجيب
عجبي !!
===============
علم اللوع اضخم كتاب في الارض
بس اللي يغلط فيه يجيبه الارض
اما الصراحه فامرها ساهل
لكن لا تجلب المال و لا تصون العرض
عجبي !!!
===============
انا كان لي اب . و كان رئيس محكمه
ستين سنه .. في قضيه واحده اترمي
ستين سنه و طلع براءه و خرج
يشكي الحياه و الموت لرب السما
عجبي !!!!
===============
قالوا ابن ادم روح و بدنه كفن
قالوا لا بدن . قالوا لا ده روح في بدن
رفرف فؤادي مع الرايات في الهوا
انا قلت لا روح في بدن في وطن
عجبي !!!
__________________ الدرس انتهى
الدرس انتهى لموا الكراريس
بالدم اللى على ورقهم سال
فى قصر الامم المتحدة
مسابقه لرسوم الاطفال
ايه رايك فى البقع الحمرا
يا ضمير العالم يا عزيزى
دى لطفله مصريه وسمرا
كانت من اشطر تلاميذى
دمها راسم زهرة
راسم رايه ثورة
راسم وجه مؤامرة
راسم خلق جباره
راسم نار
راسم عار
ع الصهيونيه والاستعمار
والدنيا اللى عليهم صابرة
وساكته على فعل الاباليس
الدرس انتهى
لموا الكراريس ..
ايه راى رجال الفكر الحر
فى الفكرادى المنقوشه بالدم
من طفل فقير مولود فى المر
لكن كان حلو ضحوك الفم
دم الطفل الفلاح
راسم شمس الصباح
راسم شجره تفاح
فى جناين الاصلاح
راسم تمساح
بالف جناح
فى دنيا مليانه بالاشباح
لكنها قلبها مرتاح
وساكته على فعل الاباليس
الدرس انتهى
لموا الكراريس …
ايه رايك يا شعب يا عربى
ايه رايك يا شعب الاحرار
دم الاطفال جايلك يحبى
يقول انتقموا من الاشرار
ويسيل ع الاوراق
يتهجى الاسماء
ويطالب الاباء
بالثار للابناء
ويرسم سيف
يهد الزيف
ويلمع لمعه شمس الصيف
فى دنيا فيها النور بقى طيف
وساكته على فعل الاباليس
الدرس انتهى لموا الكراريس
الشوارع حواديت
حواديه الحب فيها
وحودايه…عفاريت
اسمعي يا حلوه لما اضحكك
الشارع دا كنا ساكنين فيه زمان
كل يوم يضيق زياده عن ما كان
اصبح الان بعد ما كبرنا عليه
زي بطن الام مالناش فيه مكان
الشوارع حواديت
حودايه الحب فيها
وحودايه…عفاريت
اسمعي يا حلوه لما اضحكك
الشارع دا رحنا فيه المدرسة
اللي باقي منه باقي
واللي مش باقي…اتنسى
كنسوه الكناسين بالمكنسة
ييجي دور لحظه اسى
انا برضه كمان نسيت
والشوارع حواديت
حودايه الحب فيها
وحودايه…عفاريت
اسمعي يا حلوه لما اضحكك
الشارع دا اوله بساتين
واخره حيطه سد
ليا فيه قصه غرام ماحكيتش عنها لاي حد
من طرف واحد…وكنت سعيد اوي
بس حراس الشوارع حطوا للحدودته حد
الشوارع حواديت
حودايه الحب فيها
وحودايه…عفاريت
اسمعي يا حلو لما اضحكك
الشارع دا شفتك انتي ماشيه فيه
لابسه جيب…وبلوزه وردي
وعامله ديل حصان وجيه
اتجاهك اتجاهي…مشينا ليه
والشارع دا زحام وتيه
بس لازم نستميت
والشوارع حواديت
حودايه الحب فيها
وحودايه…عفاريت
واضحكي يا حلوه لما اسمعك
الجزء الثانى
حصان عرابي جميل حصان عرابي اصيل
حصان عرابي رشيق ديله طويل
يسهر مع الخيل طول الليل يتكلم
ويقول اراء رغم انه ماكانش متعلم
ويقف في عابدين وياخذ زاويه البروفيل
للرسامين يرسموه ونشوفه جيل ورا جيل
ويعدي كالريح على المجاريح ويسلم
وحافره ع الصخر في التل الكبير علم
ولما صابه انفجار القنبله اتالم
على اسم مصر
والمس حجاره الطوابي وادق بكعابي
يرجع لي صوت الصدى يفكرني بعذابي
يا ميت ندامه على امه بلا جماهير
ثورتها يعملها جيشها ومالها غيره نصير
والشعب يرقص كانه عجوز متصابي
انهض من القبر احكي القصه يا عرابي
يطل لي رافع الطهطاوي م التصاوير
شاحب ومجروح في قلبه وجرح قلبه خطير
وعيونه مغرورقين بيصبوا دمع غزير
على اسم مصر
مالك سلامتك بتبكي ليه يا طهطاوي
قال لك عرابي .. انكسر بسلاح اوروباوي
وسلاح اوروبا ماهواش المدافع بس
ده فكر ناقد مميز للثمين والغث
قلناها ميت الف مره الف مره بصوت جهير داوي
بس الحماقه لاليها طبيب ولا مداوي
ولا حد م الخلق بالخطر اللي داخل حس
الغفلانين اللي خلوا العقل صابه مس
قالوا الخطر هو فكر اوروبا لو يندس
على اسم مصر
احسنت في القول صحيح يا ولد يا متنبي
جبت اللي جوه الفؤاد عن مصر متعبى
وحكمت بالعدل لكن بعضنا انظلموا
” يا امه ضحكت من جهلها الامم ”
العلم كان عندنا من صغره متربي
لكنه هاجر وعدى البحر متخبي
لما الايران هجموا ثم اليونان هجموا
ثم الرومان دمروا ثم التتار هدموا
ثم الجميع كل واحد جه مسح قدمه
على اسم مصر
ايها الديك رفيع الموضع
يا صفيحا فوق مسمار يدور
صف لنا فعل الرياح الاربع
قل لنا .. لو كنت تدري ما يدور
قال صه . فالان ريح الشرق جاءت
تحمل الضوضاء من سوق المزاد
وتغني دون لحن كيف شاءت
انا ريح الشرق ادعى شهرزاد
انا احكي ثم احكي ثم احكي
وامامي السيف كالعشب يميل
وبكائي يتساوى مع ضحكي
طالما كان باسلوب جميل
ثم ها قد ارسل الغرب رياحه
تزكم الانف برائحه عجب
وتغني كبغى في مناحة
انا ريح الغرب لوني كالذهب
انا صفراء برمل الصحراء
ادفن الخضره تحتي دون رحمه
اوصدوا الباب بوجهي الحقراء
حسنا فلتصبح القريه فخمة
ثم ها قد اقبلت ريح الجنوب
بدخان الدهن تسري عابقة
وتغني انني ادعي الهبوب
انا سوداء كبئر المشنقة
انا سوداء كافعى هائلة
كرماد النوم ينثر في العيون
كالعرايا في المروج الموحلة
سعداء .. تعساء ..يرقصون
وتانى برهه ديك الصفيح
يلقط الانفاس وهو يترنح
دائرا دورته مع كل ريح
واخيرا صاح كالاسد المجنح
هللويا ..اقبلت ريح الشمال
في غلالات رقاق راعشه
وهي تشدو بحنو ودلال
ها انا ريح الشمال المنعشة
انني ورديه مثل العسل
ديدمونا .. هكذا يدعونني
قد عبرت البحر يحدوني الامل
لعطيل اسمر ..
يخنقني !
ومضى ديك الرياح في دعه
من يمين ليسار يتذبذب
وبدا اضحوكه وامعه
وهو مصلوب شهيد يتعذب
وعلى راي المثل
الديك الصفيح
بيدوخ ويا الريح
والديك الصفيح
م البيضه بيصيح
ويقول بالصريح
الفكر فوق في الشمال يا الله الحقوه يا ولاد
لحقوه ولاد من ولاد الاغنيا الاسياد
وهم راجعين رموه في الباخره في البحر
ونزلوا حكموا في ظل الانجليز والقصر
ومصر في الشمس بتغربل كلام منعاد
عن ابن بنت ابن حنت وطارق ابن زياد
والانجليز راضيه بالخطباء وخطب الفخر
خطيب يهز الرؤوس وخطيب يهز الخصر
وخطيب يموت موته الابطال قتيل القهر
على اسم مصر
والانجليز معجبين بمراسم التابين
مات مصطفى كامل اتملت البلد صواوين
والمشرقين شوقي جابهم لجل يبكوا عليه
اه لو عرف هم ايه دلوقت وبقم ايه
المشرق الاولاني هو شعب الصين
هزم التخلف بتنظيم اشتراكي رصين
تنظيم يروح اللومان على طول كده برجليه
والمشرق التاني ينحط الحديد في ايديه
مليون شهيد يعني ثوره تخض شوقي بيه
على اسم مصر
هل مصر موميا جميله صورتها فوق النعش
يعشقها مجنون ينادي عليها ولا تطلعش
هل مصر نار صفصفت والنفخ فيها محال
والارض نشعت على رمادها استحال اوصال
سالت انا الرافعي كان عجز ولا بيسمعش
لكن عينيه كانوا يحكولي قصص ما اشبعش
يقولولي ماتخافش مصر بخير وعال العال
مصر الجبرتي ومصر الرافعي حال غير الحال
انظر محمد فريد اعظم وارقى مثال
على اسم مصر
خذ الكتاب في يمينك وانظر الترقيم
عند المحبه وعند الموت في حرف الميم
تلقى محمد فريد بينهم مقيم ع العهد
وتلقى وجهه المدور زي قرص الشهد
مليان حماسه وكياسه وجدعنه وتصميم
على ايه مصمم؟ .. يسهم زي كل زعيم
ويقول على الثوره اللي وادوا ثورته في المهد
انا بابني في السر شيء صعب المنال كالفهد
على اسم مصر
محلول مركز من السكر في كباية
وف قلبه خيط يتلضم حبايه حبايه
سكر نبات بللورات الماظ بتضوي ضي
وتفضل الالماظات تكبر شوي شوي
لحد ما العقد يبقى في الجمال غايه
ده الحزب في الشعب نضرب به المثل ايه
الصلب والسايل الاثنين سوا ياخي
تنظيم محمد فريد في كل قريه وحي
بللوره بتشع بالثوره اللي يومها جي
على اسم مصر
العقد الماظ ورقبه مصر لايقاله
ضيع فريد كل ارضه عليه وامواله
وفجاه حاكموه ويالله نفوه عن الاوطان
وحرب عالميه اولى ووفد م الاعيان
وثوره والانجليز انحطوا وانشالوا
مين اللي نظم فلول الشعب ده بحاله
ازاي جميع البلاد تنهض في نفس الان
القاهره اسكندريه منفلوط اسوان
وبعيد يا ولداه فريد مرمي وحيد شرقان
على اسم مصر
السيمفونيه اسمها الثوره على المحتل
سنه تسعتاشر اتعزفت في كل محل
تاليف محمد فريد الفها من سنوات
وكتب لها النوته بوق وبيانو وكمنجات
عزفوها من غير قيادته وجمعهم ما اختل
غير وقت صرف الاجور لما النفر ينذل
من وقتها وغلوشت نغمات على نغمات
وسعد زغلول زعيم مشغول في الانتخابات
يخطب ويضرب يابده يطبع البصمات
على اسم مصر
وف اوضه عريانه فيها كل شيء بردان
رقد فريد وحده بالحمى والهذيان
وقام وقف ع السرير في تلج المانيا
ينده يا مصر اسمعي اللي مفاق الدنيا
ووصيتي الثوره لاشتراكيه والبنيان
ثوره بحق وحقيق مش حركه م الاعيان ماتغمضوش عن وحوش الغرب ولا ثانية
ح تروح وحوش لنجليز تطلع وحوش تانية
وسقط ونطق الشهاده ونظرته الحانية
- رباعيات صلاح جاهين مكتوبة
- اشعار صلاح جاهين مكتوبة
- من اشعار البنات رباعيات مكتوبه
- قصائد صلاح جاهين مكتوبة
- صلاح جاهين الناس ليه كده
- شعر صلاح جاهين
- شعر رباعيات بنات مكتوب
- ربعيات شعر مكتوبه
- رباعيات مكتوبه من الشعر
- نقطة ميه قالت شعر صلاح جاهين
